ഗില്ലിനെ പഞ്ഞിക്കിട്ട് വിരാട്, പക്ഷേ ബാറ്റുകൊണ്ടല്ല; മൈതാനത്തെ ആ കുസൃതിച്ചിരി വൈറൽ, ചിന്നസ്വാമിയിൽ കോഹ്‌ലി-ഗിൽ ബ്രോമാൻസ്

റോയൽ ചലഞ്ചേഴ്സ് ബെംഗളൂരുവും ഗുജറാത്ത് ടൈറ്റൻസും തമ്മിലുള്ള മത്സരം ആവേശത്തിന്റെ കൊടുമുടിയിൽ നിൽക്കുമ്പോഴാണ് ഗ്രൗണ്ടിനെ ചിരിപ്പിച്ച ആ രംഗങ്ങൾ അരങ്ങേറുന്നത്. ഗുജറാത്ത് ബാറ്റിംഗിനിടെ ക്രീസിലുണ്ടായിരുന്ന ശുഭ്‌മൻ ഗില്ലിനെ വിരാട് കോഹ്‌ലി തന്റെ ട്രേഡ്‌മാർക്ക് ശൈലിയിൽ കളിയാക്കുന്ന ദൃശ്യങ്ങളാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്.

ഫീൽഡ് ചെയ്യുന്നതിനിടയിൽ ഗില്ലിന്റെ നേരെ നോക്കി ചില ആംഗ്യങ്ങൾ കാണിച്ചും തമാശയായി പരിഹസിച്ചുമാണ് കോഹ്‌ലി കാണികളെ കയ്യിലെടുത്തത്. വിട്ടുകൊടുക്കാൻ തയ്യാറാവാതെ ഗില്ലും പുഞ്ചിരിയോടെ മറുപടി നൽകി. ഗൗരവമേറിയ ഒരു പോരാട്ടത്തിനിടയിൽ ലഭിച്ച ഈ ചെറിയ ആശ്വാസ നിമിഷങ്ങൾ സ്റ്റേഡിയത്തിലുണ്ടായിരുന്നവർക്കും ആവേശമായി. ഇത് വെറുമൊരു പോരാട്ടമല്ലെന്നും മുതിർന്ന താരവും വളർന്നു വരുന്ന പ്രതിഭയും തമ്മിലുള്ള പരസ്പര ബഹുമാനമാണെന്നും കമന്റേറ്റർമാർ നിരീക്ഷിച്ചു.

തമാശകൾ ഒകെ ഉണ്ടാക്കിയെങ്കിലും ബാറ്റിംഗിൽ കോഹ്ലി വിട്ടുവീഴ്ചകൾ ചെയ്തില്ല. ആർസിബി ലക്ഷ്യം പിന്തുടർന്ന് ജയിച്ചപ്പോൾ ഈ മത്സരത്തെ ആരാധകർ ഓർക്കുന്നത് സെഞ്ച്വറികളെക്കാളും സിക്സറുകളെക്കാളും ഉപരി കോഹ്‌ലിയും ഗില്ലും തമ്മിലുള്ള ഈ മനോഹരമായ ‘ഡുവൽ’ കൂടി ചേർത്തായിരിക്കും.

മത്സരത്തിൽ ടോസ് നഷ്ടപ്പെട്ട് ബാറ്റിംഗിനിറങ്ങിയ ഗുജറാത്ത് ടൈറ്റൻസിന് വേണ്ടി ഓപ്പണർ സായ് സുദർശൻ വിസ്മയകരമായ സെഞ്ച്വറി നേടി. ഈ ഇന്നിംഗ്‌സിലൂടെ ഐപിഎൽ ചരിത്രത്തിൽ ഏറ്റവും വേഗത്തിൽ 2000 റൺസ് തികയ്ക്കുന്ന താരം എന്ന റെക്കോർഡ് 24-കാരനായ സുദർശൻ സ്വന്തമാക്കി.

58 പന്തിൽ നിന്നാണ് സായ് തന്റെ മൂന്നാം ഐപിഎൽ സെഞ്ച്വറി പൂർത്തിയാക്കിയത്. ഗില്ലിനൊപ്പം (32 റൺസ്) ചേർന്ന് ഒന്നാം വിക്കറ്റിൽ 128 റൺസിന്റെ കൂറ്റൻ കൂട്ടുകെട്ടാണ് താരം പടുത്തുയർത്തിയത്. ടി20യുടെ വെടിക്കെട്ട് ശൈലിയേക്കാൾ, ശാസ്ത്രീയമായ ബാറ്റിംഗിലൂടെ റൺസ് കണ്ടെത്താമെന്ന് സുദർശൻ തെളിയിച്ചു. ക്രുണാൽ പാണ്ഡ്യയെയും സുയാഷ് ശർമ്മയെയും അതിമനോഹരമായ സിക്സറുകളിലൂടെ താരം നേരിട്ടു. സായ് സുദർശൻ പുറത്തായതിന് പിന്നാലെ അവസാന ഓവറുകളിൽ ഗുജറാത്തിന്റെ റൺറേറ്റ് കുറയ്ക്കാൻ ആർസിബി ബൗളർമാർക്ക് സാധിച്ചു.

17-ാം ഓവറിൽ 174 റൺസിലായിരുന്ന ഗുജറാത്തിന് അവസാന മൂന്ന് ഓവറിൽ വെറും 31 റൺസ് മാത്രമേ കൂട്ടിച്ചേർക്കാൻ കഴിഞ്ഞുള്ളൂ. ജേസൺ ഹോൾഡറുടെ (23*) അതിവേഗ ഇന്നിംഗ്‌സാണ് സ്കോർ 205-ൽ എത്തിച്ചത്.

A bit of friendly banter out there!#ViratKohli keeping things lively with #ShubmanGill😎#TATAIPL 2026 | #RCBvGT | LIVE NOW 👉https://t.co/1jQMWSlWnX pic.twitter.com/6zzD3cVEcc

— Star Sports (@StarSportsIndia) April 24, 2026