കാസർകോഡ് : കേരളത്തിൽ വീണ്ടും ശൈശവ വിവാഹം. കാസർകോഡ് തൃക്കരിപ്പൂരിലാണ് ശൈശവ വിവാഹം നടന്നത്. 16 വയസുകാരിയെ 28-കാരൻ വിവാഹം കഴിച്ച സംഭവത്തിൽ വരൻ ഉൾപ്പെടെ നാല് പേർക്കെതിരെ കേസെടുത്തു. ബാലവിവാഹ നിരോധന നിയമപ്രകാരം ചൈൽഡ് വെൽഫെയർ കമ്മിറ്റിയുടെയും ബാലവിവാഹ നിരോധന ഓഫീസറുടെയും ഇടപെടലിനെത്തുടർന്നാണ് നടപടി.
ദക്ഷിണ കൊറിയയിൽ ജോലി ചെയ്യുന്ന 28 വയസുകാരനായ സാബിർ ഷെയ്ക്ക് ആണ് 16 വയസ്സ് മാത്രം പ്രായമുള്ള പെൺകുട്ടിയെ വിവാഹം കഴിച്ചത്. അഴീക്കൽ ജുമാ മസ്ജിദിൽ വെച്ച് രഹസ്യമായിരുന്നു വിവാഹം നടന്നത്. പക്ഷേ ഐശ്വര്യ വിവാഹത്തെക്കുറിച്ച് അറിഞ്ഞ ചിലർ ചൈൽഡ് ലൈനിൽ വിവരം നൽകിയതോടെ അന്വേഷണം ഉണ്ടായി. ബാല വിവാഹ നിരോധന ഓഫീസർ നടത്തിയ അന്വേഷണത്തിൽ ശൈശവ വിവാഹം നടന്നതായി കണ്ടെത്തി. ബാലവിവാഹ നിരോധന ഓഫീസർ പ്രദേശം സന്ദർശിക്കുകയും വിവാഹം നടന്ന മസ്ജിദിലെ ഖാസിയിൽ നിന്നും പെൺകുട്ടിയിൽ നിന്നും മൊഴിയെടുത്തു. വിവാഹം നടന്ന കാര്യം പെൺകുട്ടി ഉദ്യോഗസ്ഥരോട് സ്ഥിരീകരിച്ചിട്ടുണ്ട്. വരൻ സാബിർ, പെൺകുട്ടിയുടെ പിതാവ്, മാതാവ്, വിവാഹത്തിന് കാർമ്മികത്വം വഹിച്ച വ്യക്തി എന്നിവരുൾപ്പെടെ നാല് പേർക്കെതിരെയാണ് പ്രാഥമികമായി കേസെടുത്തിരിക്കുന്നത്.
നിലവിൽ വരൻ സാബിർ വിദേശത്തേക്ക് മടങ്ങിയതായാണ് വിവരം. പ്രതികളെ നാട്ടിലെത്തിക്കാനുള്ള നടപടികൾ പോലീസ് ആരംഭിച്ചിട്ടുണ്ട്. കോടതിയുടെ നിർദ്ദേശപ്രകാരം പെൺകുട്ടിയെ സുരക്ഷിത കേന്ദ്രത്തിലേക്ക് മാറ്റാനോ അല്ലെങ്കിൽ സംരക്ഷണ ഉറപ്പാക്കാനോ ഉള്ള നീക്കത്തിലാണ് അധികൃതർ. ബാലവിവാഹം ശ്രദ്ധയിൽപ്പെട്ടാൽ ഉടൻ തന്നെ 1098 എന്ന ചൈൽഡ് ഹെൽപ്പ് ലൈൻ നമ്പറിലോ അടുത്തുള്ള പോലീസ് സ്റ്റേഷനിലോ വിവരമറിയിക്കണമെന്ന് ബാലാവകാശ കമ്മീഷൻ അറിയിച്ചു.
