ചെന്നൈ സൂപ്പർ കിംഗ്സിനെതിരായ വിജയത്തിന് ശേഷം ഗുജറാത്ത് ക്യാപ്റ്റൻ ശുഭ്മാൻ ഗിൽ ഇൻസ്റ്റാഗ്രാമിൽ പങ്കുവെച്ച ചിത്രമാണ് ചർച്ചകൾക്ക് തുടക്കമിട്ടത്. സി.എസ്.കെയുടെ അടയാളമായ മഞ്ഞ വിസിൽ കൈയ്യിലേന്തി ‘നന്ദി ചെന്നൈ’ എന്ന അടിക്കുറിപ്പോടെയാണ് ഗിൽ ചിത്രം പോസ്റ്റ് ചെയ്തത്. ഇത് ചെന്നൈ ആരാധകരെ പരിഹസിക്കാനുള്ള നീക്കമാണെന്ന് ഒരു വിഭാഗം വാദിക്കുമ്പോൾ, ചെന്നൈയിലെ കാണികളോടുള്ള നന്ദി പ്രകടനമാണെന്ന് ഗിൽ അനുകൂലികളും പറയുന്നു.
159 റൺസ് വിജയലക്ഷ്യം പിന്തുടർന്ന ഗുജറാത്ത് ടൈറ്റൻസ് 20 പന്തുകൾ ബാക്കിനിൽക്കെ 8 വിക്കറ്റിന് വിജയിച്ചു. സ്വന്തം തട്ടകത്തിൽ തകർത്തടിച്ച സായ് സുദർശൻ 46 പന്തിൽ 7 സിക്സറുകൾ ഉൾപ്പെടെ 87 റൺസെടുത്തു. നായകൻ ഋതുരാജ് ഗെയ്ക്വാദ് 74 റൺസുമായി പുറത്താകാതെ നിന്നെങ്കിലും സഞ്ജു സാംസൺ, ശിവം ദുബെ തുടങ്ങിയ മുൻനിര താരങ്ങൾ പരാജയപ്പെട്ടത് അവർക്ക് തിരിച്ചടിയായി.
കഗിസോ റബാഡയും മുഹമ്മദ് സിറാജും തുടക്കത്തിൽ തന്നെ ചെന്നൈ ബാറ്റിംഗ് നിരയെ തകർത്തു. മത്സരത്തിനിടയിലെ അമ്പയറിംഗ് തീരുമാനങ്ങളും വലിയ ചർച്ചയായിട്ടുണ്ട്. അർഷാദ് ഖാൻ എറിഞ്ഞ നോ ബോൾ വിളിക്കാത്തതും തുടർന്നുള്ള പന്തിൽ ജാമി ഓവർട്ടൺ പുറത്തായതും ചെന്നൈ ആരാധകരുടെ പ്രതിഷേധത്തിന് കാരണമായി. സഞ്ജു സാംസന്റെ വിക്കറ്റിന് പിന്നിലെ പ്രകടനം ശ്രദ്ധേയമായെങ്കിലും ബാറ്റിംഗിൽ തിളങ്ങാൻ അദ്ദേഹത്തിന് സാധിച്ചില്ല.
