ബംഗാൾ നിയമസഭാ തിരഞ്ഞെടുപ്പിൽ തൃണമൂൽ കോൺഗ്രസ് കനത്ത തിരിച്ചടി നേരിടുകയും ബിജെപി വലിയ വിജയം സ്വന്തമാക്കുകയും ചെയ്തിട്ടും മുഖ്യമന്ത്രി പദം രാജിവെക്കില്ലെന്ന ഉറച്ച നിലപാടുമായി മമത ബാനർജി. തിരഞ്ഞെടുപ്പ് ഫലം പുറത്തുവന്നതിന് പിന്നാലെ രാഷ്ട്രീയ വൃത്തങ്ങളിൽ വലിയ ചർച്ചകൾക്കാണ് മമതയുടെ ഈ തീരുമാനം വഴിതുറന്നിരിക്കുന്നത്. സാധാരണഗതിയിൽ തിരഞ്ഞെടുപ്പിൽ പരാജയപ്പെട്ടാലുടൻ മുഖ്യമന്ത്രി ഗവർണറെ കണ്ട് രാജി സമർപ്പിക്കുകയാണ് പതിവ്. എന്നാൽ, മമതയുടെ ഈ നീക്കം ബംഗാൾ രാഷ്ട്രീയത്തെ ഒരു ഭരണഘടനാ പ്രതിസന്ധിയിലേക്കാണ് തള്ളിവിടുന്നത്.
ഇന്ത്യൻ ഭരണഘടനയുടെ ആർട്ടിക്കിൾ 164 പ്രകാരം, നിയമസഭയിൽ ഭൂരിപക്ഷമുള്ള പാർട്ടിയുടെ നേതാവിനെയാണ് ഗവർണർ മുഖ്യമന്ത്രിയായി നിയമിക്കുന്നത്. സഭയുടെ ഭൂരിപക്ഷം ഉള്ളിടത്തോളം കാലം മാത്രമേ ഒരു മുഖ്യമന്ത്രിക്ക് അധികാരത്തിൽ തുടരാൻ നിയമപരമായി സാധിക്കൂ. നിലവിലെ സാഹചര്യത്തിൽ ബിജെപി കേവല ഭൂരിപക്ഷം മറികടന്നതോടെ മമതയുടെ നേതൃത്വത്തിലുള്ള സർക്കാരിന് സഭയിലെ വിശ്വാസം നഷ്ടപ്പെട്ടതായി കണക്കാക്കാം. ജനവിധി എതിരായ സാഹചര്യത്തിൽ മുഖ്യമന്ത്രി സ്വമേധയാ രാജിവെച്ച് പുതിയ സർക്കാരിന് വഴിമാറിക്കൊടുക്കുക എന്നതാണ് ജനാധിപത്യപരമായ മര്യാദയും കീഴ്വഴക്കവും.
മമത രാജിക്ക് തയ്യാറാകാത്ത പക്ഷം ഗവർണർക്ക് തന്റെ പ്രത്യേക അധികാരം ഉപയോഗിച്ച് സർക്കാരിനെ പിരിച്ചുവിടാനും ഏറ്റവും വലിയ ഒറ്റക്കക്ഷിയായ ബിജെപിയെ സർക്കാർ രൂപീകരിക്കാൻ ക്ഷണിക്കാനും സാധിക്കും. മുഖ്യമന്ത്രിക്ക് ഭൂരിപക്ഷം തെളിയിക്കാൻ കഴിയാത്ത പക്ഷം ഗവർണറുടെ ഈ തീരുമാനം അന്തിമമായിരിക്കും. വരും മണിക്കൂറുകളിൽ ബംഗാൾ രാജ്ഭവന്റെ നിലപാട് ഈ രാഷ്ട്രീയ നാടകത്തിൽ നിർണ്ണായകമാകും. അപ്രതീക്ഷിത നീക്കങ്ങളിലൂടെ ശ്രദ്ധേയയായ മമതയുടെ അടുത്ത ചുവടുവെപ്പ് എന്താകുമെന്ന ആകാംക്ഷയിലാണ് രാജ്യം.
