ഭാരതത്തിന്റെ മണ്ണിൽ ചോരപ്പുഴയൊഴുക്കിയ ഭീകരവാദികൾക്കും അവർക്ക് തണലൊരുക്കിയ പാകിസ്താനും നരേന്ദ്ര മോദി സർക്കാർ നൽകിയ ഉജ്ജ്വല പ്രഹരമായിരുന്നു ‘ഓപ്പറേഷൻ സിന്ദൂർ’. പഹൽഗാമിലെ ബൈസരൻ താഴ്വരയിൽ വിനോദസഞ്ചാരികളെ മതം തിരിച്ച് നിർത്തി 26 പേരെ വെടിവെച്ചുകൊന്ന പാക് ഭീകരതയ്ക്ക് പകരമായി ഭാരതം നടത്തിയ യുദ്ധത്തിന് ഇന്ന് ഒരു വർഷം തികയുന്നു. അതിർത്തി കടന്നുള്ള ഈ ആക്രമണത്തിൽ പാകിസ്താൻ വളർത്തിയെടുത്ത ഭീകരതാവളങ്ങൾ മാത്രമല്ല, അവരുടെ സൈനിക ആത്മവിശ്വാസം കൂടി തകർത്തെറിയപ്പെട്ടു. ആണവയുദ്ധമുണ്ടാകുമെന്ന് ലോകരാഷ്ട്രങ്ങൾ ഭയപ്പെട്ടെങ്കിലും, ലക്ഷ്യം കൃത്യമായി ഭേദിച്ച് ശത്രുവിനെ നിശബ്ദനാക്കിയ സൈനിക തന്ത്രമായിരുന്നു ഓപ്പറേഷൻ സിന്ദൂർ.
കഴിഞ്ഞ വർഷം ഏപ്രിൽ 22-നായിരുന്നു പഹൽഗാമിലെ ക്രൂരമായ കൂട്ടക്കൊല നടന്നത്. ഇതിന് പ്രത്യാഘാതമുണ്ടാകുമെന്ന് ഉറപ്പിച്ചു പറഞ്ഞ മോദി സർക്കാർ മെയ് 7-ന് തന്നെ തിരിച്ചടി തുടങ്ങി. സുഖോയ്-30 വിമാനത്തിൽ നിന്നും തൊടുത്ത ബ്രഹ്മോസ് മിസൈലുകളും റാഫേലിൽ നിന്നുള്ള സ്കാൽപ് മിസൈലുകളും പാകിസ്ഥാനിലെ ബഹാവൽപൂരിലുള്ള ജെയ്ഷെ മുഹമ്മദ് ആസ്ഥാനം തകർത്തു തരിപ്പണമാക്കി. ഇന്ത്യൻ അതിർത്തിക്കുള്ളിൽ നിന്നുതന്നെ ശത്രുവിന്റെ നെഞ്ചിലേക്ക് മിസൈലുകൾ പറന്നെത്തി. ലഷ്കർ ഇ തോയ്ബയുടെ മുറിദ്കെ ആസ്ഥാനവും ഇസ്രായേൽ നിർമ്മിത ക്രിസ്റ്റൽ മേസ് മിസൈലുകൾ ഉപയോഗിച്ച് ഭാരതം ചാമ്പലാക്കി. മെയ് 10-ന് പുലർച്ചെ റാവൽപിണ്ടിയിലെ ചക് ലാല വ്യോമതാവളത്തിന് നേരെ നടത്തിയ ബ്രഹ്മോസ് ആക്രമണം പാക് വ്യോമസേനയെ അന്ധരാക്കി മാറ്റി. പാകിസ്ഥാന്റെ നോർത്തേൺ എയർ കമാൻഡിന്റെ കമ്മ്യൂണിക്കേഷൻ ശൃംഖല പൂർണ്ണമായും തകർന്നു. 11 തവണയാണ് ഭാരതം ബ്രഹ്മോസ് പ്രയോഗിച്ചത്. 11 പാക് വ്യോമതാവളങ്ങൾ തകരുകയും ഏഴോളം പാക് വിമാനങ്ങൾ നിലത്തുതന്നെ കത്തിയമരുകയും ചെയ്തു.
ഈ യുദ്ധം നിർത്തിയത് താനാണെന്ന് അമേരിക്കൻ മുൻ പ്രസിഡന്റ് ഡൊണാൾഡ് ട്രംപ് അവകാശപ്പെട്ടെങ്കിലും യഥാർത്ഥത്തിൽ പാകിസ്ഥാൻ ഭാരതത്തിന് മുന്നിൽ അപേക്ഷയുമായി വരികയായിരുന്നു. മെയ് 9-ന് അമേരിക്കൻ വൈസ് പ്രസിഡന്റ് ജെ.ഡി വാൻസ് പ്രധാനമന്ത്രി മോദിയെ വിളിച്ച് പാക് തിരിച്ചടിയെക്കുറിച്ച് മുന്നറിയിപ്പ് നൽകിയപ്പോൾ, ‘വെടിയുണ്ടയ്ക്ക് ബോംബ് കൊണ്ടായിരിക്കും മറുപടി’ എന്നായിരുന്നു മോദിയുടെ കർക്കശമായ പ്രതികരണം. ഒടുവിൽ ഗത്യന്തരമില്ലാതെ പാക് ഡിജിഎംഒ ഭാരതത്തിന്റെ ഡിജിഎംഒയെ വിളിച്ച് വെടിനിർത്തലിന് അപേക്ഷിച്ചു. പാകിസ്ഥാന്റെ നുണപ്രചരണങ്ങളെ തകർത്ത് ഭാരതത്തിന്റെ എസ്-400 പ്രതിരോധ സംവിധാനം ഇന്നും സുരക്ഷിതമായി തുടരുന്നു. പാക് അതിർത്തിക്കുള്ളിൽ 10 കിലോമീറ്റർ വരെ ഒഴിഞ്ഞുപോകാമെന്നേറ്റ പാകിസ്ഥാന് ഭാരതത്തിന്റെ സൈനിക കരുത്തിന് മുന്നിൽ കീഴടങ്ങേണ്ടി വന്നു. ഇത് കേവലം ഒരു തിരിച്ചടിയല്ല, മറിച്ച് പുതിയ ഭാരതത്തിന്റെ നിശ്ചയദാർഢ്യത്തിന്റെ പ്രതീകമാണ്. ഓരോ തുള്ളി രക്തത്തിനും പലിശ സഹിതം തിരിച്ചടി നൽകുന്ന മോദി സർക്കാരിന്റെ കരുത്താണ് ഓപ്പറേഷൻ സിന്ദൂർ ലോകത്തിന് കാണിച്ചു കൊടുത്തത്.
