2026-ലെ ഐപിഎല്ലിൽ തകർപ്പൻ ഫോമിൽ തുടരുന്ന ചെന്നൈ സൂപ്പർ കിംഗ്സ് താരം സഞ്ജു സാംസണിന് ഫിറ്റ്നസ് മെച്ചപ്പെടുത്താൻ ഉപദേശവുമായി മുൻ ഇന്ത്യൻ താരം സഞ്ജയ് മഞ്ജരേക്കർ. സഞ്ജു നിലവിൽ ഏറ്റവും മികച്ച ശാരീരികക്ഷമതയിലല്ലെന്നും കരിയർ ദീർഘകാലം മുന്നോട്ട് കൊണ്ടുപോകാൻ വിരാട് കോഹ്ലിയുടെ പാത പിന്തുടരണമെന്നും അദ്ദേഹം പറഞ്ഞു.
സ്പോർട്സ്റ്റാറിന്റെ ‘ഇൻസൈറ്റ് എഡ്ജ്’ (Insight Edge) പോഡ്കാസ്റ്റിൽ സംസാരിക്കവെയാണ് മഞ്ജരേക്കർ തന്റെ അഭിപ്രായം പങ്കുവെച്ചത്. സൂര്യകുമാർ യാദവിന്റെ ഫോമില്ലായ്മയെക്കുറിച്ച് സംസാരിക്കവെയാണ് അദ്ദേഹം സഞ്ജുവിനെക്കുറിച്ചും പരാമർശിച്ചത്. “സഞ്ജു സാംസണിനെക്കുറിച്ചും എനിക്ക് ഇതാണ് പറയാനുള്ളത്. അദ്ദേഹത്തിന് ഇപ്പോൾ 25 വയസ്സല്ല പ്രായം. കൈവരിച്ച നേട്ടങ്ങൾ നിലനിർത്താൻ ശാരീരികക്ഷമത അത്യാവശ്യമാണ്. സഞ്ജു നിലവിൽ മികച്ച ശാരീരികക്ഷമതയിലാണെന്ന് എനിക്ക് തോന്നുന്നില്ല,” മഞ്ജരേക്കർ പറഞ്ഞു. വിരാട് കോഹ്ലിയുടെ നീണ്ട കരിയറിന് പിന്നിലെ രഹസ്യം അദ്ദേഹം ഫിറ്റ്നസിന് നൽകുന്ന പ്രാധാന്യമാണെന്നും ശരീരം ചതിക്കാതിരിക്കാൻ സഞ്ജു ഇത് ശ്രദ്ധിക്കണമെന്നും അദ്ദേഹം കൂട്ടിച്ചേർത്തു.
ഫിറ്റ്നസിനെക്കുറിച്ച് വിമർശനങ്ങൾ ഉയരുമ്പോഴും 2026 സഞ്ജുവിനെ സംബന്ധിച്ചിടത്തോളം സമാനതകളില്ലാത്ത വർഷമാണ്. 2026-ലെ ടി20 ലോകകപ്പിൽ ഇന്ത്യ കിരീടം നേടിയപ്പോൾ ടൂർണമെന്റിലെ താരമായി തിരഞ്ഞെടുക്കപ്പെട്ടത് സഞ്ജുവാണ്. ചെന്നൈ സൂപ്പർ കിംഗ്സിനായി കളിച്ചു തുടങ്ങിയ സഞ്ജു ആദ്യ മത്സരങ്ങളിൽ തന്നെ രണ്ട് സെഞ്ചുറികൾ നേടിയിരുന്നു.
ചൊവ്വാഴ്ച രാത്രി ഡൽഹി ക്യാപിറ്റൽസിനെതിരെ നടന്ന മത്സരത്തിൽ സഞ്ജുവിന്റെ തകർപ്പൻ പ്രകടനമാണ് സിഎസ്കെയ്ക്ക് വിജയം സമ്മാനിച്ചത്. ഡൽഹി ഉയർത്തിയ 155 റൺസ് ലക്ഷ്യം 8 വിക്കറ്റ് ബാക്കിനിൽക്കെ ചെന്നൈ മറികടന്നു. 87 റൺസുമായി പുറത്താകാതെ നിന്ന സഞ്ജു ടീമിനെ വിജയത്തിലേക്ക് നയിച്ചു. ഈ പ്രകടനത്തോടെ ഓറഞ്ച് ക്യാപ് പട്ടികയിൽ ആദ്യ അഞ്ചിൽ സഞ്ജു ഇടംപിടിച്ചു (10 മത്സരങ്ങളിൽ നിന്ന് 402 റൺസ്). സഞ്ജുവും കാർത്തിക് ശർമ്മയും (41*) ചേർന്ന് പിരിയാത്ത 114 റൺസിന്റെ കൂട്ടുകെട്ടാണ് പടുത്തുയർത്തിയത്.
ആദ്യ ബാറ്റ് ചെയ്ത ഡൽഹി 20 ഓവറിൽ 155/7 റൺസാണ് നേടിയത്. സിഎസ്കെയ്ക്ക് വേണ്ടി നൂർ അഹമ്മദ് രണ്ട് വിക്കറ്റുകൾ വീഴ്ത്തി. 15 പന്തുകൾ ബാക്കിനിൽക്കെയാണ് ചെന്നൈ സീസണിലെ അഞ്ചാം വിജയം സ്വന്തമാക്കിയത്.
