ചെന്നൈ : തമിഴ്നാട് മുഖ്യമന്ത്രിയുടെ ഓഫീസിലെ ഓഫീസർ ഓൺ സ്പെഷ്യൽ ഡ്യൂട്ടി ആയി റിക്കി രാധൻ പണ്ഡിറ്റ് വെട്രിവേലിനെ നിയമിച്ചു. മുഖ്യമന്ത്രി സി. ജോസഫ് വിജയ്യുടെ വിശ്വസ്തനും പ്രശസ്ത ജ്യോതിഷിയുമാണ് അദ്ദേഹം. ഇനി മുഖ്യമന്ത്രിയോടൊപ്പം പ്രത്യേക ഉപദേശകനായി അദ്ദേഹത്തിന്റെ ഓഫീസിൽ റിക്കി രാധൻ പണ്ഡിറ്റ് വെട്രിവേൽ ഉണ്ടായിരിക്കുന്നതാണ്.
വിജയിന്റെ രാഷ്ട്രീയ പ്രവേശന സമയം, പാർട്ടിയുടെ പേര്, സത്യപ്രതിജ്ഞാ ചടങ്ങിന്റെ മുഹൂർത്തം തുടങ്ങിയവ നിശ്ചയിക്കുന്നതിൽ രാധൻ പണ്ഡിറ്റ് നിർണ്ണായക പങ്ക് വഹിച്ചിട്ടുണ്ട്. പാർട്ടിയുടെ പേര് (TVK) വിജയിന്റെ ജന്മനക്ഷത്രത്തിനും സംഖ്യാശാസ്ത്രത്തിനും അനുയോജ്യമായ രീതിയിൽ ക്രമീകരിച്ചതും അദ്ദേഹത്തിന്റെ നിർദ്ദേശപ്രകാരമായിരുന്നു.
തിരഞ്ഞെടുപ്പ് ഫലം വരുന്നതിന് മുൻപേ തമിഴ്നാട്ടിൽ വിജയ് തരംഗമുണ്ടാകുമെന്നും ടിവികെ സഖ്യം 150-ലേറെ സീറ്റുകൾ നേടി ഭരണം പിടിക്കുമെന്നും പ്രവചിച്ച വ്യക്തിയാണ് രാധൻ പണ്ഡിറ്റ്. തമിഴക വെട്രി കഴകത്തിന്റെ വക്താവ് കൂടിയാണ് അദ്ദേഹം. വിജയ് രാഷ്ട്രീയ പാർട്ടിയായ ടിവികെ രൂപീകരിച്ചത് മുതൽ രാധൻ പണ്ഡിറ്റ് അദ്ദേഹത്തിനൊപ്പമുണ്ട്. നിലവിൽ മുഖ്യമന്ത്രിയുടെ രാഷ്ട്രീയ കാര്യങ്ങൾ ഏകോപിപ്പിക്കുക, ലെയ്സൺ വർക്കുകൾ കൈകാര്യം ചെയ്യുക, മുഖ്യമന്ത്രിയുടെ ഓഫീസ് നേരിട്ട് നൽകുന്ന പ്രത്യേക അസൈൻമെന്റുകൾ പൂർത്തിയാക്കുക എന്നിവയാണ് ഓഫീസർ ഓൺ സ്പെഷ്യൽ ഡ്യൂട്ടിയുടെ ചുമതല.
