എവിടെ ചെന്നാലും ആയിരങ്ങൾ തടിച്ചുകൂടുന്ന, ഒരു നോക്ക് കാണാൻ ആരാധകർ ആവേശത്തോടെ കാത്തുനിൽക്കുന്ന ഇന്ത്യയുടെ ഒരേയൊരു സൂപ്പർസ്റ്റാർ രജനികാന്ത്. എന്നാൽ തന്റെ പ്രശസ്തിയും അഹങ്കാരവും പൂർണ്ണമായും തകർന്നുപോയ ഒരു അനുഭവത്തെക്കുറിച്ച് തുറന്നുപറഞ്ഞിരിക്കുകയാണ് താരം. ‘ആർട്ട് ഓഫ് ലിവിംഗ്’ ഫൗണ്ടേഷൻ്റെ 45-ാം വാർഷികത്തിലും ശ്രീ ശ്രീ രവിശങ്കറിൻ്റെ 70-ാം ജന്മദിനത്തോടനുബന്ധിച്ചും നടന്ന ചടങ്ങിലാണ് രജനി തന്റെ ജീവിതത്തിലെ ആ മറക്കാനാവാത്ത അനുഭവം പങ്കുവെച്ചത്. ആത്മീയതയുടെ കരുത്ത് ബോധ്യപ്പെട്ട നിമിഷമായിരുന്നു അതെന്ന് അദ്ദേഹം പറഞ്ഞു.
ബെംഗളൂരുവിലെ ആർട്ട് ഓഫ് ലിവിംഗ് ഇൻ്റർനാഷണൽ സെൻ്ററിൽ നടന്ന സന്ദർശനത്തിനിടെയാണ് സംഭവം. ആശ്രമം ചുറ്റിക്കാണാൻ ശ്രീ ശ്രീ രവിശങ്കർ രജനികാന്തിനെ ക്ഷണിച്ചു. എന്നാൽ താൻ കൂടെ വന്നാൽ ആരാധകർ തടിച്ചുകൂടുമെന്നും അത് ഗുരുദേവന് ബുദ്ധിമുട്ടാകുമെന്നും രജനി പറഞ്ഞു. എന്നാൽ “ഒരു കുഴപ്പവുമില്ല, കൂടെ വരൂ” എന്നായിരുന്നു അദ്ദേഹത്തിൻ്റെ മറുപടി. ആശ്രമത്തിൽ ആയിരക്കണക്കിന് ആളുകൾ ഉണ്ടായിരുന്നു. തമിഴ്നാട്ടിൽ നിന്നുള്ളവർ പോലും ആ കൂട്ടത്തിലുണ്ടായിരുന്നു. പുറത്തിറങ്ങിയാൽ ആളുകൾ തന്റെ പേര് വിളിച്ച് കൂവുമെന്നും ഫോട്ടോയ്ക്കും ഓട്ടോഗ്രാഫിനുമായി ബഹളം വെക്കുമെന്നുമാണ് താൻ കരുതിയതെന്ന് രജനി പറയുന്നു. എന്നാൽ നടന്നത് മറ്റൊന്നായിരുന്നു.
“സത്യം പറഞ്ഞാൽ ഒരാൾ പോലും എന്നെ നോക്കിയില്ല. ഫോട്ടോയും ഓട്ടോഗ്രാഫും പോയിട്ട് ആരും മിണ്ടാൻ പോലും വന്നില്ല. ഞാൻ എല്ലാവരെയും നോക്കി കൈവീശി കാണിച്ചു, എന്നിട്ടും ആരും ശ്രദ്ധിച്ചില്ല. നിരവധി രാഷ്ട്രീയക്കാരെയും വ്യവസായ പ്രമുഖരെയും ഞാൻ കണ്ടിട്ടുണ്ട്, പക്ഷേ ഈ സംഭവം എന്റെ അഹങ്കാരത്തെ (Ego) പൂർണ്ണമായും തകർത്തു കളഞ്ഞു”- രജനികാന്ത് വെളിപ്പെടുത്തി. “ഇവിടെ ഒരു ബുദ്ധിമുട്ടും ഉണ്ടാവില്ല” എന്ന് ശ്രീ ശ്രീ രവിശങ്കർ പറഞ്ഞപ്പോൾ, “ഇവിടെ ബുദ്ധിമുട്ടായി” എന്ന് തന്റെ തലയ്ക്ക് നേരെ കൈ ചൂണ്ടി രജനി തമാശരൂപേണ മറുപടി നൽകി. തന്നെ ആരും തിരിച്ചറിയാതിരുന്നപ്പോൾ ഉണ്ടായ മാനസികാവസ്ഥയായിരുന്നു അദ്ദേഹം സൂചിപ്പിച്ചത്.
ലോകാരാധ്യനായ താരം തനിക്ക് നേരിട്ട ഈ അനുഭവം ഒരു ചിരിയോടെ പങ്കുവെച്ചപ്പോൾ സദസ്സും അത് കൈയടികളോടെയാണ് സ്വീകരിച്ചത്. ലോകേഷിന്റെ ‘കൂലി’ എന്ന ചിത്രത്തിന് ശേഷം നെൽസൺ ദിലീപ്കുമാർ സംവിധാനം ചെയ്യുന്ന ‘ജയിലർ 2’ ആണ് ആരാധകർ കാത്തിരിക്കുന്ന രജനിയുടെ അടുത്ത ചിത്രം. ജൂൺ 12-ന് റിലീസ് ചെയ്യുന്ന ചിത്രത്തിൽ വിദ്യ ബാലൻ, സുരാജ് വെഞ്ഞാറമൂട് തുടങ്ങിയ വൻ താരനിര അണിനിരക്കുന്നുണ്ട്. മോഹൻലാൽ, വിജയ് സേതുപതി എന്നിവരുടെ അതിഥി വേഷങ്ങളും ചിത്രത്തിലുണ്ടാകുമെന്നാണ് റിപ്പോർട്ടുകൾ. കമൽഹാസനൊപ്പം അഭിനയിക്കുന്ന മറ്റൊരു വമ്പൻ പ്രോജക്റ്റും രജനിയുടേതായി അണിയറയിൽ ഒരുങ്ങുന്നുണ്ട്.
