40 സി.ആർ.പി.എഫ് ജവാന്മാരുടെ ജീവനെടുത്ത, ഭാരതത്തെ ഒന്നടങ്കം നടുക്കിയ 2019-ലെ പുൽവാമ ഭീകരാക്രമണത്തിന്റെ പ്രധാന ഗൂഢാലോചനക്കാരിലൊരാളായ ഹംസ ബുർഹാൻ പാക് അധീന കശ്മീരിൽ വെടിയേറ്റു മരിച്ചു. മുസാഫറാബാദിൽ വെച്ച് അജ്ഞാതരായ തോക്കുധാരികൾ നടത്തിയ വെടിവെയ്പ്പിലാണ് ഇയാൾ കൊല്ലപ്പെട്ടത്.
പാക് അധീന കശ്മീരിലെ മുസാഫറാബാദിൽ വെച്ച് അജ്ഞാതരായ അക്രമികൾ ഹംസ ബുർഹാന് നേരെ തുരുതുരാ വെടിയുതിർക്കുകയായിരുന്നു. ശരീരത്തിൽ നിരവധി ബുള്ളറ്റുകൾ തറച്ചുകയറിയ ഭീകരൻ സംഭവസ്ഥലത്തുതന്നെ ഒടുങ്ങി. ആക്രമണത്തിന് ശേഷം പ്രതികൾ സുരക്ഷിതമായി രക്ഷപ്പെട്ടു. സംഭവത്തെക്കുറിച്ച് വിശദമായ വിവരങ്ങൾ പുറത്തുവിടാൻ പാകിസ്താൻ അധികൃതർ ഇതുവരെ തയ്യാറായിട്ടില്ല.
‘അർജുമന്ദ് ഗുൽസാർ ദാർ’, ‘ഡോക്ടർ’ എന്നീ പേരുകളിൽ അറിയപ്പെട്ടിരുന്ന ഹംസ ബുർഹാൻ ജമ്മു കശ്മീരിലെ പുൽവാമ ജില്ലയിലുള്ള രത്നിപോര സ്വദേശിയാണ്. നിരോധിത ഭീകരസംഘടനയായ ‘അൽ ബദറുമായി’ ചേർന്നാണ് ഇയാൾ പ്രവർത്തിച്ചിരുന്നത്. പാകിസ്താൻ കേന്ദ്രീകരിച്ച് പ്രവർത്തിക്കുന്ന തീവ്രവാദ ശൃംഖലകളുമായി ചേർന്ന് കശ്മീരിൽ യുവാക്കളെ റിക്രൂട്ട് ചെയ്യുന്നതിലും ഭീകരാക്രമണങ്ങൾ ആസൂത്രണം ചെയ്യുന്നതിലും ഇയാൾ പ്രധാന പങ്കുവഹിച്ചു. ഇതേത്തുടർന്ന് 2022-ൽ കേന്ദ്ര ആഭ്യന്തര മന്ത്രാലയം നിയമവിരുദ്ധ പ്രവർത്തനങ്ങൾ തടയൽ നിയമപ്രകാരം ഇയാളെ ഔദ്യോഗികമായി ഭീകരനായി പ്രഖ്യാപിച്ചിരുന്നു.
2019 ഫെബ്രുവരി 14-ന് ജമ്മു-ശ്രീനഗർ ദേശീയ പാതയിൽ ലെത്പോരയ്ക്ക് സമീപം സി.ആർ.പി.എഫ് വാഹനവ്യൂഹത്തിന് നേരെ നടന്ന ആത്മഹത്യാ സ്ഫോടനത്തിന്റെ പ്രധാന ഗൂഢാലോചനക്കാരിലൊരാളായാണ് അന്വേഷണ ഏജൻസികൾ ഹംസ ബുർഹാനെ അടയാളപ്പെടുത്തിയിരിക്കുന്നത്. ജെയ്ഷെ മുഹമ്മദ് ഭീകരനായ ആദിൽ അഹമ്മദ് ദാർ സ്ഫോടകവസ്തുക്കൾ നിറഞ്ഞ വാഹനം സൈനിക വ്യൂഹത്തിലേക്ക് ഇടിച്ചുകയറ്റുകയായിരുന്നു.
40 ജവാന്മാർ വീരമൃത്യു വരിച്ച ഈ ആക്രമണം ഇന്ത്യയും പാകിസ്താനും തമ്മിൽ കടുത്ത നയതന്ത്ര-സൈനിക യുദ്ധസാഹചര്യങ്ങൾക്ക് കാരണമായിരുന്നു. ഇന്ത്യ തിരയുന്ന ഏറ്റവും ക്രൂരരായ ഭീകരർ പാകിസ്താന്റെ മണ്ണിൽ വെച്ച് തന്നെ ‘അജ്ഞാതരാൽ’ ഒന്നൊന്നായി വേട്ടയാടപ്പെടുന്ന പരമ്പരയിലെ ഏറ്റവും ഒടുവിലത്തെ സുപ്രധാന നീക്കമായാണ് പ്രതിരോധ നിരീക്ഷകർ ഈ കൊലപാതകത്തെ വിലയിരുത്തുന്നത്.
