ഉത്തർപ്രദേശ് ഉപമുഖ്യമന്ത്രി കേശവ് പ്രസാദ് മൗര്യ കോൺഗ്രസ് നേതാവ് രാഹുൽ ഗാന്ധിക്കെതിരെ രൂക്ഷമായ വിമർശനവുമായി രംഗത്ത്. കളിപ്പാട്ടം ലഭിക്കാത്തപ്പോൾ അത് തകർക്കാൻ ശ്രമിക്കുന്ന കുട്ടിയുടെ മനോനിലയാണ് രാഹുൽ ഗാന്ധിക്കെന്ന് മൗര്യ പരിഹസിച്ചു. പ്രധാനമന്ത്രി നരേന്ദ്ര മോദിക്കെതിരെ രാഹുൽ ഗാന്ധി നടത്തുന്ന പരാമർശങ്ങൾക്കെതിരെയാണ് ബി.ജെ.പി നേതാക്കളുടെ കടുത്ത പ്രതികരണം.
തുടർച്ചയായി 12 വർഷം ജനങ്ങളുടെ വിശ്വാസം നേടുന്നതിൽ പരാജയപ്പെട്ട രാഹുൽ ഗാന്ധി, ‘വിദേശ ടൂൾകിറ്റ് ഗ്യാങ്ങിന്റെ’ സഹായത്തോടെ രാജ്യത്ത് അരാജകത്വം സൃഷ്ടിക്കാൻ ശ്രമിക്കുകയാണെന്ന് മൗര്യ ആരോപിച്ചു. സമൂഹമാധ്യമങ്ങളിലൂടെയാണ് അദ്ദേഹം രാഹുൽ ഗാന്ധിക്കെതിരെ ആഞ്ഞടിച്ചത്.
“ജനങ്ങളുടെ പ്രതീക്ഷയുടെയും വിശ്വാസത്തിന്റെയും പര്യായമാണ് നരേന്ദ്ര മോദി. അദ്ദേഹത്തിന് പകരം വെയ്ക്കാൻ മറ്റൊരു നേതാവില്ല. ഇത് കോൺഗ്രസ് മടിക്കാതെ അംഗീകരിക്കണം. കളിപ്പാട്ടം കിട്ടാത്തപ്പോൾ അത് പൊട്ടിക്കാൻ ശ്രമിക്കുന്ന കുട്ടിയെപ്പോലെയാണ് രാഹുൽ ഗാന്ധിയുടെ ഇപ്പോഴത്തെ അവസ്ഥ.”
അതേസമയം, ബി.ജെ.പി ദേശീയ വക്താവ് ഗൗരവ് ഭാട്ടിയയും രാഹുൽ ഗാന്ധിക്കെതിരെ കടുത്ത ഭാഷയിൽ പ്രതികരിച്ചു. രാഹുൽ ഗാന്ധി ‘വിഡ്ഢിയും അരാജകവാദിയുമാണെന്ന്’ അദ്ദേഹം പറഞ്ഞു. ഇന്ധനവില വർദ്ധനവിനെക്കുറിച്ച് രാഹുൽ ഗാന്ധി നടത്തിയ പ്രസ്താവനകളെ പരാമർശിച്ചുകൊണ്ട് ഗൗരവ് ഭാട്ടിയ പറഞ്ഞു: “രാജ്യത്ത് അരാജകത്വം പരത്താനാണ് നിങ്ങളുടെ ഉദ്ദേശ്യമെങ്കിൽ, ഇന്ത്യയെ കൂടുതൽ ശക്തമാക്കാനാണ് ഞങ്ങൾ ദൃഢനിശ്ചയം എടുത്തിരിക്കുന്നത്.”
രാജ്യത്തെ ദുർബലപ്പെടുത്താനുള്ള ശ്രമമാണ് പ്രതിപക്ഷ നേതാവിന്റെ ഭാഗത്ത് നിന്നും ഉണ്ടാകുന്നതെന്നും ബി.ജെ.പി വക്താവ് ആരോപിച്ചു.
