ഉത്തർപ്രദേശിൽ മുപ്പതുകാരനായ ഹിന്ദു യുവാവിനെ നിർബന്ധിത മതപരിവർത്തനത്തിന് ഇരയാക്കി വ്യാജരേഖകളിലൂടെ നിക്കാഹ് നടത്തിയ സംഭവത്തിൽ ജിം ട്രെയിനറായ യുവതിയും പിതാവും അറസ്റ്റിൽ. യുപിയിലെ ഷാംലി ജില്ലയിലാണ് രാജ്യവ്യാപകമായി ചർച്ചയാകുന്ന ഈ ഞെട്ടിക്കുന്ന സംഭവം അരങ്ങേറിയത്. ചാന്ദ്നി ഖുറേഷി, ഇവരുടെ പിതാവ് ഇസ്ലാം ഖുറേഷി എന്നിവരെയാണ് ഷാംലി പോലീസ് അടിയന്തിരമായി അറസ്റ്റ് ചെയ്തത്. പ്രമുഖ മരുന്ന് വ്യാപാരിയായ ദേവരാജ് മാലിക് നൽകിയ പരാതിയുടെ അടിസ്ഥാനത്തിലാണ് പോലീസ് കടുത്ത നടപടികളിലേക്ക് കടന്നത്. തന്റെ മകൻ ആയുഷ് മാലിക്കിനെ ചതിയിലൂടെയും ഭീഷണിയിലൂടെയും ഇസ്ലാം മതത്തിലേക്ക് പരിവർത്തനം ചെയ്യുകയായിരുന്നുവെന്ന് പിതാവ് പരാതിയിൽ വ്യക്തമാക്കുന്നു.
റിപ്പോർട്ടുകൾ പ്രകാരം, ആയുഷ് മാലിക്കിന്റെ ഫിസിയോതെറാപ്പിസ്റ്റും ജിം ട്രെയിനറുമായി ജോലി ചെയ്യുകയായിരുന്നു ചാന്ദ്നി ഖുറേഷി. ഈ കാലയളവിൽ ഇവർ ആയുഷുമായി മനഃപൂർവ്വം സൗഹൃദം സ്ഥാപിക്കുകയും പിന്നീട് പ്രണയക്കണിയിൽ വീഴ്ത്തുകയുമായിരുന്നു. പ്രണയം ശക്തമായതോടെ വിവാഹ വാഗ്ദാനം നൽകി ആയുഷിനെ മതം മാറാൻ യുവതിയും കുടുംബവും നിരന്തരം സ്വാധീനിച്ചു. തുടർന്ന് യുവാവിനെ രഹസ്യമായി ഡൽഹിയിലേക്ക് കടത്തുകയും, അവിടെവെച്ച് ആയുഷിന്റെ പേര് മാറ്റാൻ ആവശ്യമായ വ്യാജരേഖകൾ ചമച്ച് നിർബന്ധിത നിക്കാഹ് നടത്തുകയുമായിരുന്നുവെന്ന് പോലീസ് അന്വേഷണത്തിൽ കണ്ടെത്തിയിട്ടുണ്ട്.
യുവാവിനെ പെൺകുട്ടിയുടെ കുടുംബം തടങ്കലിൽ വെച്ച് ഭീഷണിപ്പെടുത്തുന്നതായും പണം തട്ടിയെടുക്കാൻ ശ്രമിക്കുന്നതായും പിതാവ് പരാതിപ്പെട്ടതോടെയാണ് പോലീസ് രംഗത്തിറങ്ങിയത്. സംഭവത്തിൽ ഒരു മുസ്ലിം മൗലവി ഉൾപ്പെടെ ഒമ്പത് പേർക്കെതിരെയാണ് പോലീസ് നിലവിൽ എഫ്ഐആർ രജിസ്റ്റർ ചെയ്തിരിക്കുന്നത്. പ്രതികൾക്കെതിരെ ഭാരതീയ ന്യായ സംഹിതയിലെ (BNS) വഞ്ചന, വ്യാജരേഖ ചമയ്ക്കൽ, പിടിച്ചുപറി, ക്രിമിനൽ ഭീഷണിപ്പെടുത്തൽ തുടങ്ങിയ കടുത്ത വകുപ്പുകളാണ് ചുമത്തിയിട്ടുള്ളതെന്ന് ഷാംലി പോലീസ് സൂപ്രണ്ട് (SP) എൻ പി സിംഗ് മാധ്യമങ്ങളോട് പറഞ്ഞു.
ഇതിനുപുറമെ, ഉത്തർപ്രദേശിലെ അതീവ കർശനമായ നിയമവിരുദ്ധ മതപരിവർത്തന നിരോധന നിയമത്തിലെ (Anti-Conversion Law) വിവിധ വകുപ്പുകളും പ്രതികൾക്കെതിരെ ചുമത്തിയിട്ടുണ്ട്. ഉത്തർപ്രദേശിൽ നിർബന്ധിതവും വ്യാജവുമായ മതപരിവർത്തനങ്ങൾക്കെതിരെ യോഗി ആദിത്യനാഥ് സർക്കാർ കർശന നിലപാട് സ്വീകരിക്കുന്ന സാഹചര്യത്തിൽ ഈ അറസ്റ്റ് വലിയ രാഷ്ട്രീയ-സാമൂഹിക പ്രാധാന്യത്തോടെയാണ് ജനങ്ങൾ കാണുന്നത്. ഒളിവിൽ പോയ മൗലവി ഉൾപ്പെടെയുള്ള മറ്റ് ഏഴ് പ്രതികൾക്കായി പോലീസ് തെരച്ചിൽ ഊർജ്ജിതമാക്കി. പ്രതികൾക്ക് അന്തർസംസ്ഥാന മതപരിവർത്തന റാക്കറ്റുകളുമായി ബന്ധമുണ്ടോയെന്നും പോലീസ് അന്വേഷിക്കുന്നുണ്ട്.
