ഒരുപക്ഷേ ക്രിക്കറ്റ് മൈതാനം കണ്ടതിൽ വെച്ച് ഏറ്റവും നാടകീയവും കായിക സംസ്കാരത്തിന് നിരക്കാത്തതുമായ ഒരു സംഭവം അരങ്ങേറിയത് 2010 ഓഗസ്റ്റ് 16-നായിരുന്നു. ദാംബുള്ളയിൽ ഇന്ത്യയും ശ്രീലങ്കയും തമ്മിൽ നടന്ന ത്രിരാഷ്ട്ര ഏകദിന പരമ്പരയിലെ ആ മത്സരം ഇന്നും ആരാധകരുടെ മനസ്സിൽ ഒരു കനലായി അവശേഷിക്കുന്നുണ്ട്. ഇന്ത്യൻ താരം വിരേന്ദർ സെവാഗിന് അർഹിച്ച സെഞ്ച്വറി നിഷേധിക്കാൻ ശ്രീലങ്കൻ സ്പിന്നർ സൂരജ് രൺദീവ് മനഃപൂർവ്വം എറിഞ്ഞ ഒരു ‘നോ-ബോൾ’ ആയിരുന്നു ആ വിവാദങ്ങൾക്ക് കാരണം.
ശ്രീലങ്ക ഉയർത്തിയ 171 റൺസ് എന്ന ചെറിയ വിജയലക്ഷ്യം പിന്തുടരുകയായിരുന്നു ഇന്ത്യ. കളി അതിന്റെ അവസാന നിമിഷത്തിലേക്ക് എത്തിയപ്പോൾ സ്കോറുകൾ തുല്യമായി. ഇന്ത്യക്ക് ജയിക്കാൻ വെറും 1 റൺസ് മാത്രം മതി. മറുഭാഗത്ത് ഇന്ത്യൻ സിംഹം വിരേന്ദർ സെവാഗ് 99 റൺസോടെ ക്രീസിലുണ്ട്. ഒരു റൺസ് എടുത്താൽ ഇന്ത്യ ജയിക്കും, ഒപ്പം സെവാഗിന് സെഞ്ച്വറിയും തികയ്ക്കാം.
പന്തെറിയാൻ എത്തിയത് ശ്രീലങ്കയുടെ സ്പിന്നർ സൂരജ് രൺദീവ്. എന്നാൽ ക്രിക്കറ്റ് ലോകത്തെ അപ്പാടെ ഞെട്ടിച്ചുകൊണ്ട്, രൺദീവ് ക്രീസിന് വളരെ മുന്നിലേക്ക് കാൽ വെച്ച് ഒരു ഭീമൻ നോ-ബോൾ എറിഞ്ഞു. ആ പന്ത് സെവാഗ് അതിമനോഹരമായി അതിർത്തി കടത്തി ഒരു സിക്സർ നേടി! സ്റ്റേഡിയം ആകെ ആവേശത്തിലായി. എന്നാൽ യഥാർത്ഥ ട്വിസ്റ്റ് അവിടെയായിരുന്നു. ക്രിക്കറ്റ് നിയമപ്രകാരം ഒരു നോ-ബോൾ എറിയുമ്പോൾ തന്നെ ബാറ്റിങ് ടീമിന് എക്സ്ട്രാ റൺ ലഭിക്കുകയും മത്സരം അവിടെ അവസാനിക്കുകയും ചെയ്യും. അതിനാൽ അമ്പയർ നോ-ബോൾ സിഗ്നൽ നൽകിയ നിമിഷം തന്നെ ഇന്ത്യ ജയിച്ചു കഴിഞ്ഞിരുന്നു. അതുകൊണ്ടുതന്നെ സെവാഗ് അടിച്ച സിക്സർ സ്കോർ ബോർഡിൽ കൂട്ടിയതേയില്ല. സെവാഗ് 99 റൺസുമായി പുറത്താകാതെ നിന്നു.
ത്സരത്തിന് പിന്നാലെ വൻ പ്രതിഷേധമാണ് ക്രിക്കറ്റ് ലോകത്ത് ഉയർന്നത്. ‘സ്പിരിറ്റ് ഓഫ് ക്രിക്കറ്റിന്’ വിരുദ്ധമായ ഈ പ്രവർത്തിക്ക് പിന്നിൽ വലിയൊരു ഗൂഢാലോചന നടന്നിട്ടുണ്ടെന്ന് അന്വേഷണത്തിൽ വ്യക്തമായി. സെവാഗിന് സെഞ്ച്വറി നൽകാതിരിക്കാൻ നോ-ബോൾ എറിയാൻ രൺദീവിനെ നിർബന്ധിച്ചതും ഉപദേശിച്ചതും ടീമിലെ മുതിർന്ന അംഗമായ തിലകരത്നെ ദിൽഷൻ ആണെന്ന് അന്വേഷണത്തിൽ തെളിഞ്ഞു.
സംഭവം വലിയ നാണക്കേടായതോടെ ശ്രീലങ്കൻ ക്യാപ്റ്റൻ കുമാർ സംഗക്കാരയും ശ്രീലങ്കൻ ക്രിക്കറ്റ് ബോർഡും (SLC) വിരേന്ദർ സെവാഗിനോടും ഇന്ത്യൻ ടീം മാനേജ്മെന്റിനോടും ഔദ്യോഗികമായി ക്ഷമ ചോദിച്ചു. ശ്രീലങ്കൻ ക്രിക്കറ്റ് ബോർഡ് ഇതിന്മേൽ ഔദ്യോഗിക അന്വേഷണം പ്രഖ്യാപിച്ചു. കുറ്റക്കാരനായ സ്പിന്നർ സൂരജ് രൺദീവിനെ ഒരു മത്സരത്തിൽ നിന്ന് സസ്പെൻഡ് ചെയ്യുകയും അദ്ദേഹത്തിന്റെ മാച്ച് ഫീ പൂർണ്ണമായും റദ്ദാക്കുകയും ചെയ്തു. രൺദീവിനെ ഇതിനായി പ്രേരിപ്പിച്ച തിലകരത്നെ ദിൽഷന് കനത്ത പിഴയും ചുമത്തി.
കൺമുന്നിൽ തന്റെ അർഹിച്ച സെഞ്ച്വറി നഷ്ടപ്പെട്ടിട്ടും വിരേന്ദർ സെവാഗ് ആ സാഹചര്യത്തെ വളരെ മാന്യമായാണ് കൈകാര്യം ചെയ്തത്. വിവാദങ്ങൾ കൂടുതൽ വഷളാക്കാൻ അദ്ദേഹം മുതിർന്നില്ലെങ്കിലും, ആ പ്രവർത്തി തികച്ചും ആസൂത്രിതമായിരുന്നുവെന്നും കായിക മര്യാദയ്ക്ക് നിരക്കാത്തതായിരുന്നുവെന്നും അദ്ദേഹം തുറന്നുപറഞ്ഞു. ക്രിക്കറ്റ് ചരിത്രമുള്ളിടത്തോളം കാലം ഈ സംഭവം ഒരു കറുത്ത ഓർമ്മയായി അവശേഷിക്കും എന്നതിൽ തർക്കമില്ല.
