മലയാള സിനിമയിലെ താരസംഘടനയായ ‘അമ്മ’യിൽ ഉടലെടുത്ത അസാധാരണ പ്രതിസന്ധികൾ കൂടുതൽ സങ്കീർണ്ണമാകുന്നു. ഭരണസമിതിയുടെ കൂട്ടരാജിക്കും നടി മല്ലികാ സുകുമാരന്റെ പടിയിറക്കത്തിനും പിന്നാലെ, സംഘടന നിയന്ത്രിക്കാൻ കഴിഞ്ഞ ദിവസം രൂപീകരിച്ച താൽക്കാലിക അഡ്ഹോക്ക് കമ്മിറ്റിയിലും ആദ്യ രാജി.
ഒമ്പതംഗ താൽക്കാലിക സമിതിയിൽ അംഗമായിരുന്ന നടി ആശ അരവിന്ദാണ് ഇപ്പോൾ രാജി പ്രഖ്യാപിച്ചിരിക്കുന്നത്. ഇതോടെ താരസംഘടനയ്ക്കുള്ളിലെ പോര് പുതിയ തലത്തിലേക്ക് നീങ്ങുകയാണ്. പ്രസിഡന്റ് ശ്വേതാ മേനോനും 17 അംഗ ഭരണസമിതിയും ഒന്നിച്ച് ഒഴിഞ്ഞതിന് പിന്നാലെ, സംഘടനയുടെ ദൈനംദിന കാര്യങ്ങൾ നിയന്ത്രിക്കാനാണ് ഒമ്പതംഗ അഡ്ഹോക്ക് കമ്മിറ്റി രൂപീകരിച്ചത്.
നടനും എം.എൽ.എയുമായ രമേഷ് പിഷാരടി കൺവീനറായ ഈ താൽക്കാലിക സമിതിയിൽ നിന്നുമാണ് നടി ആശ അരവിന്ദ് ഇപ്പോൾ അപ്രതീക്ഷിതമായി രാജിവെച്ചിരിക്കുന്നത്. ഔദ്യോഗിക വാട്സ് ആപ്പ് ഗ്രൂപ്പിലൂടെയാണ് ആശ തൻ്റെ രാജി വിവരം സഹപ്രവർത്തകരെ അറിയിച്ചത്. രാജിക്ക് പിന്നിലെ കൃത്യമായ കാരണം വ്യക്തമല്ലെങ്കിലും സംഘടനയ്ക്കുള്ളിൽ നിലനിൽക്കുന്ന കടുത്ത ആഭ്യന്തര ഭിന്നത തന്നെയാണ് ഇതിലേക്ക് നയിച്ചതെന്നാണ് സൂചന.
മുതിർന്ന നടൻ ജഗദീഷിന്റെ നേതൃത്വത്തിൽ നടന്ന ചർച്ചകൾക്കൊടുവിലാണ് സംഘടനയുടെ താൽക്കാലിക ചുമതലയ്ക്കായി ഒമ്പതംഗ സമിതി രൂപീകരിച്ചത്. രമേഷ് പിഷാരടിയെക്കൂടാതെ മുൻ മന്ത്രി കെ.ബി. ഗണേഷ് കുമാർ, കലാഭവൻ ഷാജോൺ, സാദിഖ്, സുരേഷ് കൃഷ്ണ, ദേവി ചന്ദന, കൃഷ്ണപ്രഭ, ഡോ. റോണി ഡേവിഡ് എന്നിവരാണ് കമ്മിറ്റിയിലെ മറ്റ് അംഗങ്ങൾ.
നാല് മാസമാണ് ഈ അഡ്ഹോക്ക് കമ്മിറ്റിയുടെ ഔദ്യോഗിക കാലാവധി. ഈ ചുരുങ്ങിയ കാലയളവിനുള്ളിൽ പുതിയ പൊതുതിരഞ്ഞെടുപ്പ് നടത്തി പുതിയൊരു ഭരണസമിതിയെ കണ്ടെത്തുക എന്നതാണ് താൽക്കാലിക സമിതിക്ക് മുന്നിലുള്ള പ്രധാന ലക്ഷ്യം. എന്നാൽ സമിതി രൂപീകരിച്ച് മണിക്കൂറുകൾക്കകം തന്നെ അംഗങ്ങൾക്കിടയിൽ നിന്നും രാജി ആരംഭിച്ചത് പുതിയ കൺവീനർ രമേഷ് പിഷാരടിക്കും മറ്റ് മുതിർന്ന അംഗങ്ങൾക്കും വലിയ തലവേദനയാണ് സൃഷ്ടിക്കുന്നത്. വരും ദിവസങ്ങളിൽ കൂടുതൽ നാടകീയ രംഗങ്ങൾക്ക് താരസംഘടന സാക്ഷ്യം വഹിച്ചേക്കും.
