തിരുവനന്തപുരം കോർപ്പറേഷൻ ഓഫീസിൽ എൽ.ഡി.എഫ് കൗൺസിലർമാർ നടത്തിയ പ്രതിഷേധം വലിയ സംഘർഷത്തിലും കയ്യാങ്കളിയിലും കലാശിച്ചു. ബി.ജെ.പി കൗൺസിലർ ആർ. സുഗതന്റെ രാജി ആവശ്യപ്പെട്ടും, ബി.ജെ.പി കൗൺസിലർമാരുടെ സത്യപ്രതിജ്ഞാ ചട്ട ലംഘനവുമായി ബന്ധപ്പെട്ട വിവാദങ്ങൾ ഉന്നയിച്ചുമാണ് എൽ.ഡി.എഫ് കൗൺസിലർമാർ മേയറുടെ ഓഫീസിന് മുന്നിൽ ഉപരോധം ഏർപ്പെടുത്തിയത്.
രാവിലെ മുതൽ കോർപ്പറേഷൻ ഓഫീസിൽ കനത്ത നാടകീയ രംഗങ്ങളാണ് അരങ്ങേറിയത്. ഓഫീസിലേക്ക് പ്രവേശിക്കാൻ ശ്രമിച്ച മേയർ വി.വി. രാജേഷിനെ സി.പി.എം കൗൺസിലർമാർ കവാടത്തിൽ വെച്ച് ഭൗതികമായി തടഞ്ഞതോടെയാണ് ഇരുവിഭാഗവും തമ്മിൽ കൂട്ടത്തല്ലിലേക്ക് കാര്യങ്ങൾ നീങ്ങിയത്. ബി.ജെ.പി കൗൺസിലർമാർ പ്രതിരോധവുമായി രംഗത്തിറങ്ങിയതോടെ ഓഫീസ് വരാന്ത യുദ്ധക്കളമായി മാറി. ഉന്തിലും തള്ളിലും പെട്ട് മേയർ വി.വി. രാജേഷിന്റെ കാലിന് പരിക്കേറ്റു. സംഘർഷത്തിന്റെ ദൃശ്യങ്ങൾ ഇപ്പോൾ മാധ്യമങ്ങളിലും സോഷ്യൽ മീഡിയയിലും കനത്ത ചർച്ചയായി വൈറലാവുകയാണ്.
തുടർന്ന് സ്ഥലത്തുണ്ടായിരുന്ന വൻ പോലീസ് പട കൗൺസിലർമാരെ ബലംപ്രയോഗിച്ച് മാറ്റിയാണ് മേയറെ ചേമ്പറിലേക്ക് എത്തിച്ചത്. സംഘർഷത്തിൽ സി.പി.എം, ബി.ജെ.പി കൗൺസിലർമാർ ഉൾപ്പെടെ ആകെ 16 പേർക്ക് പരിക്കേൽക്കുകയും ഇവരെ നഗരത്തിലെ വിവിധ ആശുപത്രികളിൽ പ്രവേശിപ്പിക്കുകയും ചെയ്തു. അടിപിടിക്കിടെ ഡ്യൂട്ടിയിലുണ്ടായിരുന്ന വനിതാ പോലീസ് ഉദ്യോഗസ്ഥ അനിലയ്ക്കും പരിക്കേറ്റിട്ടുണ്ട്. സി.പി.എം വനിതാ കൗൺസിലർമാരെ ബി.ജെ.പി അംഗങ്ങൾ ക്രൂരമായി മർദ്ദിച്ചതായി എൽ.ഡി.എഫ് പാർലമെന്ററി പാർട്ടി ലീഡർ എസ്.പി. ദീപക് ആരോപിച്ചു. മേയറാണ് ആദ്യം കയ്യാങ്കളിക്ക് തുടക്കമിട്ടതെന്നും പ്രതിപക്ഷം കുറ്റപ്പെടുത്തി.
എന്നാൽ, ജനപ്രതിനിധികളെയും പൊതുജനങ്ങളെയും തടഞ്ഞ് ഓഫീസ് പ്രവർത്തനം സ്തംഭിപ്പിക്കുന്നത് ജനാധിപത്യവിരുദ്ധമാണെന്നും അക്രമരാഷ്ട്രീയത്തെ അംഗീകരിക്കില്ലെന്നും മേയർ വി.വി. രാജേഷ് വ്യക്തമാക്കി. 20 ബി.ജെ.പി കൗൺസിലർമാരുടെ ആദ്യ സത്യപ്രതിജ്ഞ ഹൈക്കോടതി റദ്ദാക്കിയ സാഹചര്യത്തിൽ നിലവിലെ മേയർ, ഡെപ്യൂട്ടി മേയർ തിരഞ്ഞെടുപ്പുകൾ അസാധുവായെന്നാണ് എൽ.ഡി.എഫ് വ്യക്തമാക്കുന്നത്. എന്നാൽ കൗൺസിലർമാർ വീണ്ടും നിയമപ്രകാരം സത്യപ്രതിജ്ഞ ചെയ്തുകഴിഞ്ഞെന്നും പ്രതിപക്ഷത്തിന്റേത് രാഷ്ട്രീയ പ്രേരിതമായ നാടകമാണെന്നും ഭരണപക്ഷം തിരിച്ചടിച്ചു. സംഘർഷാവസ്ഥ കണക്കിലെടുത്ത് നഗരസഭാ പരിസരത്ത് ഇപ്പോൾ കനത്ത പോലീസ് സുരക്ഷയാണ് ഏർപ്പെടുത്തിയിരിക്കുന്നത്.
