ഇന്ത്യൻ ക്രിക്കറ്റ് ടീമിനെ അക്ഷരാർത്ഥത്തിൽ വിറപ്പിച്ച അയർലൻഡ് പേസർ ജയ് മുന്ദ്ര ഇപ്പോൾ സോഷ്യൽ മീഡിയയിലെ താരം. ഇന്ത്യക്കെതിരായ രണ്ട് മത്സരങ്ങളടങ്ങിയ ടി20 പരമ്പരയിൽ ഇന്ത്യയെ ഞെട്ടിച്ചുകൊണ്ട് ‘പ്ലെയർ ഓഫ് ദി സീരീസ്’ പുരസ്കാരം സ്വന്തമാക്കിയ മുന്ദ്ര, ഇപ്പോൾ വാർത്തകളിൽ നിറയുന്നത് ക്രിക്കറ്റ് മൈതാനത്തെ പ്രകടനത്തിന്റെ പേരിലല്ല, മറിച്ച് തന്റെ ലിങ്ക്ഡ്ഇൻ പ്രൊഫൈലിന്റെ പേരിലാണ്.
ഇന്ത്യക്കെതിരായ രണ്ട് ടി20 മത്സരങ്ങളിൽ നിന്നായി അഞ്ച് വിക്കറ്റുകൾ വീഴ്ത്തിയാണ് മുന്ദ്ര പരമ്പരയിലെ താരമായത്. രണ്ടാം ടി20യിൽ മലയാളി താരം സഞ്ജു സാംസണെയും അഭിഷേക് ശർമ്മയെയും ഗോൾഡൻ ഡക്കിന് പുറത്താക്കിയ പ്രകടനം ആരാധകരെ അമ്പരപ്പിച്ചു. വമ്പൻ ബാറ്റർമാരെ വട്ടംകറക്കുന്ന ഈ പേസർ, നിലവിൽ ഐടി മേഖലയിൽ ഫുൾ-ടൈം ജോലി അന്വേഷിക്കുകയാണ്. തന്റെ ലിങ്ക്ഡ്ഇൻ പ്രൊഫൈലിൽ ‘#OpenToWork’ ബാഡ്ജുമായി അദ്ദേഹം സജീവമാണ്.
രാജസ്ഥാനിൽ ജനിച്ച മുന്ദ്ര, 2021-ലാണ് ഉപരിപഠനത്തിനായി അയർലൻഡിലേക്ക് കുടിയേറിയത്. ഇന്റൽ കമ്പനിയിൽ പ്രൊഡക്റ്റ് ഡെവലപ്‌മെന്റ് എൻജിനീയറായി ജോലി ചെയ്തിരുന്ന അദ്ദേഹം, 2025 ജൂണിൽ ആ ജോലി ഉപേക്ഷിച്ചിരുന്നു. ഏതാനും മാസങ്ങൾക്ക് മുൻപ് വരെ ജോലിക്ക് വേണ്ടി അപേക്ഷകൾ അയച്ചിരുന്ന മുന്ദ്ര, ഇന്ന് ലോകകപ്പ് വിജയികളായ ഇന്ത്യൻ ടീമിനെ പോലും തകർത്തെറിഞ്ഞ താരമായി മാറിയിരിക്കുന്നു. അയർലൻഡിനായി കളിക്കുമ്പോഴും ഇപ്പോഴും ഇന്ത്യൻ പാസ്‌പോർട്ട് കൈവശമുള്ള താരമാണ് ജയ് മുന്ദ്ര.
