ന്യൂഡൽഹി : ഇന്ത്യൻ കരസേനയുടെ 31-ാമത് മേധാവിയായി ജനറൽ ധീരാജ് സേഥ് ഔദ്യോഗികമായി ചുമതലയേറ്റു. ജൂൺ 30-ന് വിരമിച്ച ജനറൽ ഉപേന്ദ്ര ദ്വിവേദിക്ക് പകരക്കാരനായാണ് അദ്ദേഹം പദവിയിലെത്തിയത്. ഇന്ന് സൗത്ത് ബ്ലോക്കിൽ വെച്ച് ഗാർഡ് ഓഫ് ഓണർ സ്വീകരിച്ച ശേഷം മാധ്യമങ്ങളെ അഭിസംബോധന ചെയ്ത അദ്ദേഹം, മാറിക്കൊണ്ടിരിക്കുന്ന ആഗോള സുരക്ഷാ സാഹചര്യങ്ങൾക്കനുസരിച്ച് ഇന്ത്യൻ സൈന്യത്തെ സാങ്കേതികവിദ്യാധിഷ്ഠിതമായി നവീകരിക്കുമെന്നും ശക്തമായ പ്രത്യാക്രമണ ശേഷിയുള്ള ഒരു സേനയായി മാറ്റുമെന്നും പ്രതിജ്ഞ ചെയ്തു.
ഇന്ത്യൻ സൈന്യത്തെ ഭാവിയിലെ വെല്ലുവിളികൾ നേരിടാൻ സജ്ജമായ അത്യാധുനിക സേനയാക്കി മാറ്റുന്നതിനുള്ള തന്റെ തന്ത്രപ്രധാനമായ വിഷൻ ജനറൽ ധീരാജ് സേഥ് പ്രഖ്യാപിച്ചു. പ്രധാനമന്ത്രി നരേന്ദ്ര മോദിയുടെ ആശയമായ ‘JAI’ മന്ത്രത്തിൽ നിന്ന് ഊർജ്ജമുൾക്കൊണ്ട്, ഇന്ത്യൻ സൈന്യത്തെ ‘VIJAY’ എന്ന ലക്ഷ്യത്തിലേക്ക് നയിക്കുമെന്ന് അദ്ദേഹം വ്യക്തമാക്കി. പ്രതിരോധ മന്ത്രി രാജ്നാഥ് സിംഗ് വിഭാവനം ചെയ്ത ‘Decade of Transformation’ (2023 – 2032 പരിവർത്തന ദശകം) എന്ന ലക്ഷ്യത്തിന് അനുസൃതമായി തന്റെ മുൻഗണനാ ക്രമങ്ങളെ അഞ്ച് അക്ഷരങ്ങളുള്ള ഒരു ചുരുക്കപ്പേരിലാണ് ജനറൽ ധീരാജ് സേഥ് ക്രോഡീകരിച്ചിരിക്കുന്നത്.
V – Vigilance and Readiness (ജാഗ്രതയും സജ്ജീകരണവും): അതിർത്തികളിലും ഉയർന്നുവരുന്ന പുതിയ ഭീഷണികളിലും നിരന്തരമായ ജാഗ്രത പുലർത്തും. ദേശീയ സുരക്ഷ നേരിടുന്ന ഏത് വെല്ലുവിളിയെയും നേരിടാൻ ഉയർന്ന പ്രവർത്തന സജ്ജത നിലനിർത്തും.
I – Innovation and Transformation (നവീകരണവും പരിവർത്തനവും): യുദ്ധതന്ത്രങ്ങളിലും സാങ്കേതികവിദ്യകളിലും നൂതനമായ മാറ്റങ്ങൾ കൊണ്ടുവരും. ആധുനിക യുദ്ധക്കളങ്ങൾക്ക് അനുയോജ്യമായ മാറ്റങ്ങൾ സൈന്യത്തിന്റെ ചിന്താഗതിയിലും പ്രവർത്തന രീതികളിലും നടപ്പിലാക്കും.
J – Jointness and Integration (ഏകോപനം): ഇന്ത്യൻ കരസേനയുടെ ശേഷി വർദ്ധിപ്പിക്കുന്നതിനായി വ്യോമസേനയും നാവികസേനയുമായി പൂർണ്ണമായ ഏകോപനവും ഒത്തുചേരലും ഉറപ്പാക്കും. 2047-ലെ വികസിത ഭാരതം എന്ന ലക്ഷ്യത്തിലേക്ക് ഇത് സൈന്യത്തെ നയിക്കും.
A – Aatmanirbharta (സ്വയംപര്യാപ്തത): പൂർണ്ണമായും ഇന്ത്യയിൽ തന്നെ വികസിപ്പിച്ചെടുത്ത ആയുധങ്ങളും സാങ്കേതികവിദ്യകളും ഉപയോഗിച്ച് രാജ്യത്തിന് അനുയോജ്യമായ തദ്ദേശീയ പരിഹാരങ്ങളിലൂടെ യുദ്ധങ്ങൾ ജയിക്കുക എന്ന ലക്ഷ്യത്തോടെ സ്വയംപര്യാപ്ത സൈന്യത്തെ കെട്ടിപ്പടുക്കും.
Y – Yoddha First (യോദ്ധാവ് ഒന്നാമത്): പുതുതായി ചേർന്ന അഗ്നിവീർ മുതൽ ഏറ്റവും മുതിർന്ന സൈനികൻ വരെയുള്ള ഓരോ പോരാളിയുമാണ് സൈന്യത്തിന്റെ ഏറ്റവും വലിയ കരുത്ത്. സൈനികരുടെ ക്ഷേമം, പരിശീലന നിലവാരം, മുൻ സൈനികരുടെ പുനരധിവാസം എന്നിവയ്ക്ക് പ്രഥമ പരിഗണന നൽകും.
