ന്യൂഡൽഹി : സോനം വാങ്ചുക്കിന്റെ ആരോഗ്യനിലയിൽ റിപ്പോർട്ടുമായി സഫ്ദർജംഗ് ആശുപത്രി. 21 ദിവസമായി തുടർന്ന നിരാഹാര സമരത്തെ തുടർന്ന് ശരീരഭാരം പത്തു കിലോയോളം കുറയുകയും നിർജ്ജലീകരണം സംഭവിക്കുകയും ചെയ്തതോടെയാണ് ഇയാളെ ഡൽഹി സഫ്ദർജംഗ് ആശുപത്രിയിൽ പ്രവേശിപ്പിച്ചത്. ഡൽഹി ഹൈക്കോടതിയുടെ കർശനമായ ഉത്തരവിനെ തുടർന്ന് ഇന്ന് പുലർച്ചെ 7:40 ഓടെ ഡൽഹി പോലീസ് ഇടപെട്ടാണ് വാങ്ചുകിനെ സമരപ്പന്തലിൽ നിന്ന് മാറ്റി ആശുപത്രിയിലെത്തിച്ചത്. ഓരോ പൗരന്റെയും ജീവൻ വിലപ്പെട്ടതാണെന്നും നിയമവാഴ്ചയ്ക്ക് മുന്നിൽ ഇത്തരം പിടിവാശികൾ അനുവദിക്കാനാവില്ലെന്നും വ്യക്തമാക്കിയ കോടതി, ഇയാൾക്ക് അടിയന്തര ചികിത്സ ഉറപ്പാക്കാൻ നിർദ്ദേശിക്കുകയായിരുന്നു.
രക്തത്തിലെ പഞ്ചസാരയുടെ അളവ് അപകടകരമായ രീതിയിൽ താഴുകയും ഇലക്ട്രോലൈറ്റുകളുടെ അളവിൽ വ്യതിയാനം സംഭവിക്കുകയും ചെയ്തതിനെ തുടർന്നാണ് വിദഗ്ദ്ധ ചികിത്സ നൽകാൻ അധികൃതർ തീരുമാനിച്ചത്. നിലവിൽ വാങ്ചുകിന്റെ നില തൃപ്തികരമാണെങ്കിലും തീവ്രമായ നിർജ്ജലീകരണം ബാധിച്ചതിനാൽ കർശനമായ നിരീക്ഷണവും തുടർച്ചയായ ചികിത്സയും ആവശ്യമാണെന്ന് സഫ്ദർജംഗ് ആശുപത്രി സൂപ്രണ്ട് ഡോ. ചാരു ബംബ അറിയിച്ചു. ആശുപത്രിയിൽ പ്രവേശിപ്പിച്ച ശേഷവും മെഡിക്കൽ സംഘത്തോട് സഹകരിക്കാൻ വാങ്ചുകിന്റെ കുടുംബം തയ്യാറാകുന്നില്ലെന്ന ആക്ഷേപം ശക്തമാണ്. തന്റെ അനുവാദമില്ലാതെ ഭർത്താവിന് യാതൊരുവിധ ചികിത്സയോ മരുന്നുകളോ നൽകരുതെന്ന് വാങ്ചുകിന്റെ ഭാര്യ ഗീതാഞ്ജലി ഡോക്ടർമാരെ ഭീഷണിപ്പെടുത്തുന്ന തരത്തിൽ പ്രസ്താവന നടത്തി. ആശുപത്രിയുടെ സുരക്ഷാ ക്രമീകരണങ്ങളെ വെല്ലുവിളിച്ചുകൊണ്ട് ഡോക്ടർമാരോട് ഇവർ തട്ടിക്കയറുകയും ഡിജിറ്റൽ മെഡിക്കൽ റിപ്പോർട്ടുകൾ ആവശ്യപ്പെട്ട് ആശുപത്രി ജീവനക്കാരുടെ ജോലി തടസ്സപ്പെടുത്താൻ ശ്രമിക്കുകയും ചെയ്തു.
എന്നാൽ രാജ്യത്തെ നിയമസംവിധാനങ്ങളോടും പോലീസിന്റെ സുരക്ഷാ നടപടികളോടും ഒട്ടും സഹകരിക്കാത്ത സമീപനമാണ് വാങ്ചുകും ഇയാളെ പിന്തുണയ്ക്കുന്ന കോക്രോച്ച് ജനതാ പാർട്ടി (സിജെപി) പ്രവർത്തകരും സ്വീകരിച്ചത്. ജീവൻ രക്ഷിക്കാനായി കോടതി നിർദ്ദേശപ്രകാരം എത്തിയ ഡൽഹി പോലീസിനെ തടയാനും സമരസ്ഥലത്ത് മനഃപൂർവ്വം സംഘർഷാവസ്ഥ സൃഷ്ടിക്കാനും ഇവർ ശ്രമിച്ചു. പാർലമെന്റിലേക്ക് നടത്താനിരുന്ന പ്രകോപനപരമായ മാർച്ചിന് മുന്നോടിയായി വലിയ തോതിൽ ആളുകളെ കൂട്ടി ക്രമസമാധാന നില തകർക്കാൻ ഇവർ പദ്ധതിയിട്ടിരുന്നതായും വിവരമുണ്ട്.
