അഞ്ചരക്കണ്ടി ദന്തൽ കോളജ് വിദ്യാർത്ഥി നിതിൻ രാജിന്റെ ദുരൂഹ മരണവുമായി ബന്ധപ്പെട്ട കേസിൽ മുഖ്യപ്രതി ഡോ. എം.കെ. റാമിനെ അറസ്റ്റ് ചെയ്തതിൽ സംഭവിച്ച ഗുരുതര വീഴ്ചയിൽ പോലീസിന് ഹൈക്കോടതിയുടെ രൂക്ഷവിമർശനം. അന്വേഷണ ഉദ്യോഗസ്ഥനായ ഡിവൈഎസ്പി സുധീർ കല്ലനോടാണ് ഹൈക്കോടതി രൂക്ഷമായ ഭാഷയിൽ ചോദ്യ ശരങ്ങൾ ഉന്നയിച്ചത്. പ്രതിയുടെ മോചനത്തിലേക്ക് വഴിതുറന്ന പോലീസ് നടപടിയിൽ കടുത്ത അമർഷം രേഖപ്പെടുത്തിയ കോടതി, ആഭ്യന്തര വകുപ്പിനോട് ഉദ്യോഗസ്ഥർക്ക് എന്തെങ്കിലും വൈരാഗ്യമുണ്ടോ എന്നും ആഹാരാവസ്ഥയിൽ ചോദിച്ചു.
“ആഭ്യന്തര വകുപ്പ് ‘ഓപ്പറേഷൻ തൂഫാൻ’ ഉൾപ്പെടെ ഒട്ടനവധി നല്ല കാര്യങ്ങൾ ചെയ്യുന്ന സമയത്ത് അതിന്റെ ശോഭ കെടുത്താനുള്ള ഉദ്ദേശ്യത്തിലാണോ നിങ്ങൾ ഇങ്ങനെ ചെയ്തത്? അതോ മേലുദ്യോഗസ്ഥർ ആരെങ്കിലും പറഞ്ഞിട്ടാണോ? നിയമപരമല്ലാത്ത ഇത്തരം നടപടികളിലൂടെ പ്രതികളെ രക്ഷപെടുത്താനാണ് പോലീസ് ശ്രമിക്കുന്നതെങ്കിൽ സാധാരണക്കാരുടെ നീതി ഉറപ്പാക്കാൻ ഇവിടെ കോടതിയുണ്ട്”– കേസ് പരിഗണിച്ച ജസ്റ്റിസ് എ. ബദറുദീൻ പോലീസിനെ ഓർമ്മിപ്പിച്ചു.
സുപ്രീം കോടതിയുടെ കൃത്യമായ മാർഗ്ഗനിർദ്ദേശങ്ങൾ പാലിക്കാതെയാണ് ഡോ. റാമിന്റെ അറസ്റ്റ് രേഖപ്പെടുത്തിയതെന്ന് പ്രാഥമികമായിത്തന്നെ വ്യക്തമാണെന്ന് കോടതി ചൂണ്ടിക്കാട്ടി. അറസ്റ്റ് ചെയ്യുമ്പോൾ നൽകേണ്ട ‘അറസ്റ്റിനുള്ള കൃത്യമായ കാരണം’ പ്രതിക്ക് നൽകിയിട്ടില്ല. പോലീസിന്റെ ഭാഗത്തുനിന്നുണ്ടായ ഈ സാങ്കേതിക പിഴവാണ് പ്രതിക്ക് വളരെ എളുപ്പത്തിൽ നിയമപരമായ ആനുകൂല്യം ലഭിക്കാനും മോചനത്തിലേക്ക് നയിക്കാനും ഇടയാക്കിയത്. വിഷയം അതീവ ഗുരുതരമാണെന്ന് വ്യക്തമാക്കിയ ഹൈക്കോടതി, കേസിൽ പോലീസിന്റെ മെല്ലെപ്പോക്കിനെയും അനാസ്ഥയെയും പൂർണ്ണമായും തള്ളിക്കളഞ്ഞു.
