ഓസ്ട്രേലിയയിലെ സിഡ്നിയിൽ നടക്കാനിരുന്ന വൻതാരനിര അണിനിരക്കുന്ന മെഗാ സ്റ്റേജ് ഷോ അവസാന നിമിഷം മാറ്റിവെച്ചതായി റിപ്പോർട്ട്. ഓസ്ട്രേലിയൻ വിസ ലഭിക്കുന്നതിൽ നേരിട്ട അപ്രതീക്ഷിത തടസ്സങ്ങളെ നടൻ മോഹൻലാലിന് യാത്ര തിരിക്കാൻ സാധിക്കാതെ വന്നതോടെയാണ് പരിപാടി മാറ്റിവെക്കാൻ സംഘാടകർ നിർബന്ധിതരായത്. സംഭവത്തിൽ അതീവ ദുഃഖവും വൈകാരികവുമായ ക്ഷമാപണവും രേഖപ്പെടുത്തി മോഹൻലാൽ സംഘാടകർക്കും പ്രേക്ഷകർക്കുമായി വീഡിയോ സന്ദേശം അയച്ചു.
ഷോയിൽ പങ്കെടുക്കേണ്ട മറ്റ് പ്രമുഖ താരങ്ങളും അണിയറപ്രവർത്തകരും നേരത്തെ തന്നെ ഓസ്ട്രേലിയയിൽ എത്തിച്ചേർന്നിരുന്നു. എന്നാൽ മോഹൻലാലിന്റെ വിസ അപേക്ഷയിൽ അവസാന നിമിഷം നേരിട്ട സാങ്കേതിക കുരുക്കാണ് തിരിച്ചടിയായത്. സാങ്കേതിക പിഴവാണോ അതോ ക്ലറിക്കൽ മിസ്റ്റേക്കാണോ ഉണ്ടായതെന്ന കാര്യം തനിക്കറിയില്ലെന്നും അതിന്റെ കൂടുതൽ വിശദാംശങ്ങളിലേക്ക് കടക്കാൻ താൻ ആഗ്രഹിക്കുന്നില്ലെന്നും താരം സന്ദേശത്തിൽ വ്യക്തമാക്കി. തനിക്ക് എത്താൻ സാധിക്കാത്തത് തന്റെ മാത്രം വീഴ്ചയായി കണ്ട് എല്ലാവരും ക്ഷമിക്കണമെന്നാണ് വികാരഭരിതനായി മോഹൻലാൽ വീഡിയോയിലൂടെ അഭ്യർത്ഥിച്ചത്.
മലയാളികളുടെ പ്രിയപ്പെട്ട താരത്തെ നേരിട്ട് കാണാൻ ടിക്കറ്റെടുത്ത് കാത്തിരുന്ന ആയിരക്കണക്കിന് ഓസ്ട്രേലിയൻ മലയാളി ആരാധകർക്ക് വലിയ നിരാശയാണ് ഈ വാർത്ത സമ്മാനിച്ചത്. എന്നെ കണ്ട് കാണാൻ കാത്തിരുന്ന പ്രേക്ഷകരോടും പരിപാടിയുടെ സംഘാടകരോടും വാക്ക് പാലിക്കാൻ കഴിയാത്തതിലുള്ള സങ്കടം മോഹൻലാൽ പങ്കുവെച്ചു. നിലവിൽ മാറ്റിവെച്ച ഷോ പുതിയ തീയതി ലഭിക്കുന്ന മുറയ്ക്ക് പിന്നീട് നടത്തുമെന്ന് സംഘാടക സമിതി അറിയിച്ചിട്ടുണ്ട്. പുതിയ തീയതിയും ടിക്കറ്റുമായി ബന്ധപ്പെട്ട വിവരങ്ങളും ഉടൻ തന്നെ ഔദ്യോഗികമായി പുറത്തുവിടും.
