രാജ്യത്തെ ലഹരിമുക്തമാക്കാനും യുവതലമുറയുടെ ഭാവി സുരക്ഷിതമാക്കാനും ഒറ്റക്കെട്ടായി അണിനിരക്കണമെന്ന് പ്രധാനമന്ത്രി നരേന്ദ്ര മോദി ആഹ്വാനം ചെയ്തു. തൻ്റെ പ്രതിമാസ റേഡിയോ പ്രസംഗമായ ‘മൻ കീ ബാത്തി’ൻ്റെ 137-ാമത് പതിപ്പിൽ സംസാരിക്കുകയായിരുന്നു അദ്ദേഹം. ‘വികസിത ഭാരതത്തിനായി ലഹരിമുക്ത യുവത’ (നശാ മുക്ത് യുവ ഫോർ വികസിത് ഭാരത്) എന്ന പ്രചാരണം രാജ്യത്തുടനീളം വലിയ മുന്നേറ്റമാണ് ഉണ്ടാക്കുന്നതെന്ന് പ്രധാനമന്ത്രി ചൂണ്ടിക്കാട്ടി. ലഹരിമുക്തമായ യുവത്വവും ലഹരിമുക്തമായ ഇന്ത്യയുമാണ് ഈ ദൗത്യത്തിൻ്റെ പ്രധാന ലക്ഷ്യമെന്ന് അദ്ദേഹം വ്യക്തമാക്കി.
ലഹരി ഉപയോഗം ഒരാളെ മാത്രമല്ല, ആ വ്യക്തിയുടെ കുടുംബത്തെയും സമൂഹത്തെയും മുഴുവനായും തകർച്ചയിലേക്ക് തള്ളിവിടുമെന്ന് പ്രധാനമന്ത്രി ഓർമ്മിപ്പിച്ചു. ലഹരിക്ക് അടിമപ്പെട്ടവരെ അതിൽ നിന്ന് മോചിപ്പിക്കാൻ സഹായിക്കുന്നവരെയും ലഹരിക്കെതിരെ ബോധവൽക്കരണം നടത്തുന്നവരെയും അദ്ദേഹം പ്രശംസിച്ചു. ഇതിനായി സമൂഹമാധ്യമ ഉള്ളടക്ക നിർമ്മാതാക്കളും സംഗീതജ്ഞരും നാടക പ്രവർത്തകരും മുന്നോട്ടുവരണമെന്നും ബോധവൽക്കരണ ഗാനങ്ങളും ചെറുകഥകളും ഹ്രസ്വ ചിത്രങ്ങളും നിർമ്മിച്ച് പ്രതിരോധം ശക്തമാക്കണമെന്നും മോദി അഭ്യർത്ഥിച്ചു.
ഇതിനുപുറമെ, സാങ്കേതികവിദ്യയും പ്രാദേശിക വികസനവും സമസൃഷ്ടി സ്നേഹവും മുൻനിർത്തിയുള്ള വിവിധ വിഷയങ്ങളും പ്രധാനമന്ത്രി തൻ്റെ പ്രസംഗത്തിൽ പരാമർശിച്ചു. ഇന്ത്യയുടെ ചരിത്രം എളുപ്പത്തിൽ മനസിലാക്കാൻ സഹായിക്കുന്ന ‘ഭാരത് രാജ്യ’ എന്ന വെബ്സൈറ്റ് വികസിപ്പിച്ച മുംബൈ സ്വദേശി കൃഷ്ണ ശേഷാദ്രിയെ അദ്ദേഹം അഭിനന്ദിച്ചു. തെരുവ് കച്ചവടക്കാർക്കായുള്ള പിഎം സ്വനിധി പദ്ധതിയിലൂടെ ദശലക്ഷക്കണക്കിന് സ്ത്രീകൾ സ്വയംപര്യാപ്തത കൈവരിച്ചതായും അദ്ദേഹം കൂട്ടിച്ചേർത്തു. വരുന്ന ഉത്സവ സീസണുകളിൽ പ്രാദേശിക ഉൽപ്പന്നങ്ങൾ വാങ്ങാനും ‘വോക്കൽ ഫോർ ലോക്കൽ’ പ്രചാരണത്തിൻ്റെ ഭാഗമാകാനും ജനങ്ങളോട് പ്രധാനമന്ത്രി ആഹ്വാനം ചെയ്തു.
