ഇംഗ്ലണ്ടിനെതിരായ ടെസ്റ്റ് പരമ്പരയിലെ ആദ്യ രണ്ട് മത്സരങ്ങളിലെ കനത്ത പരാജയത്തിന് പിന്നാലെ ടീമിൽ വൻ അഴിച്ചുപണി നടത്തിയ പാകിസ്ഥാൻ ക്രിക്കറ്റ് ബോർഡിന്റെ നടപടിയെ രൂക്ഷമായി വിമർശിച്ച് മുൻ നായകനും മുൻ പിസിബി ചെയർമാനുമായ റമീസ് രാജ. പരമ്പര പുരോഗമിക്കുന്നതിനിടെ പ്രധാന താരങ്ങളടക്കം ഏഴ് കളിക്കാരെ നാട്ടിലേക്ക് തിരിച്ചയക്കുകയും മുഖ്യപരിശീലകൻ സർഫറാസ് അഹമ്മദ്, ബോളിംഗ് പരിശീലകൻ ഉമർ ഗുൽ എന്നിവരെ പുറത്താക്കുകയും ചെയ്ത ബോർഡിന്റെ നീക്കം ക്രിക്കറ്റ് ചരിത്രത്തിൽ കേട്ടുകേൾവിയില്ലാത്തതാണെന്ന് അദ്ദേഹം ചൂണ്ടിക്കാട്ടി. ഫുട്ബോളിൽ സീസണിന്റെ പകുതിയിൽ മാനേജറെ പുറത്താക്കുന്നത് പോലെയാണ് ബോർഡ് പെരുമാറിയതെന്നും സമ്മർദ്ദം താങ്ങാനാവാതെ പിസിബി പാനിക് ബട്ടൺ അമർത്തിയിരിക്കുകയാണെന്നും റമീസ് രാജ തുറന്നടിച്ചു.
ഹെഡിങ്ലിയിൽ ഇന്നിങ്സിനും 103 റൺസിനും ലോർഡ്സിൽ 194 റൺസിനും പരാജയപ്പെട്ട് പരമ്പര കൈവിട്ടതോടെയാണ് മുഹമ്മദ് റിസ്വാൻ, ഇമാം ഉൾ ഹഖ്, സൽമാൻ അലി ആഗ, ആമിർ ജമാൽ, ഖുറം ഷഹ്സാദ്, അലി ഉസ്മാൻ, മുഹമ്മദ് അവൈസ് സഫർ എന്നിവരെ ടീമിൽ നിന്ന് ഒഴിവാക്കിയത്. ഇവർക്ക് പകരമായി ടെസ്റ്റ് പരിചയമില്ലാത്ത അഞ്ച് താരങ്ങളുൾപ്പെടെ ഏഴ് പേരെ അവസാന ടെസ്റ്റിനുള്ള ടീമിലേക്ക് ഉൾപ്പെടുത്തുകയും ചെയ്തു. പരമ്പരയിലെ അവസാന മത്സരം കഴിയാൻ വെറും പത്ത് ദിവസം മാത്രം ബാക്കിനിൽക്കെ എടുത്ത ഈ നാടകീയ നീക്കം പുറത്തായ താരങ്ങളുടെയും പുതുതായി ടീമിലെത്തിയവരുടെയും ആത്മവിശ്വാസത്തെ തകർക്കുമെന്നും ടീമിനെ സ്വാർത്ഥത നിറഞ്ഞതാക്കി മാറ്റുമെന്നും റമീസ് രാജ മുന്നറിയിപ്പ് നൽകി.
മുൻ അന്താരാഷ്ട്ര താരങ്ങളായ സർഫറാസ് അഹമ്മദിനെയും ഉമർ ഗുല്ലിനെയും അപമാനിച്ച് പുറത്താക്കിയത് വഴി മുൻ കളിക്കാർക്ക് പാക് ക്രിക്കറ്റ് സംവിധാനത്തിലുള്ള ബഹുമാനം നഷ്ടപ്പെടുമെന്നും ഭാവിയിൽ ആരും പാക് ടീമിന്റെ പരിശീലക സ്ഥാനം ഏറ്റെടുക്കാൻ തയ്യാറാകില്ലെന്നും അദ്ദേഹം ആശങ്ക പ്രകടിപ്പിച്ചു. പാകിസ്ഥാൻ ക്രിക്കറ്റ് പൂർണ്ണമായും നിയന്ത്രണം തെറ്റിയ അവസ്ഥയിലാണെന്നും നേതൃത്വത്തിലും ഭരണത്തിലും അടിക്കടിയുണ്ടാകുന്ന മാറ്റങ്ങൾ ടീമിന്റെ സ്വത്വത്തെ നശിപ്പിച്ചതായും റമീസ് രാജ കൂട്ടിച്ചേർത്തു. സെപ്റ്റംബർ ഒൻപതിന് എഡ്ജ്ബാസ്റ്റണിൽ ആരംഭിക്കുന്ന മൂന്നാം ടെസ്റ്റിൽ ബാബർ അസമിന്റെ നേതൃത്വത്തിലാണ് പാകിസ്ഥാൻ ഇറങ്ങുന്നത്.
