തിരുവനന്തപുരം: കേന്ദ്ര ഏജൻസിയായ എൻഫോഴ്സ്മെന്റ് ഡയറക്ടറേറ്റിന് (ഇ.ഡി) നൽകിയ നിർണ്ണായക മൊഴി പിൻവലിച്ച് മന്ത്രിയും എം.എൽ.എയുമായ പി.എ. മുഹമ്മദ് റിയാസിന്റെ സുഹൃത്ത് വാരിസ്. ഇ.ഡി ഉദ്യോഗസ്ഥർ ഭീഷണിപ്പെടുത്തിയാണ് തന്നിൽ നിന്ന് മൊഴിയെടുത്തതെന്ന് വ്യക്തമാക്കിക്കൊണ്ടാണ് വാരിസ് സത്യവാങ്മൂലം സമർപ്പിച്ചത്. ഇ.ഡി നടത്തിയ റെയ്ഡിന് തൊട്ടുപിറ്റേദിവസം തന്നെ മൊഴി പിൻവലിച്ചുകൊണ്ടുള്ള സത്യവാങ്മൂലം നൽകിയിരുന്നെങ്കിലും, ഈ സത്യവാങ്മൂലത്തിന്റെ പകർപ്പ് ഇപ്പോൾ പുറത്തുവന്നതോടെ വിഷയം പുതിയ രാഷ്ട്രീയ തലത്തിലേക്ക് നീങ്ങിയിരിക്കുകയാണ്.
മന്ത്രി പി.എ. മുഹമ്മദ് റിയാസിന്റെ പേര് പറയാൻ അന്വേഷണ സംഘം തന്നോട് നിർബന്ധപൂർവ്വം ആവശ്യപ്പെടുകയായിരുന്നു എന്ന് വാരിസ് ആരോപിക്കുന്നു. ശാരീരികമായും മാനസികമായും കടുത്ത സമ്മർദ്ദത്തിലാക്കിയാണ് മൊഴി രേഖപ്പെടുത്തിയത്. സമ്മർദ്ദത്തിനും ഭീഷണിക്കും വഴങ്ങിയാണ് റിയാസിനെതിരെ സംസാരിക്കേണ്ടി വന്നതെന്നും എന്നാൽ ഇല്ലാത്ത കാര്യങ്ങൾ ഉദ്യോഗസ്ഥർ പറയിപ്പിക്കുകയായിരുന്നു എന്നും സത്യവാങ്മൂലത്തിൽ ചൂണ്ടിക്കാണിക്കുന്നു.
കേന്ദ്ര ഏജൻസികളെ ഉപയോഗിച്ച് ഭരണപക്ഷ നേതാക്കളെ വേട്ടയാടാൻ ശ്രമിക്കുകയാണെന്ന സി.പി.എമ്മിന്റെയും സർക്കാരിന്റെയും ആരോപണങ്ങൾക്ക് ബലം നൽകുന്നതാണ് ഇപ്പോൾ പുറത്തുവന്ന വാരിസിന്റെ വെളിപ്പെടുത്തൽ. കേസിൽ റിയാസിനെ ബന്ധിപ്പിക്കാൻ ഇ.ഡി ശ്രമിക്കുന്നുവെന്ന വാദത്തിന് ഈ സത്യവാങ്മൂലം പ്രധാന തെളിവായി ഭരണപക്ഷം ഉയർത്തിക്കാട്ടും. അതേസമയം, ഉദ്യോഗസ്ഥരെ സമ്മർദ്ദത്തിലാക്കി മൊഴി തിരുത്തിക്കാനുള്ള നീക്കമാണ് നടക്കുന്നതെന്ന ആരോപണവുമായി പ്രതിപക്ഷവും രംഗത്തെത്തിയിട്ടുണ്ട്.
