വി.ഡി. സതീശൻ മികച്ച മുഖ്യമന്ത്രിയാണെന്നും യാതൊരു അപാകതയും ഇതുവരെ വന്നിട്ടില്ലെന്നും മുൻ മന്ത്രിയും സിപിഎം നേതാവും ആയിരുന്ന ജി. സുധാകരൻ. അമ്പലപ്പുഴ ചെമ്പകശ്ശേരിനഗർ റെസിഡെന്റ്‌സ് അസോസിയേഷന്റെ ഓണാഘോഷം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഇക്കാര്യം സതീശനോട് നേരിട്ട് പറയുകയും ചെയ്തിട്ടുണ്ടെന്നും, കൂടെയുള്ള മന്ത്രിമാരെയെല്ലാം സൂക്ഷിക്കണമെന്നും താൻ അദ്ദേഹത്തിന് മുന്നറിയിപ്പ് നൽകിയിരുന്നതായും സുധാകരൻ വ്യക്തമാക്കി. മന്ത്രിമാർ കുഴപ്പങ്ങളൊന്നും കാണിച്ചിട്ടില്ലെങ്കിലും അവരുടെ പബ്ലിക് ഇമേജ് അറിയാവുന്നതുകൊണ്ടാണ് അത്തരത്തിൽ പറഞ്ഞതെന്നും, അവർ വളരെയേറെ ശ്രദ്ധിക്കേണ്ടതുണ്ടെന്നും അദ്ദേഹം കൂട്ടിച്ചേർത്തു.
സതീശന്റെ ഗുണങ്ങൾ പറഞ്ഞ് താൻ നടത്തിയ പരാമർശങ്ങളിൽ ഉറച്ചുനിൽക്കുമെന്നും അഭിപ്രായങ്ങൾ ഏത് പരിതസ്ഥിതിയിലും തുറന്നുപറയുമെന്നും സുധാകരൻ പറഞ്ഞു. ആരോഗ്യവാനായ ഒരു മുഖ്യമന്ത്രിയാണ് അദ്ദേഹം എന്നും ഭരണം നന്നായി മുന്നോട്ടുപോകുമെന്നാണ് പ്രതീക്ഷിക്കുന്നതെന്നും സതീശനുമായി തനിക്ക് നേരത്തേ സൗഹൃദമുണ്ടെന്നും അദ്ദേഹം വ്യക്തമാക്കി. മണ്ഡലത്തിന് എന്തു സഹായവും സതീശൻ ചെയ്യുമെന്നാണ് പ്രതീക്ഷിക്കുന്നത്. താൻ മന്ത്രിയല്ലാത്ത ഒരുകാലത്തും സെക്രട്ടേറിയറ്റിൽ പോയിട്ടില്ലെന്നും, കഴിഞ്ഞ 20 വർഷത്തിനിടെ മന്ത്രിയല്ലാതിരിക്കുമ്പോൾ ഇതാദ്യമായാണ് സെക്രട്ടേറിയറ്റിൽ പോകുന്നതെന്നും വ്യക്തമാക്കിയ സുധാകരൻ, സതീശനെ കാണുന്നതിൽ സന്തോഷമേയുള്ളൂവെന്നും കൂട്ടിച്ചേർത്തു.
