കാനഡയും യൂറോപ്യൻ യൂണിയനും തമ്മിൽ സാമ്പത്തിക, സുരക്ഷാ ബന്ധങ്ങൾ ശക്തിപ്പെടുത്താനുള്ള നീക്കങ്ങൾക്കെതിരെ കടുത്ത മുന്നറിയിപ്പുമായി അമേരിക്കൻ പ്രസിഡന്റ് ഡൊണാൾഡ് ട്രംപ് രംഗത്തെത്തി. കാനഡയെ തങ്ങളുടെ ആദ്യത്തെ അസോസിയേറ്റ് അംഗമാക്കാൻ യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയൻ നിർദ്ദേശം മുന്നോട്ടുവെച്ചിരുന്നു. എന്നാൽ ഈ നീക്കം അമേരിക്കയോടുള്ള ശത്രുതാപരമായ നിലപാടാണെന്ന് തെളിഞ്ഞാൽ യൂറോപ്യൻ രാജ്യങ്ങൾക്ക് മേൽ അതിശക്തമായ നികുതി ചുമത്തുമെന്നും യൂറോപ്പുമായുള്ള വ്യാപാരങ്ങൾ നിർത്തിവെക്കുമെന്നും ട്രംപ് വ്യക്തമാക്കി.
അമേരിക്കൻ മാധ്യമങ്ങളോട് സംസാരിക്കവെ കാനഡയുടെ നിലവിലെ വ്യാപാര നയങ്ങൾ മോശമാണെന്നും യൂറോപ്പ് ഇതിന് കൂട്ടുനിൽക്കുന്നത് അംഗീകരിക്കാനാവില്ലെന്നും ട്രംപ് ആരോപിച്ചു. നല്ല ഉദ്ദേശ്യത്തോടെയുള്ള സഹകരണമാണെങ്കിൽ പ്രശ്നമില്ലെന്നും എന്നാൽ അമേരിക്കയുടെ സാമ്പത്തിക താത്പര്യങ്ങൾക്ക് എതിരായ നീക്കമാണെങ്കിൽ കടുത്ത പ്രത്യാഘാതം ഉണ്ടാകുമെന്നും അദ്ദേഹം പറഞ്ഞു. അമേരിക്ക കാനഡയ്ക്ക് മേൽ ഇതിനോടകം വൻതോതിൽ തീരുവ വർദ്ധിപ്പിച്ച സാഹചര്യത്തിലാണ് കാനഡ യൂറോപ്യൻ രാജ്യങ്ങളുമായി അടുക്കാൻ ശ്രമിക്കുന്നത്.
കാനഡയും യൂറോപ്പും തമ്മിൽ വ്യാപാര ബന്ധത്തിന് പുറമെ സാങ്കേതിക വിദ്യ, പ്രതിരോധം, ആർട്ടിക് മേഖലയിലെ സഹകരണം എന്നിവയിൽ വലിയ സഖ്യം രൂപീകരിക്കാൻ പദ്ധതിയിട്ടിട്ടുണ്ട്. തങ്ങളുടെ വിദേശ വ്യാപാരം അമേരിക്കയിൽ മാത്രം കേന്ദ്രീകരിക്കാതെ കൂടുതൽ രാജ്യങ്ങളിലേക്ക് വ്യാപിപ്പിക്കാനാണ് കാനഡ ലക്ഷ്യമിടുന്നത്. എന്നാൽ അന്താരാഷ്ട്ര വ്യാപാര ബന്ധങ്ങളിലെ ഈ പുതിയ മാറ്റങ്ങൾ അമേരിക്കയും യൂറോപ്പും തമ്മിലുള്ള വാണിജ്യ ബന്ധത്തിൽ വലിയ തർക്കങ്ങൾക്ക് വഴിതുറന്നിരിക്കുകയാണ്.
