ബ്രിക്സ് ഉച്ചകോടിയ്ക്കിടെ ചൈനീസ് പ്രസിഡന്റ് ഷി ചിൻപിങ്ങിന് ഗുരുതരമായ രീതിയിൽ പക്ഷാഘാതം (Stroke) സംഭവിച്ചെന്നും, അദ്ദേഹം അടിയന്തരമായി ബെയ്ജിങ്ങിലെ സൈനിക ആശുപത്രിയിൽ ചികിത്സയിലാണെന്നുമുള്ള രീതിയിൽ പ്രചരിക്കുന്ന വാർത്തകൾ പൂർണ്ണമായും അടിസ്ഥാനരഹിതമെന്ന് അന്താരാഷ്ട്ര മാധ്യമങ്ങളും വസ്തുതാന്വേഷണ ഏജൻസികളും വ്യക്തമാക്കി. ചൈനീസ് ഡെമോക്രാറ്റിക് പാർട്ടി ചെയർമാൻ വാൻജുൻ ഷി എക്സ് (X) പ്ലാറ്റ്ഫോമിലൂടെ നടത്തിയ അവകാശവാദങ്ങളാണ് സമൂഹമാധ്യമങ്ങളിൽ വൻ പ്രചാരം നേടിയത്.
ഉച്ചകോടിയ്ക്കിടെ ഷി ചിൻപിങ് ബോധരഹിതനായെന്നും, ആരോഗ്യവിവരങ്ങൾ ചോരുമെന്ന് ഭയന്ന് ഇന്ത്യൻ ആശുപത്രികളിൽ ചികിത്സ തേടാൻ വിസമ്മതിച്ച് പ്രത്യേക വിമാനത്തിൽ ബെയ്ജിങ്ങിലേക്ക് മടങ്ങിയെന്നുമാണ് വാൻജുൻ ഷി അവകാശപ്പെട്ടിരുന്നത്. ബെയ്ജിങ്ങിലെ 301 മിലിട്ടറി ആശുപത്രിയിലേക്ക് ഹെലികോപ്റ്ററിൽ എത്തിച്ച അദ്ദേഹത്തിന്റെ നില അതീവ ഗുരുതരമാണെന്നും വരുംദിവസങ്ങളിലെ വിദേശ സന്ദർശനങ്ങൾ റദ്ദാക്കുമെന്നും പോസ്റ്റിൽ ആരോപിച്ചിരുന്നു.
എന്നാൽ, ഈ സമയത്ത് ഷി ചിൻപിങ് ഡൽഹിയിൽ ബ്രിക്സ് ഉച്ചകോടിയുടെ രണ്ടാം ദിന യോഗങ്ങളിൽ സജീവമായി പങ്കെടുക്കുകയും പ്രസംഗിക്കുകയും ചെയ്തിരുന്നുവെന്ന് ഔദ്യോഗിക ചിത്രങ്ങളും സമ്മിറ്റ് രേഖകളും വ്യക്തമാക്കുന്നു. ചൈനീസ് വിദേശകാര്യ മന്ത്രാലയം നൽകുന്ന വിവരമനുസരിച്ച്, ഉച്ചകോടിയുടെ നിശ്ചിത പരിപാടികൾ പൂർത്തിയാക്കിയ ശേഷമാണ് അദ്ദേഹം ബെയ്ജിങ്ങിലേക്ക് മടങ്ങിയത്. എക്സ് പ്ലാറ്റ്ഫോമിൽ വാൻജുൻ ഷി പങ്കുവെച്ച വ്യാജ കുറിപ്പിന് താഴെ വസ്തുതകൾ ചൂണ്ടിക്കാട്ടി ‘കമ്മ്യൂണിറ്റി നോട്ട്’ (Community Note) രേഖപ്പെടുത്തിയിട്ടുമുണ്ട്. വാർത്ത പൂർണ്ണമായും വ്യാജമാണെന്ന് തെളിഞ്ഞതോടെ വിദേശകാര്യ മന്ത്രാലയവും വിഷയം തള്ളി.
