പാകിസ്താൻ കേന്ദ്രീകരിച്ച് പ്രവർത്തിക്കുന്ന ഷെഹ്സാദ് ഭട്ടി നെറ്റ്വർക്കിനെതിരെ സുരക്ഷാസേനയും പോലീസും നടപടികൾ ശക്തമാക്കി. രാജ്യത്ത് ഭീകരാക്രമണങ്ങൾക്കും വിധ്വംസക പ്രവർത്തനങ്ങൾക്കും പദ്ധതിയിട്ടതുമായി ബന്ധപ്പെട്ട് ഈ ശൃംഖലയ്ക്കെതിരെ 12 എഫ്.ഐ.ആറുകൾ രജിസ്റ്റർ ചെയ്തു. കഴിഞ്ഞ ദിവസങ്ങളിൽ അറസ്റ്റിലായ സംഘാംഗങ്ങളിൽ നിന്ന് ഹാൻഡ് ഗ്രനേഡുകളും ആയുധങ്ങളും സ്ഫോടകവസ്തുക്കളും പോലീസ് കണ്ടെടുത്തു.
പാകിസ്താൻ ചാരസംഘടനയായ ഐ.എസ്.ഐയുടെ പിന്തുണയോടെ പ്രവർത്തിക്കുന്ന ഈ ഭീകര ശൃംഖലയ്ക്കെതിരെ വൻതോതിലുള്ള തിരച്ചിലാണ് നടന്നുവരുന്നത്. അറസ്റ്റിലായ പ്രതികൾ രാജ്യത്തിന്റെ വിവിധ ഭാഗങ്ങളിൽ സുരക്ഷാ കേന്ദ്രങ്ങളുടെ ദൃശ്യങ്ങൾ ശേഖരിക്കാനും ആക്രമണങ്ങൾ നടത്താനും പദ്ധതിയിട്ടിരുന്നതായി അന്വേഷണസംഘം വ്യക്തമാക്കി. പിടിച്ചെടുത്ത പല ഗ്രനേഡുകളിലും പാകിസ്താൻ ഓർഡനൻസ് ഫാക്ടറിയുടെ അടയാളങ്ങൾ രേഖപ്പെടുത്തിയിട്ടുണ്ട്.
സമൂഹമാധ്യമങ്ങൾ വഴി യുവാക്കളെ ആകർഷിച്ചാണ് ഷെഹ്സാദ് ഭട്ടി സംഘം തങ്ങളുടെ പ്രവർത്തനങ്ങളിലേക്ക് ആളെക്കൂട്ടിയിരുന്നത്. ഡ്രോണുകൾ ഉപയോഗിച്ച് അതിർത്തി കടത്തി വിടുന്ന ആയുധങ്ങളും മയക്കുമരുന്നുകളും പ്രാദേശിക ശൃംഖലകൾ വഴി വിതരണം ചെയ്യുകയായിരുന്നു ഇവരുടെ രീതി. നിലവിൽ കേന്ദ്ര ആഭ്യന്തര മന്ത്രാലയം ഈ നെറ്റ്വർക്കിനെ ഭീകര സംഘടനയായി പ്രഖ്യാപിച്ചിട്ടുണ്ട്.
