ഏഷ്യൻ ഗെയിംസ് ഷൂട്ടിംഗിൽ ഇന്ത്യയ്ക്ക് അഭിമാന നേട്ടത്തിനൊപ്പം ചരിത്രം കുറിച്ച് മലയാളി താരം വിദർശ കെ. വിനോദ്. ഏഷ്യൻ ഗെയിംസ് ഷൂട്ടിംഗിൽ മെഡൽ നേടുന്ന ആദ്യ മലയാളി എന്ന ചരിത്ര നേട്ടമാണ് കോഴിക്കോട് തിരുവമ്പാടി സ്വദേശിയായ വിദർശ സ്വന്തമാക്കിയത്. 10 മീറ്റർ എയർ റൈഫിൾ ടീം ഇനത്തിൽ വിദർശ ഉൾപ്പെടുന്ന മൂന്നംഗ ഇന്ത്യൻ സംഘമാണ് വെള്ളി മെഡൽ കരസ്ഥമാക്കിയത്.
തന്റെ കന്നി ഏഷ്യൻ ഗെയിംസിൽ തന്നെ രാജ്യത്തിനായി മെഡൽ നേടാനായതിന്റെ സന്തോഷം വിദർശ പങ്കുവെച്ചു. കുടുംബത്തിന്റെയും പരിശീലകരുടെയും പിന്തുണയാണ് ഈ വലിയ നേട്ടത്തിലേക്ക് നയിച്ചതെന്നും, വരാനിരിക്കുന്ന 50 മീറ്റർ റൈഫിൾ ഇനത്തിൽ മത്സരിക്കാൻ ഈ മെഡൽ വൻ ആത്മവിശ്വാസം നൽകുന്നുണ്ടെന്നും താരം വ്യക്തമാക്കി. കഴിവ് തെളിയിച്ചുകൊണ്ട് സ്വന്തം നാടായ കേരളത്തിൽ തന്നെ തുടരാനാണ് ആഗ്രഹമെന്നും, സംസ്ഥാന സർക്കാർ അനുയോജ്യമായ ജോലി നൽകിയാൽ സന്തോഷത്തോടെ സ്വീകരിക്കുമെന്നും വിദർശ കൂട്ടിച്ചേർത്തു.
2018-ൽ എൻ.സി.സിയിലൂടെയാണ് (NCC) വിദർശ ഷൂട്ടിംഗ് ലോകത്തേക്ക് കടന്നുവരുന്നത്. തുടർന്ന് 2019 മുതൽ ഇതിനെ ഗൗരവകരമായി പ്രൊഫഷനായി തിരഞ്ഞെടുക്കുകയായിരുന്നു. നിലവിൽ ഡൽഹി കേന്ദ്രീകരിച്ചാണ് പ്രധാന പരിശീലനം നടക്കുന്നതെങ്കിലും, തിരുവനന്തപുരത്തെ വട്ടിയൂർക്കാവ് ഷൂട്ടിംഗ് റേഞ്ചിൽ മികച്ച പരിശീലന സൗകര്യങ്ങളുണ്ടെന്ന് താരം പറഞ്ഞു. എല്ലാ ജില്ലകളിലും ഷൂട്ടിംഗ് അസോസിയേഷനുകളുണ്ടെന്നും താല്പര്യമുള്ളവർക്ക് അംഗത്വമെടുത്ത് പരിശീലനം നടത്താമെന്നും കായികപ്രേമികളായ യുവതലമുറയ്ക്കായി വിദർശ ഓർമ്മിപ്പിച്ചു.
