ഇന്ത്യൻ ക്രിക്കറ്റ് ടീം മാപ്പ് പറയണമെന്ന വിചിത്ര ആവശ്യം സംഘാടകർ തള്ളിയതോടെ വേൾഡ് ചാമ്പ്യൻഷിപ്പ് ഓഫ് ലെജൻഡ്സിൽ (WCL) നിന്ന് പാകിസ്താൻ പിന്മാറി. ജമ്മു കശ്മീരിലെ പഹൽഗാമിൽ നടന്ന ഭീകരാക്രമണത്തെ തുടർന്ന് മുൻ സീസണിൽ പാകിസ്താനെതിരെയുള്ള മത്സരം ബഹിഷ്‌കരിക്കാൻ ഇന്ത്യ തീരുമാനിച്ചിരുന്നു. ഈ സംഭവത്തിൽ ഇന്ത്യൻ ടീം മാപ്പുപറയണമെന്നായിരുന്നു പാകിസ്താന്റെ പുതിയ നിർബന്ധം. എന്നാൽ ഈ ആവശ്യം ടൂർണമെന്റ് സംഘാടകർ നിഷ്കരുണം തള്ളിക്കളയുകയായിരുന്നു.
ഇന്ത്യൻ ബോർഡ് നിലപാട് കടുപ്പിച്ചതോടെയാണ് ടൂർണമെന്റിൽ നിന്ന് തന്നെ പിന്മാറാൻ പാകിസ്താൻ തീരുമാനിച്ചത്. ഇന്ത്യ ടൂർണമെന്റിൽ നിന്ന് വിട്ടുനിൽക്കാൻ തയ്യാറാണെങ്കിൽ തങ്ങൾക്ക് കളിക്കുന്നതിൽ എതിർപ്പില്ലെന്ന് പാകിസ്താൻ ക്രിക്കറ്റ് ബോർഡ് (PCB) സംഘാടകരെ അറിയിച്ചിരുന്നതായും വിവരമുണ്ട്. എന്നാൽ ഇന്ത്യക്ക് അനുകൂലമായ നിലപാടിൽ സംഘാടകർ ഉറച്ചുനിന്നതോടെ പാകിസ്താന്റെ ശ്രമങ്ങൾ പാഴായി.
അതേസമയം അപ്രതീക്ഷിതമായ ചില സാഹചര്യങ്ങൾ കാരണമാണ് പാകിസ്താൻ ടൂർണമെന്റിൽ നിന്ന് പിന്മാറിയതെന്നാണ് വേൾഡ് ചാമ്പ്യൻഷിപ്പ് ഓഫ് ലെജൻഡ്‌സ് അധികൃതരുടെ ഔദ്യോഗിക വിശദീകരണം. സംഭവത്തിൽ അന്താരാഷ്ട്ര ക്രിക്കറ്റ് ലോകത്തും സോഷ്യൽ മീഡിയയിലും വലിയ തോതിലുള്ള ചർച്ചകളാണ് ഉയരുന്നത്.
