സംസ്ഥാന സർക്കാരിന്റെ ധൂർത്തിനെതിരെയും ആഡംബര യാത്രകൾക്കെതിരെയും രൂക്ഷ വിമർശനവുമായി ബി.ജെ.പി സംസ്ഥാന അധ്യക്ഷൻ രാജീവ് ചന്ദ്രശേഖർ. കേരളത്തിൽ എന്താണ് നടക്കുന്നതെന്ന് മനസ്സിലാകുന്നില്ലെന്നും, ഒരു വശത്ത് മന്ത്രിമാർ റേഞ്ച് റോവർ കാറുകളിൽ പായുമ്പോൾ മറു വശത്ത് മുഖ്യമന്ത്രി സ്വകാര്യ ജെറ്റുകളിൽ പറക്കുകയാണെന്നും അദ്ദേഹം കുറ്റപ്പെടുത്തി. സാമ്പത്തിക പ്രതിസന്ധികൾക്കിടയിലും ഭരണാധികാരികൾ നടത്തുന്ന ഇത്തരം ആഡംബര യാത്രകൾ ജനങ്ങളെ വെല്ലുവിളിക്കുന്നതാണെന്ന് തിരുവനന്തപുരത്ത് മാധ്യമങ്ങളോട് സംസാരിക്കവെ രാജീവ് ചന്ദ്രശേഖർ പറഞ്ഞു.
അതോടൊപ്പം തിരുവനന്തപുരം നഗരസഭയിലെ ബി.ജെ.പി കൗൺസിലർ ആർ. ശ്രീലേഖയുടെ കാര്യത്തിലും അദ്ദേഹം വ്യക്തത വരുത്തി. കഠിനമായ ആരോഗ്യപ്രശ്നങ്ങൾ മൂലമാണ് ശ്രീലേഖ സ്ഥാനം ഒഴിയാൻ തീരുമാനിച്ചതെന്ന് രാജീവ് ചന്ദ്രശേഖർ പറഞ്ഞു. ഒരു കൗൺസിലർ എന്ന നിലയിലുള്ള ഭാരിച്ച ജോലിഭാരം നിലവിലെ ആരോഗ്യസ്ഥിതിയിൽ കാര്യക്ഷമമായി നിർവ്വഹിക്കാൻ കഴിയുമോ എന്ന ആശങ്കയാണ് രാജിക്ക് പിന്നിൽ. കേരളത്തിലെ ആദ്യത്തെ വനിതാ ഐ.പി.എസ് ഉദ്യോഗസ്ഥയായ ആർ. ശ്രീലേഖയോട് വലിയ ബഹുമാനവും മതിപ്പുമാണുള്ളതെന്നും, പാർട്ടിയിൽ അവർക്ക് അർഹമായ ഉയർന്ന പദവി തന്നെ എപ്പോഴുമുണ്ടാകുമെന്നും ബി.ജെ.പി സംസ്ഥാന അധ്യക്ഷൻ കൂട്ടിച്ചേർത്തു.
