2018ലെ ക്രിക്കറ്റ് ലോകത്തെ പിടിച്ചുകുലുക്കിയ പന്തുചുരണ്ടൽ വിവാദം ഓർമിപ്പിച്ച് ദക്ഷിണാഫ്രിക്കൻ ബ്രോഡ്കാസ്റ്റിങ് സംഘത്തിലെ മുൻ ഉദ്യോഗസ്ഥൻ ആൽവിൻ നായ്ക്കർ. ഓസ്‌ട്രേലിയൻ താരങ്ങൾ പന്തിൽ കൃത്രിമം കാട്ടിയ സംഭവം പുറത്തുകൊണ്ടുവരാൻ സഹായിച്ചത് തികച്ചും യാദൃച്ഛികമായ ഒരു ക്യാമറ ദൃശ്യമായിരുന്നുവെന്നാണ് അദ്ദേഹം വെളിപ്പെടുത്തിയത്. ഓസ്‌ട്രേലിയയും ദക്ഷിണാഫ്രിക്കയും വീണ്ടും ടെസ്റ്റ് പരമ്പരയിൽ ഏറ്റുമുട്ടാനിരിക്കെയാണ് വിവാദത്തിന്റെ പിന്നാമ്പുറങ്ങൾ വീണ്ടും ചർച്ചയാകുന്നത്.
മൂന്ന് മത്സരങ്ങളടങ്ങിയ പരമ്പരയിലെ ആദ്യ ടെസ്റ്റ് ഡർബനിലെ കിങ്‌സ്മീഡ് സ്റ്റേഡിയത്തിലാണ് ആരംഭിക്കുന്നത്. ലോക ടെസ്റ്റ് ചാമ്പ്യൻഷിപ്പ് പോയിന്റ് പട്ടികയിലെ മുൻനിര ടീമുകളാണ് ഓസ്‌ട്രേലിയയും ദക്ഷിണാഫ്രിക്കയും. കഴിഞ്ഞ ചക്രത്തിലെ ഫൈനലിൽ ഓസ്‌ട്രേലിയയെ തോൽപ്പിച്ച് കിരീടം നേടിയ ദക്ഷിണാഫ്രിക്കയാണ് നിലവിലെ ചാമ്പ്യന്മാർ. 2018ലെ വിവാദ പര്യടനത്തിനുശേഷം ദക്ഷിണാഫ്രിക്കൻ മണ്ണിൽ ഇരുടീമുകളും ആദ്യമായാണ് ടെസ്റ്റ് മത്സരത്തിൽ ഏറ്റുമുട്ടുന്നത്. 2018ൽ കേപ് ടൗണിൽ നടന്ന മൂന്നാം ടെസ്റ്റിലായിരുന്നു ക്രിക്കറ്റ് ലോകത്തെ ഞെട്ടിച്ച പന്തുചുരണ്ടൽ വിവാദം അരങ്ങേറിയത്.
ഓസ്‌ട്രേലിയൻ താരങ്ങളായ കാമറൂൺ ബാൻക്രോഫ്റ്റ്, ഡേവിഡ് വാർണർ, അന്നത്തെ നായകൻ സ്റ്റീവ് സ്മിത്ത് എന്നിവരാണ് സംഭവത്തിൽ കുറ്റക്കാരാണെന്ന് കണ്ടെത്തിയത്. വിവാദത്തെത്തുടർന്ന് സ്മിത്തിന് നായകസ്ഥാനം നഷ്ടമായി. വാർണർ പിന്നീട് അന്താരാഷ്ട്ര ക്രിക്കറ്റിൽനിന്ന് വിരമിച്ചപ്പോൾ ബാൻക്രോഫ്റ്റ് നിലവിൽ ഓസ്‌ട്രേലിയൻ ടീമിന്റെ പദ്ധതികളിലില്ല. അന്നത്തെ വിവാദ പര്യടനത്തിൽനിന്ന് ഇപ്പോഴും സജീവമായി തുടരുന്ന ഏക താരം സ്മിത്താണ്.
ദക്ഷിണാഫ്രിക്കയിലെ ടെലിവിഷൻ സംപ്രേഷണത്തിന്റെ ചുമതല വഹിച്ചിരുന്ന ആൽവിൻ നായ്ക്കറുടെ വെളിപ്പെടുത്തൽ പ്രകാരം, ഓസ്‌ട്രേലിയൻ താരങ്ങളുടെ നീക്കങ്ങൾ പുറത്തായത് ആസൂത്രിതമായ അന്വേഷണത്തിലൂടെയല്ല. ഒരു ക്യാമറാമാൻ യാദൃച്ഛികമായി പകർത്തിയ ദൃശ്യമാണ് വിവാദത്തിന് വഴിയൊരുക്കിയത്. റഗ്ബി, ഫുട്ബോൾ മത്സരങ്ങളുടെ സംപ്രേഷണത്തിൽ ക്യാമറകൾ ഏകോപിതമായാണ് പ്രവർത്തിക്കാറുള്ളതെന്നും കളി നിൽക്കുന്ന സമയങ്ങളിൽ ക്ലോസ്-അപ്പ് ദൃശ്യങ്ങളിലൂടെ സംഭവങ്ങൾ പ്രേക്ഷകരിലേക്ക് എത്തിക്കാറുണ്ടെന്നും നായ്ക്കർ വിശദീകരിച്ചു. എന്നാൽ ക്രിക്കറ്റിലെ ഈ സംഭവത്തിൽ ഓസ്‌ട്രേലിയൻ താരങ്ങൾ പന്തിൽ കൃത്രിമം കാണിക്കുന്നുണ്ടെന്ന് സംപ്രേഷണ സംഘത്തിന് നേരത്തെ സംശയമുണ്ടായിരുന്നില്ലെന്നും അദ്ദേഹം വ്യക്തമാക്കി.
പരമ്പരയിലെ ആദ്യ ടെസ്റ്റായ ഡർബൻ മത്സരത്തിൽ താരങ്ങളുടെ പെരുമാറ്റം മോശമായതും രണ്ടാം ടെസ്റ്റായ പോർട്ട് എലിസബത്തിലെ മത്സരത്തിലും തർക്കങ്ങളും പ്രകോപനങ്ങളും ഉണ്ടായതും നായ്ക്കർ ഓർത്തെടുത്തു. എന്നിരുന്നാലും പന്തുചുരണ്ടൽ നടക്കുന്നതായി ആരും സംപ്രേഷണ സംഘത്തിന്റെ ശ്രദ്ധയിൽപ്പെടുത്തിയിരുന്നില്ല. കേപ് ടൗൺ ടെസ്റ്റിനിടെ പന്ത് വിക്കറ്റ് കീപ്പറുടെ കൈകളിലെത്തിയശേഷം ബാൻക്രോഫ്റ്റിന് കൈമാറിയപ്പോൾ അദ്ദേഹം പന്ത് മിനുക്കുന്നതായി ക്യാമറയിൽ പതിഞ്ഞു. ആദ്യം ട്രൗസറിൽ ഉരച്ചാണ് പന്ത് മിനുക്കിയിരുന്നത്. എന്നാൽ അടുത്ത പന്തിൽ ട്രൗസറിൽ ഉരയ്ക്കാതെ കൈപ്പത്തിയിൽ പന്ത് ഉരയ്ക്കുന്നത് ശ്രദ്ധയിൽപ്പെട്ടതോടെ ക്യാമറാമാൻ ബാൻക്രോഫ്റ്റിൽത്തന്നെ ദൃശ്യം കേന്ദ്രീകരിച്ചു.
പന്ത് തിരികെ എറിഞ്ഞശേഷം ബാൻക്രോഫ്റ്റ് കൈ ട്രൗസറിന്റെ പോക്കറ്റിലേക്ക് കടത്തുന്നതും ക്യാമറാമാൻ പകർത്തി. തുടർന്ന് പോക്കറ്റിലേക്ക് സൂം ചെയ്ത ദൃശ്യങ്ങൾ സ്ലോ മോഷൻ ഓപ്പറേറ്റർ വീണ്ടും പരിശോധിച്ചു. അപ്പോഴാണ് പോക്കറ്റിനുള്ളിൽ മഞ്ഞനിറത്തിലുള്ള ഒരു വസ്തു കാണപ്പെട്ടത്. പന്തിന്റെ പ്രതലം ഉരയ്ക്കാൻ ഉപയോഗിച്ച സാൻഡ്പേപ്പറായിരുന്നു അത്. വലിയ സ്ക്രീനിൽ ദൃശ്യങ്ങൾ വീണ്ടും പ്രദർശിപ്പിച്ചപ്പോഴാണ് ബാൻക്രോഫ്റ്റ് താൻ ക്യാമറയിൽ കുടുങ്ങിയെന്ന് തിരിച്ചറിഞ്ഞത്. തുടർന്ന് സാൻഡ്പേപ്പർ പുറത്തെടുത്ത് അടിവസ്ത്രത്തിനുള്ളിൽ ഒളിപ്പിക്കുന്നതും ക്യാമറയിൽ പതിഞ്ഞതായി നായ്ക്കർ വെളിപ്പെടുത്തി. ഈ ദൃശ്യങ്ങൾ തത്സമയം സംപ്രേഷണം ചെയ്തതല്ലെന്നും പിന്നീട് റീപ്ലേ ആയാണ് പ്രദർശിപ്പിച്ചതെന്നും അദ്ദേഹം വ്യക്തമാക്കി.
സംഭവം പുറത്തുവന്നതോടെ ക്രിക്കറ്റ് ലോകത്ത് വലിയ വിവാദമുണ്ടായി. തത്സമയ ടെലിവിഷൻ അഭിമുഖത്തിനിടെ സ്മിത്ത് പൊട്ടിക്കരഞ്ഞുകൊണ്ട് സംഭവത്തിന്റെ ഉത്തരവാദിത്വം ഏറ്റെടുത്തിരുന്നു. എന്നാൽ അതുകൊണ്ടൊന്നും നടപടികളിൽ ഇളവുണ്ടായില്ല. അന്താരാഷ്ട്ര, ആഭ്യന്തര ക്രിക്കറ്റുകളിൽനിന്ന് സ്മിത്തിന് 12 മാസത്തെ വിലക്ക് ലഭിക്കുകയും നായകസ്ഥാനം നഷ്ടമാകുകയും ചെയ്തു.
വാർണറിനും 12 മാസത്തെ വിലക്ക് ലഭിച്ചു. കൂടാതെ ഓസ്‌ട്രേലിയൻ ക്രിക്കറ്റിൽ ഭാവിയിൽ ഒരു നേതൃത്വസ്ഥാനവും വഹിക്കരുതെന്ന വിലക്കും ഏർപ്പെടുത്തി. ബാൻക്രോഫ്റ്റിന് അന്താരാഷ്ട്ര, ആഭ്യന്തര ക്രിക്കറ്റുകളിൽനിന്ന് ഒമ്പത് മാസത്തെ വിലക്കാണ് ലഭിച്ചത്.
വർഷങ്ങൾ പിന്നിട്ടിട്ടും ക്രിക്കറ്റ് ചരിത്രത്തിലെ ഏറ്റവും വലിയ വിവാദങ്ങളിലൊന്നായി സാൻഡ്പേപ്പർ സംഭവം തുടരുകയാണ്. അന്ന് സംപ്രേഷണത്തിനിടെ യാദൃച്ഛികമായി പതിഞ്ഞ ഒരു ദൃശ്യം ഓസ്‌ട്രേലിയൻ ക്രിക്കറ്റിന്റെ ചരിത്രത്തിൽ തന്നെ നിർണായകമായ വഴിത്തിരിവായി മാറുകയായിരുന്നു.
