ചെന്നൈ സൂപ്പർ കിങ്സ് കേവലം ഒരു ക്രിക്കറ്റ് ടീം മാത്രമല്ലെന്നും തങ്ങളുടെ സാമൂഹിക പ്രതിബദ്ധതയിൽ എന്നും മുന്നിലാണെന്നും തെളിയിച്ച് ചെന്നൈ സൂപ്പർ കിങ്സ് (സിഎസ്കെ) മാനേജ്മെന്റ്. ചെന്നൈ സിറ്റി ട്രാഫിക് പൊലീസിന് സഹായഹസ്തവുമായി എത്തിയിരിക്കുകയാണ് സിഎസ്കെ. ട്രാഫിക് നിയന്ത്രണങ്ങളും സുരക്ഷാ പ്രവർത്തനങ്ങളും കൂടുതൽ ഊർജ്ജിതമാക്കുന്നതിനായി 1 കോടി രൂപ വിലമതിക്കുന്ന 63 ഇരുചക്ര വാഹനങ്ങളാണ് ടീം മാനേജ്മെന്റ് ചെന്നൈ സിറ്റി ട്രാഫിക് പൊലീസിന് സംഭാവന നൽകിയത്.
നഗരത്തിലെ ഗതാഗത മാനേജ്മെന്റ് കൂടുതൽ കാര്യക്ഷമമാക്കാനും പൊലീസിന്റെ സേവനം വേഗത്തിലാക്കാനും ഈ സംഭാവന സഹായിക്കും. മൈതാനത്തിന് പുറത്തും ജനങ്ങളുടെ ആവശ്യങ്ങൾക്കായി മുന്നിട്ടിറങ്ങുന്ന സിഎസ്കെയുടെ ഈ മാതൃകാപരമായ പ്രവർത്തനം ആരാധകർക്കിടയിലും കായിക ലോകത്തും വലിയ പ്രശംസ പിടിച്ചുപറ്റിയിട്ടുണ്ട്. ചെന്നൈ നഗരത്തോടും ഇവിടുത്തെ ജനങ്ങളോടുമുള്ള തങ്ങളുടെ ആഴത്തിലുള്ള ബന്ധം വ്യക്തമാക്കുന്നതാണ് സിഎസ്കെയുടെ ഈ പ്രവർത്തനം.
