2027-ൽ ദക്ഷിണാഫ്രിക്ക, സിംബാബ്‌വെ, നമീബിയ എന്നിവടങ്ങളിലായി നടക്കുന്ന ഏകദിന ലോകകപ്പിനെക്കുറിച്ചുള്ള തന്റെ നിരീക്ഷണങ്ങൾ പങ്കുവെച്ച് മുൻ ഇന്ത്യൻ താരം മുഹമ്മദ് കൈഫ്. ദക്ഷിണാഫ്രിക്കയിലെ പിച്ചുകൾ നിലവിൽ ബാറ്റിങ്ങിന് കൂടുതൽ അനുകൂലമായി മാറിയിട്ടുണ്ടെന്ന് അദ്ദേഹം ചൂണ്ടിക്കാട്ടി. അതിനാൽ തന്നെ ബൗളർമാർ മേധാവിത്വം പുലർത്താൻ സാധ്യത കുറവാണെന്നും മികച്ച ബൗളിംഗ് നിരയുള്ള ടീമുകൾക്കായിരിക്കും വിജയസാധ്യത കൂടുതലെന്നും കൈഫ് വ്യക്തമാക്കി.
സെമിഫൈനലുകളും ഫൈനലും ഉൾപ്പെടെ പ്രധാന മത്സരങ്ങൾക്ക് ദക്ഷിണാഫ്രിക്കയിലെ കേപ് ടൗൺ, സെഞ്ചൂറിയൻ, ജൊഹാനസ്ബർഗ് എന്നിവടങ്ങളാണ് വേദിയാകുന്നത്. ഇന്ത്യക്ക് ലോകകപ്പ് നേടണമെങ്കിൽ ബൗളിങ്ങും ഫീൽഡിങ്ങും കൂടുതൽ മെച്ചപ്പെടുത്തേണ്ടതുണ്ടെന്നും അദ്ദേഹം കൂട്ടിച്ചേർത്തു.
വിരാട് കോഹ്‌ലി, രോഹിത് ശർമ്മ എന്നിവരുടെ ലോകകപ്പ് പങ്കാളിത്തത്തെക്കുറിച്ച് ചർച്ചകൾ സജീവമാണെങ്കിലും അവർക്ക് നന്നായി തിളങ്ങാനാകുമെന്ന് കൈഫ് പ്രത്യാശ പ്രകടിപ്പിച്ചു. എന്നാൽ വിരാട് കോഹ്‌ലി എന്ന ഒറ്റ താരം കൊണ്ട് മാത്രം വിദേശത്ത് ലോകകപ്പ് നേടാനാകില്ലെന്നും മറ്റ് താരങ്ങളുടെ കൂട്ടായ പരിശ്രമം അത്യാവശ്യമാണെന്നും അദ്ദേഹം ഓർമ്മിപ്പിച്ചു. ഇന്ത്യ റണ്ണേഴ്‌സ് അപ്പായ 2003 ലോകകപ്പിന്റെ ഉദാഹരണമാണ് കൈഫ് ഇതിനായി ചൂണ്ടിക്കാണിച്ചത്.
അന്ന് സച്ചിൻ ടെണ്ടുൽക്കർ മാൻ ഓഫ് ദി ടൂർണമെന്റ് ആയെങ്കിലും യുവരാജ് സിംഗ്, രാഹുൽ ദ്രാവിഡ്, വിരേന്ദർ സെവാഗ്, ആശിഷ് നെഹ്‌റ, സഹീർ ഖാൻ, ജവഗൽ ശ്രീനാഥ് തുടങ്ങിയവരും നായകൻ സൗരവ് ഗാംഗുലിയും ഒരുപോലെ തിളങ്ങിയതുകൊണ്ടാണ് ഇന്ത്യ ഫൈനൽ വരെ എത്തിയതെന്ന് അദ്ദേഹം ഓർമ്മിപ്പിച്ചു. 2027 ഒക്ടോബർ രണ്ട് മുതൽ നവംബർ 21 വരെയാണ് ഏകദിന ലോകകപ്പ് പോരാട്ടങ്ങൾ നടക്കുന്നത്.
