ഗുജറാത്തിലെ ഭരണകേന്ദ്രമായ ഗാന്ധിനഗർ മുൻസിപ്പൽ കോർപ്പറേഷൻ (GMC) തെരഞ്ഞെടുപ്പിൽ ബിജെപിക്ക് തകർപ്പൻ വിജയം. ആകെയുള്ള 44 സീറ്റുകളിൽ 38 എണ്ണവും തൂത്തുവാരിയാണ് ബിജെപി ഭരണം നിലനിർത്തിയത്. ചൊവ്വാഴ്ച സംസ്ഥാന ഇലക്ഷൻ കമ്മീഷൻ പുറത്തുവിട്ട തെരഞ്ഞെടുപ്പ് ഫലങ്ങളിലാണ് ബിജെപിയുടെ വൻ മുന്നേറ്റം വ്യക്തമാകുന്നത്. പ്രധാന എതിരാളികളായ കോൺഗ്രസിന് വെറും അഞ്ച് സീറ്റുകൾ കൊണ്ട് തൃപ്തിപ്പെടേണ്ടി വന്നപ്പോൾ, കഴിഞ്ഞ തെരഞ്ഞെടുപ്പിൽ അക്കൗണ്ട് തുറന്ന ആം ആദ്മി പാർട്ടി (ആപ്പ്) ഇത്തവണ ചിത്രത്തിലേ ഇല്ലാതെ ഒരു സീറ്റ് പോലും നേടാനാകാതെ നാണംകെട്ടു. ഒരു സീറ്റിൽ സ്വതന്ത്ര സ്ഥാനാർത്ഥിയാണ് വിജയിച്ചത്.
ഗാന്ധിനഗർ കോർപ്പറേഷനിലെ 11 വാർഡുകളിലായി 44 സീറ്റുകളിലേക്ക് 130 സ്ഥാനാർത്ഥികളാണ് മത്സരരംഗത്തുണ്ടായിരുന്നത്. ചൊവ്വാഴ്ച രാവിലെ ഒമ്പത് മണിയോടെ ആരംഭിച്ച വോട്ടെണ്ണലിൽ തുടക്കം മുതൽ ബിജെപി വ്യക്തമായ മേധാവിത്വം നിലനിർത്തിയിരുന്നു. ആകെ 2.59 ലക്ഷത്തോളം വോട്ടർമാരുള്ള ഗാന്ധിനഗറിൽ 59.25 ശതമാനം പോളിംഗ് ആണ് രേഖപ്പെടുത്തിയത്. പ്രതിപക്ഷത്തിന്റെ എല്ലാ പ്രചാരണങ്ങളെയും തള്ളിക്കളഞ്ഞ് ബിജെപിയുടെ വികസന നയങ്ങൾക്കാണ് ജനങ്ങൾ വോട്ട് നൽകിയതെന്ന് തെരഞ്ഞെടുപ്പ് ഫലം വ്യക്തമാക്കുന്നു.
നേരത്തെ 2021 ഒക്ടോബറിൽ നടന്ന ഗാന്ധിനഗർ കോർപ്പറേഷൻ തെരഞ്ഞെടുപ്പിൽ 44-ൽ 41 സീറ്റുകൾ നേടി ബിജെപി മികച്ച വിജയം കൈവരിച്ചിരുന്നു. അന്ന് കോൺഗ്രസ് രണ്ടും ആം ആദ്മി പാർട്ടി ഒരു സീറ്റുമായിരുന്നു നേടിയത്. എന്നാൽ ഇത്തവണ വീണ്ടും മികച്ച വിജയം ആവർത്തിക്കാൻ കഴിഞ്ഞത് സംസ്ഥാനത്ത് ബിജെപിയുടെ ജനപ്രീതി കൂടുതൽ ശക്തമാണെന്ന് തെളിയിക്കുന്നതാണെന്ന് പാർട്ടി നേതൃത്വം വ്യക്തമാക്കി. തോൽവിയോടെ പ്രതിപക്ഷ പാർട്ടികളായ കോൺഗ്രസിനും ആപ്പിനും ഗുജറാത്ത് രാഷ്ട്രീയത്തിൽ വൻ തിരിച്ചടിയാണ് നേരിട്ടിരിക്കുന്നത്.
