വേൾഡ് ടി20 കോണ്ടിനെന്റ് കപ്പ് സംഘാടകർക്കെതിരെ നിയമനടപടി സ്വീകരിക്കുമെന്ന് മുൻ ഇന്ത്യൻ ഓപ്പണർ ശിഖർ ധവാൻ. ടൂർണമെന്റിലെ കളിക്കാരുടെ പട്ടികയിൽ തന്റെ അനുമതിയില്ലാതെ പേര് ഉൾപ്പെടുത്തിയതിനെ തുടർന്നാണ് സംഘാടകർക്കെതിരെ ആഞ്ഞടിച്ച് ധവാൻ രംഗത്തെത്തിയത്. ടൂർണമെന്റിൽ താൻ പങ്കാളിയാകുന്നുവെന്ന വ്യാജ വാർത്തകളിൽ വീഴരുതെന്നും അത് പ്രചരിപ്പിക്കരുതെന്നും അദ്ദേഹം ആരാധകരോട് അഭ്യർത്ഥിച്ചു.
പാകിസ്ഥാൻ താരങ്ങൾ ഉൾപ്പെടെ കളിക്കുന്ന ‘ഏഷ്യ വാരിയേഴ്‌സ്’ ടീമിനായി ധവാൻ കളിക്കുമെന്ന രീതിയിലായിരുന്നു വാർത്തകൾ പ്രചരിച്ചിരുന്നത്. എന്നാൽ ടൂർണമെന്റുമായി തനിക്ക് യാതൊരു ബന്ധവുമില്ലെന്ന് വ്യക്തമാക്കി ധവാൻ രംഗത്തെത്തുകയായിരുന്നു. തന്റെ അനുമതിയോ അറിവോ ഇല്ലാതെയാണ് സംഘാടകർ പേര് ഉപയോഗിച്ചതെന്നും, ഇതിനെതിരെ തന്റെ ലീഗൽ ടീം ആവശ്യമായ നിയമനടപടികൾ സ്വീകരിക്കുമെന്നും അദ്ദേഹം എക്‌സ് പോസ്റ്റിലൂടെ വ്യക്തമാക്കി. ഇത്തരം വ്യാജ വാർത്തകൾ പ്രചരിപ്പിക്കരുതെന്ന് മാധ്യമങ്ങളോടും ആരാധകരോടും അദ്ദേഹം ആവശ്യപ്പെട്ടു.
ധവാന് പുറമെ മുൻ ഇന്ത്യൻ താരങ്ങളായ രാഹുൽ ശർമ്മ, ഗുർകീരത് സിംഗ് മാൻ, അഭിമന്യു മിഥുൻ എന്നിവരുടെ പേരുകളും ഏഷ്യ വാരിയേഴ്‌സ് ടീമിൽ ഉൾപ്പെട്ടിരുന്നു. സഹീൽ തൻവീർ, ഇഫ്തിഖാർ അഹമ്മദ്, മുഹമ്മദ് ഇമ്രാൻ ഖാൻ തുടങ്ങിയ നിരവധി പാകിസ്ഥാൻ താരങ്ങളും ഈ 24 അംഗ ടീമിലുണ്ടായിരുന്നു. പാകിസ്ഥാൻ താരങ്ങൾ ഉൾപ്പെടുന്ന ടീമിൽ ധവാന്റെ പേര് വന്നത് ക്രിക്കറ്റ് ആരാധകരിൽ വലിയ ആശ്ചര്യം സൃഷ്ടിച്ചിരുന്നു. നേരത്തെ അതിർത്തിയിലെ ഭീകരാക്രമണങ്ങളുടെ പശ്ചാത്തലത്തിലും പാകിസ്ഥാനെതിരെ കടുത്ത നിലപാട് പരസ്യമായി സ്വീകരിച്ചിട്ടുള്ള താരമാണ് ശിഖർ ധവാൻ.
