ബംഗ്ലാദേശ് തലസ്ഥാനമായ ധാക്കയിലെ ജഗന്നാഥ് സർവ്വകലാശാലയിലെ ക്ഷേത്രത്തിന് തൊട്ടടുത്ത് ഗോമാംസം പാചകം ചെയ്തതിനെ തുടർന്നുണ്ടായ തർക്കം കൂടുതൽ രൂക്ഷമാകുന്നു. ഒക്ടോബർ പന്ത്രണ്ടിന് ഇസ്ലാമിക് ഹിസ്റ്ററി വിഭാഗത്തിലെ വിദ്യാർത്ഥികൾ ക്ഷേത്രമതിലിനോട് ചേർന്ന് മാട്ടിറച്ചി വിഭവങ്ങൾ ഉണ്ടാക്കിയതും ക്ഷേത്രത്തിലെ ഇഷ്ടികകൾ അടുപ്പുണ്ടാക്കാൻ ഉപയോഗിച്ചതുമാണ് ആദ്യ തർക്കത്തിന് വഴിവെച്ചത്. ഹൈന്ദവ വിദ്യാർത്ഥികളുടെ ശക്തമായ പ്രതിഷേധത്തെ തുടർന്ന് പാചകസ്ഥലം മാറ്റിയെങ്കിലും ദുർഗ്ഗാ പൂജയുടെ തുടക്കദിനമായ മഹാഷഷ്ഠിയിൽ ക്യാമ്പസിനുള്ളിൽ പശുവിനെ അറുത്ത് വീണ്ടും ബീഫ് ഫെസ്റ്റ് നടത്തുവാൻ ഒരു വിഭാഗം വിദ്യാർത്ഥികൾ തീരുമാനിച്ചതോടെ സ്ഥിതിഗതികൾ വഷളായിരിക്കുകയാണ്.
ക്യാമ്പസിനുള്ളിലെ സമാധാനാന്തരീക്ഷം നിലനിർത്തുന്നതിനായി മൃഗങ്ങളെ അറുക്കുന്നത് നിരോധിച്ച് സർവ്വകലാശാല അധികൃതർ ആദ്യം ഉത്തരവിറക്കിയിരുന്നു. എന്നാൽ ഇതിനെതിരെ ഒരു വിഭാഗം വിദ്യാർത്ഥികൾ രംഗത്തെത്തുകയും പ്രതിഷേധം ശക്തമാക്കുകയും ചെയ്തതോടെ സർവ്വകലാശാല ഭരണകൂടം ആദ്യ ഉത്തരവ് പിൻവലിക്കുകയാണുണ്ടായത്. മറ്റ് വിദ്യാർത്ഥികളുടെ ആചാരങ്ങൾക്കും വികാരങ്ങൾക്കും തടസ്സം നിൽക്കാത്ത രീതിയിൽ ക്യാമ്പസിനുള്ളിൽ പരിപാടികൾ നടത്താമെന്ന് സർവ്വകലാശാല പുതിയ വിശദീകരണം നൽകിയതോടെ സംഘർഷാവസ്ഥ ഇരട്ടിയായി.
ബംഗ്ലാദേശിലെ ഏറ്റവും വലിയ ന്യൂനപക്ഷ ആഘോഷമായ ദുർഗ്ഗാ പൂജയുടെ സമയത്ത് മനഃപൂർവം അപമാനിക്കാനും ഭയപ്പെടുത്താനും വേണ്ടിയാണ് ഇത്തരമൊരു നീക്കം നടക്കുന്നതെന്ന് ഹൈന്ദവ വിദ്യാർത്ഥി സംഘടനകൾ ആരോപിക്കുന്നു. ക്ഷേത്രങ്ങളുടെ സുരക്ഷ ഉറപ്പാക്കണമെന്നും കുറ്റക്കാർക്കെതിരെ നിഷ്പക്ഷമായ അന്വേഷണം വേണമെന്നും ആവശ്യപ്പെട്ട് വിദ്യാർത്ഥികൾ മനുഷ്യച്ചങ്ങല തീർക്കുകയും വലിയ പ്രതിഷേധ പ്രകടനങ്ങൾ നടത്തുകയും ചെയ്തു. നിലവിലെ സംഘർഷാവസ്ഥ കണക്കിലെടുത്ത് ക്യാമ്പസിലും പരിസര പ്രദേശങ്ങളിലും സുരക്ഷ ഉറപ്പാക്കാൻ അധികൃതർ നടപടി ആരംഭിച്ചിട്ടുണ്ട്.
