ലോക്‌സഭാ പ്രതിപക്ഷ നേതാവ് രാഹുൽ ഗാന്ധിക്കെതിരെ നടത്തിയ പരാമർശത്തിൽ മുൻ ഡിജിപിയും ബിജെപി സംസ്ഥാന വൈസ് പ്രസിഡന്റുമായ ആർ. ശ്രീലേഖയ്ക്കെതിരെ പോലീസ് കേസെടുത്തു. പുനലൂരിൽ ബിജെപി സംഘടിപ്പിച്ച പരിപാടിയിലെ പ്രസംഗത്തിൻ്റെ അടിസ്ഥാനത്തിൽ പുനലൂർ പോലീസാണ് നടപടി സ്വീകരിച്ചത്. കലാപമുണ്ടാക്കണമെന്ന ഉദ്ദേശ്യത്തോടെ ബോധപൂർവം പ്രകോപനം സൃഷ്ടിക്കൽ തുടങ്ങിയ കുറ്റങ്ങൾ ഉൾപ്പെടുന്ന ഭാരതീയ ന്യായ സംഹിത (ബിഎൻഎസ്) 192-ാം വകുപ്പ് പ്രകാരമാണ് എഫ്ഐആർ രജിസ്റ്റർ ചെയ്തിരിക്കുന്നത്.
മുഖ്യ തിരഞ്ഞെടുപ്പ് കമ്മീഷണർ ജ്ഞാനേഷ് കുമാറിനെതിരെ പ്രതിപക്ഷ പാർട്ടികൾ ന്യൂഡൽഹിയിൽ നടത്തിയ പ്രതിഷേധ പ്രകടനങ്ങളെ വിമർശിക്കവെയായിരുന്നു ശ്രീലേഖയുടെ പരാമർശം. ഡൽഹിയിലെ സമരത്തിനിടെ രാഹുൽ ഗാന്ധിയുടെ പെരുമാറ്റം ലഹരി ഉപയോഗിച്ചതിലൂടെയുണ്ടാകുന്ന വെപ്രാളം മൂലമാണെന്നും, ലഹരി ഉള്ളിൽ ചെന്ന ശേഷമുള്ള ‘താണ്ഡവമാണ്’ അദ്ദേഹം അവിടെ കാണിക്കുന്നതെന്നും ശ്രീലേഖ പ്രസംഗത്തിൽ ആരോപിച്ചിരുന്നു.
ശ്രീലേഖയുടെ പരാമർശത്തിനെതിരെ കോൺഗ്രസ് നേതാക്കൾ ശക്തമായ വിമർശനവുമായി രംഗത്തെത്തി. ആർ. ശ്രീലേഖ അടിയന്തരമായി പ്രസ്താവന പിൻവലിച്ച് മാപ്പ് പറയണമെന്ന് രമേശ് ചെന്നിത്തല ആവശ്യപ്പെട്ടു. ശ്രീലേഖയ്ക്ക് എന്തോ ഗുരുതരമായ പ്രശ്നങ്ങളുണ്ടെന്ന് തോന്നുന്നുവെന്നും അദ്ദേഹം വിമർശിച്ചു. സംഭവത്തിൽ സമഗ്രമായ അന്വേഷണം നടത്തുമെന്നും പ്രസംഗത്തിന്റെ വീഡിയോ ദൃശ്യങ്ങൾ ശേഖരിച്ച് കൂടുതൽ തുടർനടപടികളിലേക്ക് കടക്കുമെന്നും പോലീസ് വ്യക്തമാക്കി.
