തിരുവനന്തപുരം: കോവിഡ് കാലത്ത് മുൻ മുഖ്യമന്ത്രി പിണറായി വിജയനും കുടുംബാംഗങ്ങളും അന്നത്തെ മന്ത്രിമാരുടെ സ്റ്റാഫുകളും പാർട്ടി സെക്രട്ടറിയും ചേർന്ന് ഭക്ഷണം കഴിച്ചതിന്റെയും ജ്യൂസ് കുടിച്ചതിന്റെയും ഇനത്തിൽ ബാക്കിയുള്ള കടം നാലര ലക്ഷം രൂപയാണെന്ന് ആരോഗ്യമന്ത്രി കെ. മുരളീധരൻ നിയമസഭയിൽ വെളിപ്പെടുത്തി. എന്നാൽ ഈ കടങ്ങളെല്ലാം നിലവിലെ സർക്കാർ തന്നെ വീട്ടിക്കൊള്ളാമെന്നും സഭയിൽ മറുപടി നൽകവെ മന്ത്രി വ്യക്തമാക്കി. പതിനാറാം നിയമസഭയുടെ രണ്ടാം സമ്മേളനത്തിന്റെ ഭാഗമായി നടന്ന അടിയന്തര പ്രമേയ ചർച്ചയിൽ സംസാരിക്കുകയായിരുന്നു അദ്ദേഹം.
എസ്എംഎ (Spinal Muscular Atrophy) മരുന്ന് പരീക്ഷണവുമായി ബന്ധപ്പെട്ട് രോഗികൾക്കും രക്ഷിതാക്കൾക്കും പൊതുജനങ്ങൾക്കും ഉണ്ടാകുന്ന കടുത്ത ആശങ്കകൾ ചർച്ച ചെയ്യാനായി സഭാ നടപടികൾ നിർത്തിവെക്കണമെന്ന് ആവശ്യപ്പെട്ടായിരുന്നു പ്രതിപക്ഷം അടിയന്തര പ്രമേയം കൊണ്ടുവന്നത്. ഇതിന് മറുപടി നൽകവേയാണ് മുൻ സർക്കാരിന്റെ കാലത്തെ ധൂർത്തുകളും സാമ്പത്തിക ക്രമക്കേടുകളും ചൂണ്ടിക്കാട്ടി ആരോഗ്യമന്ത്രി പ്രതിപക്ഷത്തിനെതിരെ രൂക്ഷമായ ആക്രമണം അഴിച്ചുവിട്ടത്.
കേരള മെഡിക്കൽ സർവീസസ് കോർപ്പറേഷന് (KMSC) മുൻ സർക്കാരിന്റെ കാലത്ത് 900 കോടി രൂപയുടെ ഭീമമായ കടമാണ് വരുത്തിവെച്ചതെന്ന് മന്ത്രി ആരോപിച്ചു. ഇതിനുപുറമെ, എസ്എംഎ ബാധിതർക്ക് മരുന്ന് വിതരണം ചെയ്ത നാക്കോ കമ്പനിയിൽ നിന്ന് ഒന്നരക്കോടി രൂപ പാർട്ടി ഫണ്ടിലേക്ക് കൈപ്പറ്റിയെന്നും അദ്ദേഹം ആരോപിച്ചു. ഇവർ ആദ്യ ഗഡുവായി 30 ലക്ഷം വീതം ഒരു കോടി രൂപ വാങ്ങിയെന്നും, പിന്നീട് എം.എ. ബേബി നൽകിയ റിപ്പോർട്ടിന്റെ അടിസ്ഥാനത്തിൽ ഇതേ കമ്പനിയിൽ നിന്ന് 50 ലക്ഷം രൂപ കൂടി വാങ്ങിയെന്നും തിരഞ്ഞെടുപ്പ് കമ്മീഷന് സമർപ്പിച്ച റിപ്പോർട്ടിൽ ഇത് വ്യക്തമാക്കുന്നുണ്ടെന്നും മന്ത്രി സഭയെ അറിയിച്ചു. ആരോഗ്യ മേഖലയിലെ പ്രശ്നങ്ങളിൽ മറുപടി പറയേണ്ടവർ മുൻകാലത്ത് വരുത്തിവെച്ച കുടിശ്ശികകളും അഴിമതികളും മറച്ചുവെച്ചാണ് ആരോപണങ്ങൾ ഉന്നയിക്കുന്നതെന്ന് മന്ത്രി വിമർശിച്ചു.
