ഐ.പി.എല്ലിൽ ചെന്നൈ സൂപ്പർ കിങ്സിനൊപ്പം കളിച്ച കാലത്തെ അനുഭവങ്ങളും മുൻ ഇന്ത്യൻ നായകൻ എം.എസ്. ധോണിയുടെ നേതൃപാടശത്തെക്കുറിച്ചും മനസ്സ് തുറന്ന് ദക്ഷിണാഫ്രിക്കൻ താരം ഫാഫ് ഡു പ്ലെസിസ്. ധോണിയുടെ തന്ത്രപരമായ മികവും മത്സരത്തിനിടയിലെ പെട്ടെന്നുള്ള തീരുമാനങ്ങളെടുക്കാനുള്ള കഴിവും താൻ തന്റെ നായകത്വത്തിലേക്ക് പകർത്താൻ ആഗ്രഹിക്കുന്നതായി ഡു പ്ലെസിസ് വ്യക്തമാക്കി. ചെന്നൈയ്ക്കായി ഒൻപത് സീസണുകളിൽ കളിച്ച ഡു പ്ലെസിസ് 154 മത്സരങ്ങളിൽ നിന്നായി 4,773 റൺസ് നേടിയിട്ടുണ്ട്. 2022-ൽ റോയൽ ചലഞ്ചേഴ്സ് ബെംഗളൂരുവിന്റെ നായകനാകുന്നതിന് മുൻപാണ് അദ്ദേഹം ചെന്നൈയുടെ ഭാഗമായിരുന്നത്. മൂന്ന് തവണ ഐ.പി.എൽ കിരീടങ്ങളും അദ്ദേഹം ചെന്നൈയ്ക്കൊപ്പം നേടിയിട്ടുണ്ട്.
പ്രഖർ ഗുപ്ത പോഡ്‌കാസ്റ്റിൽ സംസാരിക്കവെയാണ് ധോണിയെ മറ്റ് ക്യാപ്റ്റൻമാരിൽ നിന്ന് വ്യത്യസ്തനാക്കുന്നത് എന്താണെന്ന് ഡു പ്ലെസിസ് വിശദീകരിച്ചത്. മത്സരത്തിന് മുൻപ് വലിയ പ്ലാനിങ്ങുകൾക്ക് മുതിരാതെ, കളിക്കളത്തിലെ സാഹചര്യങ്ങൾക്ക് അനുസരിച്ച് തന്ത്രങ്ങൾ മെനയുന്നതാണ് ധോണിയുടെ രീതിയെന്ന് അദ്ദേഹം പറഞ്ഞു. എത്ര സമ്മർദ്ദമുള്ള സാഹചര്യത്തിലും ശാന്തനായി നിന്ന് കളി കൃത്യമായി വിലയിരുത്താനുള്ള ധോണിയുടെ കഴിവ് അത്ഭുതപ്പെടുത്തുന്നതാണെന്നും ഈ ഗുണം തന്റെ ക്യാപ്റ്റൻസിയിലും കൊണ്ടുവരാൻ ആഗ്രഹിക്കുന്നുവെന്നും ഡു പ്ലെസിസ് കൂട്ടിച്ചേർത്തു.
അതേസമയം, 2018 മാർച്ച് 24-ന് കേപ്ടൗൺ ടെസ്റ്റിൽ ഉണ്ടായ പന്ത് ചുരണ്ടൽ വിവാദത്തിന് പിന്നാലെ സ്റ്റീവ് സ്മിത്ത് കടുത്ത സമ്മർദ്ദവും വിമർശനങ്ങളും നേരിട്ട സമയത്ത് തനിക്കുണ്ടായ അനുഭവങ്ങളും ഡു പ്ലെസിസ് പങ്കുവെച്ചു. അന്ന് ഓസ്ട്രേലിയക്കെതിരെ കളിച്ച ദക്ഷിണാഫ്രിക്കൻ ടീമിന്റെ നായകനായിരുന്നു ഡു പ്ലെസിസ്. 2016-ൽ ഹോബാർട്ടിൽ വെച്ച് തനിക്കെതിരെയും സമാനമായ രീതിയിൽ പന്ത് ചുരണ്ടൽ ആരോപണം ഉയർന്നിരുന്നതിനാൽ സ്മിത്ത് അനുഭവിച്ച മാനസിക ബുദ്ധിമുട്ടുകളും മാധ്യമങ്ങളുടെ ഭാഗത്തുനിന്നുള്ള ആക്രമണങ്ങളും തനിക്ക് നന്നായി മനസ്സിലാക്കാൻ കഴിയുമായിരുന്നുവെന്ന് അദ്ദേഹം വ്യക്തമാക്കി.
അന്ന് കളിക്ക് ശേഷം മാധ്യമങ്ങൾക്ക് മുന്നിൽ സംസാരിക്കവെ താനാണ് എല്ലാത്തിനും ഉത്തരവാദിയെന്ന് സ്മിത്ത് പറഞ്ഞപ്പോൾ അത്ഭുതപ്പെട്ടുപോയെന്നും ഡു പ്ലെസിസ് ഓർത്തെടുത്തു. സ്മിത്ത് വ്യക്തിപരമായി അത്തരം തെറ്റൊന്നും ചെയ്തിട്ടില്ലെന്നിരിക്കെ അദ്ദേഹം എന്തിനാണ് ആ ഉത്തരവാദിത്തം മുഴുവൻ ഏറ്റെടുക്കുന്നതെന്ന് തങ്ങൾ ചിന്തിച്ചിരുന്നു. മാധ്യമങ്ങളുടെ ഭാഗത്തുനിന്നുള്ള കടുത്ത സമ്മർദ്ദം സ്മിത്തിനെ വല്ലാതെ ഉലച്ചിരുന്നുവെന്നും, തന്റെ മുൻകാല അനുഭവവുമായി സാദൃശ്യമുള്ളതുകൊണ്ട് തന്നെ ആ ഘട്ടത്തിൽ സ്മിറ്റിനോട് പൂർണ്ണമായ സഹാനുഭൂതി തോന്നിയിരുന്നുവെന്നും അദ്ദേഹം കൂട്ടിച്ചേർത്തു.
