2020-21 ലെ ഓസ്ട്രേലിയൻ പര്യടനത്തിലെ അഡ്ലെയ്ഡ് ടെസ്റ്റിലെ വലിയ തോൽതിക്ക് ശേഷം ഇന്ത്യൻ ടീമിന്റെ നായകസ്ഥാനം ഏറ്റെടുത്തപ്പോൾ തനിക്ക് കടുത്ത ഭയമുണ്ടായിരുന്നുവെന്ന് വെളിപ്പെടുത്തി മുൻ താരം അജിങ്ക്യ രഹാനെ. ഒന്നാം ടെസ്റ്റിൽ വെറും 36 റൺസിന് പുറത്തായതിന് പിന്നാലെ ക്യാപ്റ്റൻ സ്ഥാനം ഏറ്റെടുത്ത താൻ, സഹതാരങ്ങളുടെയും ഓസ്ട്രേലിയൻ ടീമിന്റെയും മാധ്യമങ്ങളുടെയും മുന്നിൽ മാത്രം ആത്മവിശ്വാസം അഭിനയിക്കുകയായിരുന്നു എന്ന് അദ്ദേഹം വ്യക്തമാക്കി. വിരാട് കോഹ്‌ലി നാട്ടിലേക്ക് മടങ്ങിയതിനെത്തുടർന്നാണ് രഹാനെ ശേഷിക്കുന്ന മൂന്ന് ടെസ്റ്റുകളിൽ ടീമിനെ നയിച്ചത്. ഇന്ത്യ 4-0 ന് പരമ്പര തോൽക്കുമെന്ന തരത്തിലുള്ള പ്രചാരണങ്ങൾ നടന്നിരുന്ന ആ സമയത്ത് താൻ കടുത്ത മാനസിക സമ്മർദ്ദത്തിലായിരുന്നുവെന്നും എന്നാൽ ഒരു കായികതാരം എന്ന നിലയിൽ അതെല്ലാം അതിജീവിക്കാൻ പഠിച്ചുവെന്നും അദ്ദേഹം ഓർമ്മിച്ചു.
പരമ്പരയിലെ ആദ്യ മത്സരത്തിൽ പിങ്ക് ബോൾ ടെസ്റ്റിൽ ഇന്ത്യ ഒന്നാം ഇന്നിംഗ്സിൽ ലീഡ് നേടിയിട്ടും മൂന്നാം ദിവസം രാവിലെ 36 റൺസിന് പുറത്താവുകയും, തുടർന്ന് ഓസ്ട്രേലിയ രണ്ട് വിക്കറ്റ് നഷ്ടത്തിൽ ലക്ഷ്യം കാണുകയും ചെയ്തിരുന്നു. ഈ ദയനീയ തോൽവിക്ക് ശേഷമാണ് രഹാനെ രണ്ടാം ടെസ്റ്റ് മുതൽ ടീമിന്റെ നായകനാകുന്നത്. റിസൾട്ടിനെക്കുറിച്ച് ചിന്തിക്കാതെ പരമാവധി ആസ്വദിച്ച് കളിക്കാനാണ് താൻ ടീം അംഗങ്ങളോട് ആവശ്യപ്പെട്ടതെന്ന് അദ്ദേഹം പറഞ്ഞു. രാജ്യത്തിനായി കളിക്കാൻ അവസരം ലഭിച്ച ഭാഗ്യവാൻമാരാണ് നമ്മൾ ഓരോരുത്തരും എന്നും, ഫലത്തെക്കുറിച്ച് ആകുലപ്പെടാതെ പരസ്പരം സഹായിച്ച് കളിക്കാനാണ് താൻ സഹതാരങ്ങളോട് പറഞ്ഞതെന്നും രഹാനെ വ്യക്തമാക്കി. താൻ എല്ലാ ഉത്തരവാദിത്തങ്ങളും ഏറ്റെടുക്കാമെന്ന് ഉറപ്പ് നൽകിയതായും അദ്ദേഹം കൂട്ടിച്ചേർത്തു.
മെൽബണിൽ നടന്ന രണ്ടാം ടെസ്റ്റിൽ രഹാനെ നേടിയ തകർപ്പൻ സെഞ്ച്വറിയാണ് (112) പരമ്പരയിൽ ഇന്ത്യയുടെ ഉയിർത്തെഴുന്നേശേഷത്തിന് അടിത്തറയിട്ടത്. പരിക്കുകൾ മൂലം പ്രധാന താരങ്ങളെല്ലാം പുറത്തിരുന്നിട്ടും പിന്നീട് ശക്തമായ തിരിച്ചുവരവ് നടത്തിയ ഇന്ത്യ 2-1 എന്ന നിലയിൽ പരമ്പര സ്വന്തമാക്കുകയായിരുന്നു. ഇന്ത്യൻ ക്രിക്കറ്റ് ചരിത്തിലെ തന്നെ ഏറ്റവും മികച്ചതും അവിശ്വസനീയവുമായ വിജയങ്ങളിലൊന്നായാണ് ഈ പര്യടനം വിലയിരുത്തപ്പെടുന്നത്.
