സമാജ്‌വാദി പാർട്ടി മുതിർന്ന നേതാവ് ആസം ഖാൻ സ്ഥാപിച്ച ഉത്തർപ്രദേശിലെ മുഹമ്മദ് അലി ജൗഹർ സർവകലാശാലയുടെ 1,170 കോടി രൂപ വിപണിമൂല്യമുള്ള ഭൂമിയും കെട്ടിടങ്ങളും എൻഫോഴ്സ്മെന്റ് ഡയറക്ടറേറ്റ് താൽക്കാലികമായി കണ്ടുകെട്ടി. കള്ളപ്പണം വെളുപ്പിക്കൽ നിരോധന നിയമപ്രകാരമാണ് ഇ.ഡി ഈ കടുത്ത നടപടി സ്വീകരിച്ചത്. സമാജ്‌വാദി പാർട്ടി ഭരണകാലത്ത് അഖിലേഷ് യാദവ് സർക്കാരിൽ മന്ത്രിയായിരിക്കെ ആസം ഖാൻ തന്റെ അധികാരം ദുരുപയോഗം ചെയ്ത് പൊതുമുതലും സർക്കാർ ഫണ്ടും സ്വകാര്യ സർവകലാശാലയിലേക്ക് വഴിതിരിച്ചുവിട്ടു എന്നാണ് പ്രധാന കണ്ടെത്തൽ. അസീം നഗർ പോലീസ് സ്റ്റേഷനിൽ രജിസ്റ്റർ ചെയ്ത നിരവധി പരാതികളുടെയും എഫ്.ഐ.ആറുകളുടെയും അടിസ്ഥാനത്തിലാണ് കേന്ദ്ര ഏജൻസി അന്വേഷണം ആരംഭിച്ചത്.
സർക്കാർ പദ്ധതിയെന്ന വ്യാജേന പൊതുമരാമത്ത് ഫണ്ട് ഉപയോഗിച്ച് യൂണിവേഴ്സിറ്റി ക്യാമ്പസിനുള്ളിൽ ഹോസ്റ്റലുകളും ആശുപത്രി ബ്ലോക്കുകളും പന്തലുകളും നിർമ്മിച്ചതായി ഇ.ഡി വ്യക്തമാക്കുന്നു. കരാറുകാർക്ക് നൽകിയ സർക്കാർ പദ്ധതികളുടെ തുകയിൽ നിന്നും വലിയൊരു പങ്ക് വ്യാജ സംഭാവനകളായി സർവകലാശാലയെ നിയന്ത്രിക്കുന്ന ട്രസ്റ്റിലേക്ക് തിരിച്ചെത്തിച്ചു. ഏകദേശം 499 കോടി രൂപ ക്യാമ്പസ് നിർമ്മാണത്തിനായി ചെലവിട്ടതിൽ 72.63 കോടി രൂപയ്ക്ക് മാത്രമാണ് നിയമപരമായ സ്രോതസ്സുകൾ കാണിക്കാൻ ട്രസ്റ്റിന് കഴിഞ്ഞത്. വൻതുകയുടെ നിയമവിരുദ്ധ ഇടപാടുകളും വ്യാജ ബോണ്ടുകളും കണ്ടെത്തിയതോടെ ബാക്കി വരുന്ന 426.46 കോടി രൂപ കുറ്റകൃത്യത്തിലൂടെ സമാഹരിച്ചതാണെന്ന് ഇ.ഡി സ്ഥിരീകരിച്ചു.
ഇതിനുപുറമെ കർഷകരുടെ കൃഷിഭൂമിയും ശത്രുസ്വത്തായി പ്രഖ്യാപിച്ച ഭൂമിയും അനധികൃതമായി കൈയേറിയാണ് സർവകലാശാല നിർമ്മിച്ചതെന്നും ഏജൻസി കണ്ടെത്തി. തുടർന്ന് ഈ വസ്തുക്കൾ കേന്ദ്ര ആഭ്യന്തര മന്ത്രാലയത്തിന് കീഴിലുള്ള അതോറിറ്റി തിരികെ പിടിച്ചിരുന്നു. നിലവിൽ റാംപൂർ ജയിലിൽ കഴിയുന്ന ആസം ഖാനെ ഇ.ഡി ഉദ്യോഗസ്ഥർ ചോദ്യം ചെയ്തിരുന്നു. പരിശോധനയിൽ സർവകലാശാല ക്യാമ്പസിൽ നിന്ന് ഡിജിറ്റൽ തെളിവുകളും രേഖകളും ഉദ്യോഗസ്ഥർ പിടിച്ചെടുത്തു. രാഷ്ടീയ വൈരാഗ്യം മൂലമാണ് കേന്ദ്ര സർക്കാർ ഇത്തരം കേസുകൾ ചമയ്ക്കുന്നതെന്ന് സമാജ്‌വാദി പാർട്ടി ആരോപിക്കുമ്പോൾ നിയമവിരുദ്ധമായി സമാഹരിച്ച മുഴുവൻ സ്വത്തുക്കളും കണ്ടുകെട്ടാനാണ് ഇ.ഡിയുടെ തീരുമാനം.
