ഡല്‍ഹി: വിദേശ കമ്പനികള്‍ക്ക് രേഖകള്‍ ചോര്‍ത്തിക്കൊടുത്ത കേസുമായി ബന്ധപ്പെട്ട് രണ്ട് പേരെ കൂടി ക്രൈം ബ്രാഞ്ച് അറസ്റ്റ് ചെയ്തു. ഇതോടെ കേസില്‍ അറസ്റ്റിലായവരുടെ എണ്ണം പതിനാറായി. വനം, പരിസ്ഥിതി മന്ത്രാലയത്തിലെ ജോയിന്റ് സെക്രട്ടറിയുടെ പേഴ്‌സണല്‍ അസിസ്റ്റന്റായ ജിതേന്ദര്‍ നാഗ്പാല്‍, ഒരു യു.പി.എസ്.സി അംഗത്തിന്റെ പേഴ്‌സണല്‍ അസിസ്റ്റന്റായ വിപന്‍ കുമാര്‍ എന്നിവരെയാണ് ഇന്ന് പൊലീസ് അറസ്റ്റ് ചെയ്തത്.ഇതോടെ കേസില്‍ ഉള്‍പ്പെട്ട മന്ത്രാലയങ്ങള്‍ അഞ്ചായി. ഇതിന് മുമ്പ് പെട്രോളിയം, കല്‍ക്കരി, ഊര്‍ജ്ജം, പ്രതിരോധം എന്നീ മന്ത്രാലയങ്ങളില്‍ നിന്നും രേഖകള്‍ ചോര്‍ന്നിരുന്നതായി കണ്ടെത്തിയിരുന്നു.
അറസ്റ്റിലായ ജിതേന്ദര്‍ നേരത്തെ അറസ്റ്റിലായ ലോകേഷ് ശര്‍മയ്ക്ക് രഹസ്യ രേഖകള്‍ കൈമാറുകയായിരുന്നെന്ന് പൊലീസ് പറഞ്ഞു. ഇയാള്‍ക്ക് മറ്റ് പല മന്ത്രാലയങ്ങളുമായും ബന്ധമുണ്ടെന്നും ,അവിടെ നിന്നാണ് ഇയാള്‍ക്ക് രേഖകള്‍ ലഭിച്ചതും പൊലീസ് വ്യക്തമാക്കി.
പെട്രോളിയം മന്ത്രാലയം പ്രവര്‍ത്തിക്കുന്ന ശാസ്ത്രിഭവനില്‍ റെയ്ഡ് നടത്തി, രഹസ്യ രേഖകള്‍ കമ്പനികള്‍ക്ക് ചോര്‍ത്തിക്കൊടുത്ത മന്ത്രാലയത്തിലെ ക്ലാര്‍ക്കിനെയും പ്യൂണിനെയും അടക്കം അഞ്ചു പേരെ ക്രൈംബ്രാഞ്ച് കഴിഞ്ഞ ദിവസം അറസ്റ്റ് ചെയ്തിരുന്നു. മുന്‍ മാദ്ധ്യമ പ്രവര്‍ത്തകനും ഇന്ധനവ്യവസായവുമായി ബന്ധപ്പെട്ട വെബ്‌പോര്‍ട്ടല്‍ നടത്തുന്ന സാന്തനു സൈക്കിയയും , മെല്‍ബേണ്‍ ആസ്ഥാനമാക്കി പ്രവര്‍ത്തിക്കുന്ന ഒരു കമ്പിയിലെ ഊര്‍ജ്ജ വിദഗ്ദനായ പ്രയാസ് ജെയിനെയും പോലീസ് അറസ്റ്റ് ചെയ്തിരുന്നു.
Discussion about this post