ജൊഹന്നാസ്ബര്‍ഗ്: ‘ബ്ലേഡ് റണ്ണര്‍’ എന്ന അറിയപ്പെടുന്ന ദക്ഷിണാഫ്രിക്കന്‍ ഓട്ടക്കാരന്‍ ഓസ്‌കര്‍ പിസ്റ്റോറിയസിന് കാമുകിയെ കൊലപ്പെടുത്തിയ കേസില്‍ ആറുവര്‍ഷം തടവ് ശിക്ഷ വിധിച്ചു. ദക്ഷിണാഫ്രിക്കന്‍ കോടതിയാണ് പിസ്റ്റോറിയസിനെ ശിക്ഷിച്ചത്.
2013-ലാണ് കേസിനാസ്പദമായ സംഭവം. വാലന്റൈന്‍സ് ദിനത്തിന്റെ പുലര്‍ച്ചെയാണ് കാമുകിയും മോഡലുമായ റീവ സ്റ്റീന്‍കാംപിനെ പിസ്റ്റോറിയസ് സ്വന്തം വീട്ടിലെ കുളിമുറിയില്‍ വെടിവെച്ച് കൊലപ്പെടുത്തിയത്. മോഷ്ടാവാണെന്ന് കരുതിയാണ് താന്‍ വെടിവെച്ചതെന്നായിരുന്നു പിസ്റ്റോറിയസിന്റെ വാദം. വിചാരണക്കോടതി ഈ വാദം അംഗീകരിച്ച് അഞ്ച് വര്‍ഷത്തെ തടവുശിക്ഷ വിധിച്ചു. എന്നാല്‍ ഇതിനെതിരെ വിവിധ വനിതാ സംഘടനകള്‍ ഉള്‍പ്പെടെയുള്ളവര്‍ പ്രതിഷേധവുമായി രംഗത്തെത്തി. തുടര്‍ന്ന് പ്രോസിക്യൂഷന്‍ അപ്പീലിന് പോവുകയായിരുന്നു.
കേസില്‍ 29 കാരനായ പിസ്റ്റോറിയസ് കുറ്റക്കാരനാണെന്ന് കഴിഞ്ഞ ഡിസംബറില്‍ അപ്പീല്‍ക്കോടതി കണ്ടെത്തിയിരുന്നു. വിചാരണക്കോടതിയുടെ വിധി ചോദ്യം ചെയ്ത പ്രോസിക്യൂഷന്‍ ഹര്‍ജിയിലാണ് പിസ്റ്റോറിയസ് കുറ്റക്കാരനാണെന്ന് കണ്ടെത്തിയത്. എന്നാല്‍ പിസ്റ്റോറിയസ് മനപ്പൂര്‍വ്വം കൊലനടത്തിയെന്നാണ് പ്രോസിക്യൂഷന്‍ വാദം. സംഭവത്തില്‍ പിസ്റ്റോറിയസ് പശ്ചാത്താപം പ്രകടിപ്പിച്ചിട്ടില്ലെന്നും കൊലപാതകത്തിനുള്ള പരമാവധി ശിക്ഷതന്നെ നല്‍കണമെന്നും പ്രോസിക്യൂഷന്‍ വാദത്തിനിടെ ആവശ്യപ്പെട്ടു.
വിധി പ്രസ്താവനയില്‍ ഇന്നു തന്നെ അപ്പീല്‍ നല്‍കാമെന്ന് കോടതി അറിയിച്ചു. ദക്ഷിണാഫ്രിക്കയില്‍ കൊലപാതകത്തിനുള്ള കുറഞ്ഞ ശിക്ഷ 15 വര്‍ഷം ആണ്.
Discussion about this post