ഡല്ഹി: ഹിസ്ബുല് മുജാഹിദീന് കമാന്ഡര് ബുര്ഹാന് വാനിയുടെ വധത്തെ തുടര്ന്ന് ആരംഭിച്ച സംഘര്ഷങ്ങള് തടയാന് കഴിയാതെ കേന്ദ്ര സര്ക്കാര്. കഴിഞ്ഞ ദിവസം ഒമ്പതുപേര്കൂടി കൊല്ലപ്പെട്ടതോടെ സംഘര്ഷങ്ങളില് മരിച്ചവരുടെ എണ്ണം 30 ആയി. പരിക്കേറ്റ് വിവിധ ആശുപത്രികളില് കഴിയുന്നവര് 300 കടന്നു. തിങ്കളാഴ്ചയും താഴ്വരയിലെ വിവിധ ഭാഗങ്ങളില് സുരക്ഷാസേനയും പ്രക്ഷോഭകരും ഏറ്റുമുട്ടി. സോപോറിലെ പൊലീസ് സ്റ്റേഷനും പുല്വാമയിലെ വ്യോമസേനയുടെ വിമാനത്താവളത്തിനും നേരെ കഴിഞ്ഞ ദിവസം ആക്രമണമുണ്ടായി.
സംഘര്ഷബാധിത പ്രദേശങ്ങളില് കര്ഫ്യൂ നിയന്ത്രണങ്ങള് തുടരുകയാണ്. പ്രശ്നബാധിത പ്രദേശങ്ങളില് സുരക്ഷാസേനയുടെ എണ്ണം വര്ധിപ്പിച്ചിട്ടുണ്ട്. കേന്ദ്ര സര്ക്കാര് 800 സിആര്പിഎഫ് ഭടന്മാരെ കൂടുതലായി കശ്മീരിലേക്കയച്ചു. നേരത്തേ സംസ്ഥാന പൊലീസിനെ സഹായിക്കാന് 1200 ഭടന്മാരെ നല്കിയിരുന്നു.
കഴിഞ്ഞ ദിവസം ബര്ഹാന്റെ കൊലപാതകത്തെ അപലപിച്ച് പാക് വിദേശകാര്യ മന്ത്രാലയം വാര്ത്താക്കുറിപ്പ് ഇറക്കിയിരുന്നു. കടുത്ത മനുഷ്യാവകാശ ലംഘനമാണ് നടന്നെതെന്ന് ചൂണ്ടിക്കാട്ടിയ പാക്കിസ്ഥാന് സ്വതന്ത്ര ഭരണം വേണമെന്ന കശ്മീരുകാരുടെ ആവശ്യത്തെ അടിച്ചമര്ത്താനാണ് സൈന്യം ശ്രമക്കുന്നതെന്ന് ആരോപിച്ചു.
സൈന്യം നടത്തിയ ഓപ്പറേഷനില് വെള്ളിയാഴ്ച രാത്രിയാണ് ബര്ഹാന് വാനി കൊല്ലപ്പെട്ടത്. വാനിയെ കൂടാതെ മറ്റ് മൂന്ന് ഹിസ്ബുള് ഭീകരരും ഏറ്റുമുട്ടലില് കൊല്ലപ്പെട്ടിരുന്നു.
Discussion about this post