ശ്രീനാരായണ ഗുരുവിന്റെ നമുക്ക് ജാതിയില്ല പ്രഖ്യാപനത്തിന്റെ ശതാബ്ദി സിപിഐഎം ആഘോഷിക്കുന്നതിനെ കളിയാക്കി അഡ്വക്കറ്റ് എ ജയശങ്കര്‍. തന്റെ ഫേസ്ബുക്ക് പോസ്റ്റിലാണ് ജയശങ്കറിന്റെ കുറിപ്പ്.
ശ്രീനാരായണ ഗുരുവിന്റെ ‘നമുക്ക് ജാതിയില്ല’ പ്രഖ്യാപനത്തിന്റെ ശതാബ്ദി കമ്മ്യുണിസ്‌റ് പാര്‍ട്ടി ഓഫ് ഇന്ത്യ (മാര്‍ക്‌സിസ്‌റ്)ന്റെ ആഭിമുഖ്യത്തില്‍ വിപുലമായി ആഘോഷിക്കാന്‍ പോകുന്നു. ചട്ടമ്പിസ്വാമി ജയന്തി ദിനമായ ആഗസ്ത് 24 മുതല്‍ അയ്യങ്കാളി ജയന്തി ദിനമായ ആഗസ്ത് 28 വരെയാണ് ആഘോഷം.
വെള്ളാപ്പള്ളി നടേശന്‍ ശ്രീനാരായണ ഗുരുവിനെ വെറും ഈഴവനാക്കി തരംതാഴ്ത്തുന്നതില്‍ മനംനൊന്തിട്ടാണ് സി.പി.ഐ.(എം) ഈ ആഘോഷപരിപാടിയുമായി അരങ്ങത്തെത്തുന്നത്.
സി.പി.എം.നു ജാതിയില്ല മതവുമില്ല എന്ന കാര്യം ലോകപ്രസിദ്ധമാണ്. ഒരു ജാതി ഒരു മതം ഒരു ദൈവം മനുഷ്യന് എന്ന ഗുരുവചനത്തെക്കാള്‍, ജാതി വേണ്ട മതം വേണ്ട ദൈവം വേണ്ട മനുഷ്യന് എന്ന സഹോദരന്‍ അയ്യപ്പന്റെ സൂക്തത്തോടാണ് പാര്‍ട്ടിക്ക് ആഭിമുഖ്യം.
മതനിരപേക്ഷ കക്ഷിയായതുകൊണ്ടാണ് അവിഭക്ത കമ്മ്യുണിസ്‌റ് പാര്‍ട്ടി മുസ്‌ലിം ലീഗിന്റെ പാക്കിസ്ഥാന്‍ വാദത്തെ പണ്ട് പിന്താങ്ങിയത്. അതേ കാരണം കൊണ്ടാണ് ഇ.എം.എസ് മലപ്പുറം ജില്ലയുണ്ടാക്കിയതും.
ജാതിയില്ലാത്തതുകൊണ്ടാണ് സഖാവ് ഇ.എം.എസ്. മരണപര്യന്തം നമ്പൂതിരിപ്പാട് എന്ന ജാതിപ്പേര് കൊണ്ടുനടന്നത് ; നാലുമക്കളെക്കൊണ്ടും സ്വജാതിയില്‍ നിന്ന് (അതും ഓത്തുള്ള ഇല്ലത്തുനിന്നു മാത്രം) വേളികഴിപ്പിച്ചതും.
സഖാവ് വീണാ ജോര്‍ജ്ജിനെ ആറന്മുളയില്‍ നിര്‍ത്തി ജയിപ്പിച്ചത് കത്തിച്ചാല്‍ കത്തുന്ന വിപ്ലവകാരി ആയതുകൊണ്ടാണ്, അല്ലാതെ ഓര്‍ത്തഡോക്‌സ് സഭ സെക്രട്ടറിയുടെ ഭാര്യയായതുകൊണ്ടല്ല. ഡോ.എസ്.സുജാതയെ മഹാത്മാ ഗാന്ധി സര്‍വകലാശാല സിന്ഡിക്കേറ്റില്‍ നിലനിര്‍ത്തിയത് ആയമ്മയ്ക്കു ആംഗല സാഹിത്യത്തിലുള്ള അഗാധ പാണ്ഡിത്യവും പുരോഗമന പ്രസ്ഥാനത്തോടുള്ള പ്രതിപത്തിയും പരിഗണിച്ചുമാത്രമാണ്. കുബുദ്ധികള്‍ കരുതുംപോലെ നായര്‍ സമുദായ ഉടമസ്ഥന്‍ സുകുമാരന്‍ നായരുടെ മകളായതുകൊണ്ടല്ല.
ജാതി ചോദിക്കരുത്, ജാതി പറയരുത്; പക്ഷെ ജാതിയെ മറന്നൊന്നും ചെയ്യരുത്. നമുക്ക് ജാതിയില്ല, ഉണ്ടായിട്ടേയില്ല; ഇനി ഉണ്ടാകാനും പോകുന്നില്ല.
Discussion about this post