കണ്ണൂര്: നോക്കിവെച്ചിട്ടുണ്ട് എല്ലാവരും സൂക്ഷിക്കുന്നത് നല്ലതാണെന്ന് കണ്ണൂരിലെ കോണ്ഗ്രസ് നേതാക്കള്ക്ക് സിപിഐഎം ജില്ലാ സെക്രട്ടറി പി ജയരാജന്റെ മുന്നറിയിപ്പ്. കോണ്ഗ്രസ് നേതാക്കളുള്പ്പെട്ട കൊലപാതകമടക്കമുള്ള ക്രിമിനല് കേസുകളുടെ കണക്കെടുക്കുത്തുവെച്ചിട്ടുണ്ടെന്നും പി ജയരാജന് പറഞ്ഞു.
സിപിഐഎമ്മിനെ കുറ്റപ്പെടുത്തി സമാധാനവാദികളാകാന് ശ്രമിക്കുന്നവര്ക്ക് തക്കതായ മറുപടിയുണ്ടെന്നും അദ്ദേഹം വ്യക്തമാക്കി. പയ്യന്നൂര് ധന്രാജ് വധക്കേസിനെത്തുടര്ന്നുണ്ടായ രാഷ്ട്രീയസംഭവവികാസങ്ങള് വിശദീകരിക്കുന്നതിനായി സിപിഐഎം അന്നൂരില് സംഘടിപ്പിച്ച പൊതുയോഗം ഉദ്ഘാടനം ചെയ്യുമ്പോഴായിരുന്നു പി ജയരാജന് കോണ്ഗ്രസ് നേതാക്കള്ക്ക് മുന്നറിയിപ്പ് നല്കിയത്. ജില്ലയില് രാഷ്ട്രീയ കൊലപാതകമുണ്ടാകുമ്പോള് സിപിഐഎമ്മിനെ പഴിചാരുന്ന കോണ്ഗ്രസ് നേതാക്കള് അവര് നടത്തിയ കൊലപാതകങ്ങളെക്കുറിച്ചും അക്രമങ്ങളെക്കുറിച്ചും മറക്കരുത്. ഈ കേസുകളിലൊന്നും ഇതുവരെയും അന്വേഷണം അവസാനിച്ചിട്ടില്ല. സമാധാനത്തിന്റെ വെള്ളരിപ്രാവുകളാകുന്നവര് സൂക്ഷിക്കണം- ജയരാജന് പറഞ്ഞു.
നാല്പ്പാടി വാസു വധക്കേസില് കെ സുധാകരനെതിയരായ മൊഴി ഇപ്പോഴും നിലനില്ക്കുന്നുണ്ട്. ഇത്തരം കേസുകളുടെ കണക്കുശേഖരിക്കുന്നുണ്ട്.
കൊലപാതകത്തിന്റെയും അക്രമത്തിന്റെയും ഭാഷയില് നേരിട്ടാല് അതേഭാഷയില് തിരിച്ചടിക്കുമെന്നും പി ജയരാജന് തുറന്നടിച്ചു. ജില്ലയില് ആര്എസ്എസിനു പുറമേ കോണ്ഗ്രസിനെയും ശക്തമായി നേരിടാനുള്ള നീക്കങ്ങളുണ്ടാകുമെന്നും പി ജയരാജന് പറഞ്ഞു.
Discussion about this post