കേക്ക് ഇഷ്ടമല്ലാത്തവരായി ആരുണ്ടല്ലേ.. പല ഫ്ളേവറുകളിൽ വർണങ്ങളിൽ വായിലിട്ടാൽ അലിഞ്ഞ് പോകുന്ന കേക്ക് കഴിക്കാൻ നമുക്കേറെ ഇഷ്ടമാണ്. എന്നാൽ നമുക്ക് ഒരു വ്യത്യസ്തമായ കേക്ക് ഉണ്ടാക്കി കഴിച്ചാലോ.. ആരോഗ്യപ്രദമായത് തന്നെ ആവട്ടെ. ഇതിന് ഏറ്റവും ആവശ്യമുള്ള വസ്തു പഴത്തൊലി ആണ്.. ഹേ പഴത്തൊലിയോ എന്ന് കേട്ട് നെറ്റി ചുളിക്കണ്ട.
ധാരാളം ആൻറി-ഓക്സിഡൻറുകളും ഒപ്പം വൈറ്റമിൻ-സിയും അടങ്ങിയിരിക്കുന്നു പഴത്തൊലി പ്രതിരോധശേഷി മെച്ചപ്പെടുത്തുന്നതിന് നല്ലതാണ്. ഫൈബറിൻറെ മികച്ച ഉറവിടമാണ് പഴത്തൊലി. ഫൈബറടങ്ങിയ ഭക്ഷണങ്ങളെല്ലാം വെയിറ്റ് ലോസ് ഡയറ്റിന് അനുയോജ്യമായ ഒന്നാണിത് . എന്ന് മാത്രമല്ല ഗ്യാസ്, വയർ വീർത്തുകെട്ടൽ പോലുള്ള ദഹനപ്രശ്നങ്ങൾ പരിഹരിക്കുന്നതിനും ഇത് ഗുണകരമാണ്. മുഖക്കുരുവിന് പരിഹാരമാകാനും പഴത്തൊലി നല്ലതാണ് . ഇത് അരച്ച് നേരിട്ട് മുഖത്ത് തേക്കുന്നതിലൂടെ തന്നെ മുഖക്കുരുവിന് ആശ്വാസം കാണാൻ സാധിക്കും. പഴത്തൊലി ചേർത്ത് വിവിധ തരം ഫേസ് മാസ്കുകൾ തയ്യാറാക്കുന്നവരുമുണ്ട്. മുഖക്കുരുവിന് പുറമെ ഡാർക് സ്പോട്ട്സ്, ചുളിവുകൾ, മുഖത്തെ മറ്റ് പാടുകൾ എന്നിവയെല്ലാം പരിഹരിക്കുന്നതിനും പഴത്തൊലി നല്ലതാണ്.
ഗോതമ്പിനേക്കാൾ നല്ലതാണേ്രത പഴത്തൊലി വെറുതെ പറയുന്നതല്ല പരീക്ഷിച്ച് തെളിയിച്ചതാണിത്. പഴത്തൊലി ഉണക്കി പൊടിച്ച് അത് കേക്കും മറ്റ് ബേക്കറി ഉൽപ്പന്നങ്ങളും ഉണ്ടാക്കുന്നത് രുചികരം മാത്രമല്ല ആരോഗ്യദായകവുമാണെന്നാണ് പുതിയൊരു പഠനം കണ്ടെത്തിയിരിക്കുന്നത്.
പഴത്തൊലി പൊടി ഉപയോഗിക്കുമ്പോൾ ഉൽപ്പന്നങ്ങളുടെ രുചി കുറയുമോ എന്ന പേടിയും വേണ്ടതില്ല. കാരണം പഴത്തൊലി പൊടി ഉപയോഗിച്ച് ഉണ്ടാക്കിയ ഉൽപ്പന്നങ്ങൾ കഴിച്ച ഉപഭോക്താക്കൾ അവ രുചികരമാണെന്ന് സാക്ഷ്യപ്പെടുത്തിയിട്ടുണ്ട്. പഴത്തൊലി പൊടി ചേർത്താൽ വിഭവങ്ങൾക്ക് കൃത്രിമ നിറവും ചേർക്കേണ്ടതില്ല. കാരണം മഞ്ഞത്തൊലിയുടെ സ്വാഭാവികമായ മഞ്ഞനിറം ഉത്ന്നങ്ങൾക്ക് ലഭിക്കും.
ബേക്കിംഗ് ഉൽപ്പന്നങ്ങൾ ഉണ്ടാക്കുമ്പോൾ ഉപയോഗിക്കുന്ന ഗോതമ്പ്, മൈദ എന്നിവയുടെ പത്ത് ശതമാനം പഴത്തൊലി പൊടി ചേർക്കാനാണ് പഠനം നിർദ്ദേശിക്കുന്നത്. പഴത്തൊലി പൊടിയുടെ അളവ് കൂടിയാൽ ഫൈബർ കൂടുതലായതിനാൽ വിഭവം കട്ടിയായി പോകാൻ സാധ്യതയുണ്ട്. അതേസമയം 7.5 ശതമാനം അളവിൽ പഴത്തൊലി പൊടി ചേർക്കുകയാണെങ്കിൽ ഉൽപ്പന്നങ്ങളുടെ രുചിയും രൂപവും പെർഫെക്ട് ആയിരിക്കും. ഇവ മൂന്നുമാസത്തോളം കേടുകൂടാതെ ഇരിക്കുമെന്നതാണ് പഴത്തൊലി വിഭങ്ങളുടെ പ്രത്യേകത.
കേക്ക് അല്ലെങ്കിൽ ബ്രെഡ് ഉണ്ടാക്കുമ്പോൾ ഗോതമ്പുപൊടിയുടെ പത്ത് ശതമാനത്തിന് പകരമായി പഴത്തൊലി പൊടി ചേർത്താൽ അതിൽ പ്രോട്ടീൻ, കാർബോഹൈഡ്രേറ്റ്, കൊഴുപ്പ് എന്നിവ കൂടുതലായിരിക്കുമെന്നാണ് പഠനം കണ്ടെത്തിയത്.
