ശ്രീനഗര്: 112 പേരുടെ മരണത്തിനിടയാക്കിയ ഇന്ത്യാ വിരുദ്ധ പ്രക്ഷോഭത്തിന് നേതൃത്വം നല്കിയ ഹുറിയത് കോണ്ഫറന്സ് നേതാവ് മസാറത് ആലമിനെ ജയിലില്നിന്ന് മോചിപ്പിച്ചതിനെതിരെ ഭരണകക്ഷിയായ ബിജെപി രംഗത്ത് .
ദേശ വിരുദ്ധ പ്രവര്ത്തനങ്ങള് നടത്തുകയും തീവ്രവാദത്തെ പ്രോത്സാഹിപ്പിക്കുകയും ചെയ്യുന്ന വിഘടനവാദി സംഘടനയുടെ നേതാവിനെ വീണ്ടും അറസ്റ്റ് ചെയ്യണമെന്നാവശ്യപ്പെട്ടാണ് ബി.ജെ.പി പ്രതിഷേധ പ്രകടനം നടത്തിയത്.
രാഷ്ട്രീയത്തടവുകാരെ വിട്ടയക്കാനുള്ള മുഖ്യമന്ത്രി മുഫ്തി മുഹമ്മദ് സെയ്യിദിന്റെ തീരുമാനത്തെത്തുടര്ന്നാണ് ആലമിനെ മോചിപ്പിച്ചത്. എന്നാല് രാജ്യത്തിന്റെ സുരക്ഷക്ക് ഭീഷണിയാകുന്ന ഇത്തരക്കാരെ മോചിപ്പിക്കുന്നത് അംഗീകരിക്കാനാവില്ലെന്ന് ബി.ജെ.പി നേതാവ് യുദ്ധവീര് സത്തി പറഞ്ഞു. മസാറത് ആലമിനെ വീണ്ടും അറസ്റ്റ് ചെയ്യാനുള്ള നീക്കം മുഖ്യമന്ത്രി ഭാഗത്തു നിന്നുണ്ടായില്ലെങ്കില് പാര്ട്ടിയുടെ യുവജനസംഘടന തുടര്ച്ചയായ പ്രതിഷേധ പരിപാടികളുമായി രംഗത്തിറങ്ങുമെന്നും അദ്ദേഹം അറിയിച്ചു.
എന്നാല് ക്രിമിനല് കുറ്റങ്ങള് ചുമത്താത്ത രാഷ്ട്രീയ തടവുകാരെ വിട്ടയക്കാനുള്ള സര്ക്കാര് നിര്ദേശത്തിന്റെ ഭാഗമായാണ് നടപടിയെന്ന് ഡി.ജി.പി കെ. രാജേന്ദ്ര വ്യക്തമാക്കിയിട്ടുണ്ട്. 42കാരനായ മസാറത് 2010 ലെ ദേശവിരുദ്ധ പ്രക്ഷോഭത്തിനെതിരെ പൊതു സുരക്ഷാ നിയമപ്രകാരമാണ് അറസ്റ്റിലായത്.
Discussion about this post