ഡല്‍ഹി: സിനിമകളിലെ രംഗങ്ങള്‍ക്കും സംഭാഷണങ്ങള്‍ക്കും കത്രിക വയ്ക്കുന്ന സെന്‍സര്‍ബോര്‍ഡിന്റെ നടപടികള്‍ക്ക് പകരം പുതിയ രീതി നിലവില്‍ വരുന്നു. ശ്യാം ബെനഗല്‍ കമ്മിറ്റിയുടെ ശുപാര്‍ശകള്‍ സെന്‍ട്രല്‍ ബോര്‍ഡ് ഓഫ് ഫിലിം സര്ട്ടിഫിക്കേഷന് അംഗീകരിച്ചതോടെയാണ് സിനിമാ സര്ട്ടിഫിക്കേഷന് പുതിയ രീതി വരുന്നത്.
സിനിമ പ്രദര്‍ശനത്തെ സംബന്ധിച്ച നിയമത്തില്‍ മാറ്റങ്ങള്‍ ആവശ്യമാണെന്ന് ശ്യാം ബെനഗല്‍ കമ്മിറ്റി നിര്‍ദ്ദേശിച്ചു. ചലച്ചിത്രങ്ങളെ യു, യുഎ, എ എന്നിങ്ങനെ മൂന്ന് വിഭാഗങ്ങളായി വര്‍ഗ്ഗീകരിക്കുന്ന രീതിയ്ക്കു പകരം, സിനിമയുടെ ഉള്ളടക്കത്തിനനുസരിച്ച് കൂടുതല്‍ വിഭാഗങ്ങള്‍ ഉള്‍പ്പെടുത്തി രംഗങ്ങള്‍ മുറിച്ചുമാറ്റുന്ന രീതി ഒഴിവാക്കാനാണ് കമ്മിറ്റി നിര്‍ദ്ദേശിച്ചിരിക്കുന്നത്. യു, യുഎ എന്നീ വിഭാഗങ്ങള്‍ യുഎ 12 പ്ലസ്, യുഎ 15 പ്ലസ് എന്നിങ്ങനെ വര്‍ഗ്ഗീകരിച്ച് സര്‍ട്ടിഫിക്കറ്റ് നല്‍കണം. കൂടുതല്‍ ലൈംഗിക ഉള്ളടക്കമുള്ള ചിത്രങ്ങള്‍ എ, എ/സി (അഡള്‍ട്ട് വിത്ത് കോഷന്‍) എന്നിങ്ങനെ രണ്ട് വിഭാഗങ്ങളായും സര്‍ട്ടിഫിക്കറ്റ് നല്‍കണം. പച്ചയായ ലൈംഗിക രംഗങ്ങളായിരിക്കില്ല എ/സി വിഭാഗത്തിലുണ്ടാവുക. പ്രകടമായ ലൈംഗിക രംഗങ്ങളും നഗ്‌നതയും കാണിക്കുന്ന ചിത്രങ്ങള്‍ക്കാണ് എ/സി സര്‍ട്ടിഫിക്കറ്റ് നല്‍കുക. സര്‍ട്ടിഫിക്കറ്റുകള്‍ നല്‍കുന്നതിന് കൂടുതല്‍ വിഭാഗങ്ങള്‍ ഉള്‍പ്പെടുത്തുമ്പോള്‍ സിനിമയുടെ ഉള്ളടക്കം എങ്ങനെ വര്‍ഗ്ഗീകരിക്കും എന്നത് സംബന്ധിച്ച് അവ്യക്തതയുണ്ട്.
അതുപോലെ പുതിയ തരത്തില്‍ സര്‍ട്ടിഫിക്കറ്റുകള്‍ ലഭിച്ച ഏതെല്ലാം ചിത്രങ്ങള്‍ ചാനലുകളില്‍ പ്രക്ഷേപണം ചെയ്യണം എന്ന കാര്യത്തിലും അവ്യക്തതയാണുള്ളത്. അമിത ലൈംഗിക പ്രകടനങ്ങളുള്ള ചിത്രങ്ങളിലെ രംഗങ്ങള്‍ ഒഴിവാക്കാതെ ചാനലില്‍ പ്രദര്‍ശിപ്പിക്കുന്നത് സംബന്ധിച്ചാണ് അവ്യക്തതയുള്ളത്.നിലവില്‍ ദൂരദര്‍ശന്‍ യു സര്‍ട്ടിഫിക്കേറ്റ് ചിത്രങ്ങള്‍ മാത്രമാണ് സംപ്രേഷണം ചെയ്യുന്നത്. സ്വകാര്യ ചാനലുകളാവട്ടെ എയു സര്‍ട്ടിഫിക്കറ്റുള്ള ചിത്രങ്ങളും സംപ്രേഷണം ചെയ്യുന്നുണ്ട്.
Discussion about this post