തിരുവനന്തപുരം: പുലിമുരുകന്‍ സിനിമ ഇന്റര്‍നെറ്റില്‍ പ്രചരിപ്പിച്ച അഞ്ചു പേര്‍ അറസ്റ്റില്‍. ഇതുമായി ബന്ധപ്പെട്ട് ആന്റി പൈറസി സെല്‍ സംസ്ഥാനവ്യാപകമായി നടത്തിയ പരിശോധനയിലാണ് അഞ്ചുപേര്‍ പിടിയിലായത്. ആന്റിപൈറസി സെല്‍ പൊലീസ് സൂപ്രണ്ട് പി.ബി.രാജീവിനു ലഭിച്ച രഹസ്യവിവരത്തിന്റെ അടിസ്ഥാനത്തില്‍ നടത്തിയ പരിശോധനയിലായിരുന്നു അറസ്റ്റ്. മലപ്പുറം പെരിന്തല്‍മണ്ണയില്‍ നെറ്റ്‌പോയിന്റ് ഇന്റര്‍നെറ്റ് കട ഉടമ ഫാസില്‍, കുന്നംപള്ളി മൊബൈല്‍ വേള്‍ഡ് കട ഉടമ ഷെഫീക്ക് തരീക്ക്, മലപ്പുറം മങ്കട വി.എച്ച്.എം. ഇന്റര്‍നെറ്റ് കട ഉടമ കോട്ടയ്ക്കല്‍ സ്വദേശി നൗഷീര്‍, സെന്‍ട്രല്‍ മൊബൈല്‍ ഷോപ്പ് ഉടമ ഷഫീക്ക് പുല്ലാറ, പാലക്കാട് വാളയാര്‍ സൗത്ത് വൈറ്റ് പാര്‍ക്ക് കട ഉടമ ചുള്ളിമാട് നജീമുദ്ദീന്‍ എന്നിവരാണു പിടിയിലായത്.
ഡിവൈഎസ്പി: എം.ഇക്ബാല്‍, സിഐ: സുഭാഷ് ചന്ദ്രബോസ്, എസ്‌ഐ മുകേഷ് എന്നിവരുടെ നേതൃത്വത്തിലുള്ള സംഘമാണു റെയ്ഡ് നടത്തിയത്. വരും ദിവസങ്ങളിലും റെയ്ഡ് തുടരുമെന്ന് ആന്റി പൈറസി സെല്‍ സൂപ്രണ്ട് പി.ബി. രാജീവ് അറിയിച്ചു. പുലിമുരുകന്റെ നിര്‍മാതാവ് ടോമിച്ചന്‍ മുളകുപാടത്തിന്റെ പരാതിയെ തുടര്‍ന്നായിരുന്നു റെയ്ഡ്.
Discussion about this post