ഷാര്ജാ പുസ്തകോല്വസത്തിലെ മുഖാമുഖത്തില് തന്നെ പ്രകോപിപ്പിച്ച ചോദ്യം ചോദിച്ച മാധ്യമപ്രവര്ത്തകനെ മമ്മൂട്ടി മറ്റൊരു പരിപാടിയില് നിന്ന് ഒഴിവാക്കിയെന്ന് ആരോപണം. ഗുരുസമാഗമം എന്ന പേരില് എട്ടാം ക്ലാസില് തന്നെ പഠിപ്പിച്ച സാറാമ്മ ടീച്ചറെ വീട്ടിലെത്തി സന്ദര്ശിപ്പോഴാണ് മമ്മൂട്ടി തന്നെ അസ്വസ്ഥപ്പെടുത്തിയ ചോദ്യം ഉന്നയിച്ച മാധ്യമപ്രവര്ത്തകനെ ഒഴിവാക്കിയത്. തെരഞ്ഞെടുത്ത മാധ്യമപ്രവര്ത്തകര്ക്കൊപ്പമായിരുന്നു മമ്മൂട്ടി ഗുരുവായ സാറാമ്മ ടീച്ചറെ കണ്ടത്.
ചൊവ്വാഴ്ച ഷാര്ജാ പുസ്തകോല്സവത്തില് അതിഥിയായെത്തിയ മമ്മൂട്ടി ആസ്വാദകര്ക്കും മാധ്യമപ്രവര്ത്തകര്ക്കുമായി മുഖാമുഖം അനുവദിച്ചിരുന്നു. മുഖാമുഖത്തിനിടെ മുതിര്ന്ന മാധ്യമപ്രവര്ത്തകനായ എംസിഎ നാസറിന്റെ ചോദ്യം മമ്മൂട്ടിയെ പ്രകോപിപ്പിച്ചു. മമ്മൂക്കയുടെ സ്വഭാവത്തില് ഉണ്ടെന്ന് പറയുന്ന അഹന്തയും അഹംഭാവവും മാറ്റിപ്പിടിച്ചാല് കുറേക്കൂടി ജനകീയമാകാമായിരുന്നില്ലേ? എന്നായിരുന്നു എംസിഎ നാസറിന്റെ ചോദ്യം. ”നിലവിലുള്ള സ്വഭാവത്തില് മമ്മൂക്കയോട് അടുക്കാന് മോഹന്ലാലിന്റെ അത്ര എളുപ്പമല്ല, ഒരു ജനകീയനല്ല എന്നൊരു പൊതുബോധമുണ്ട്, അതൊന്ന് മാറ്റിക്കൂടേ, എന്നായിരുന്നു നാസര് ചോദ്യം വിശദീകരിച്ചത്. ആ പൊതുബോധം മാറ്റേണ്ടത് ആരാണ് ഞാനാണോ അതോ പൊതുബോധം വച്ചുള്ളവരാണോ എന്നായിരുന്നു മമ്മൂട്ടിയുടെ വിശദീകരണം. ആരാധകര് വലിയ ആരവത്തോടെയാണ് മമ്മൂട്ടിയുടെ ഈ വാക്കുകളെ വരവേറ്റത്.
എന്നെപ്പറ്റിയുള്ള പൊതുബോധം,പൊതുധാരണ അദ്ദേഹത്തിന് വേണ്ടിയെങ്കിലും എല്ലാരും മാറ്റിയാല് നല്ലത് എന്ന് പറഞ്ഞ് ചോദ്യമുന്നയിച്ച എംസിഎ നാസര് ഇരുന്ന ഇടത്തേക്ക് കൈചൂണ്ടിയാണ് മമ്മൂട്ടി മുഖാമുഖം അവസാനിപ്പിച്ചത്. ബുധനാഴ്ച ദുബായിയില് തന്നെ നടന്ന ഗുരുസമാഗമം പരിപാടിയുടെ ഏകോപന ചുമതലയുണ്ടായിരുന്ന ആള് ചോദ്യമുന്നയിച്ച ് എംസിഎ നാസറിനെയും മാധ്യമം പ്രതിനിധിയെയും ഒഴിവാക്കിയെന്നാണ് ആരോപണം.
ഗള്ഫ് മാധ്യമപ്രവര്ത്തകനും ഖലീജ് ടൈംസ് പ്രതിനിധിയുമായ വിഎം സതീഷ് സംഭവത്തില് പ്രതിഷേധം അറിയിച്ച് ഫേസ്ബുക്ക് പോസ്റ്റുമായി രംഗത്തെത്തിയിട്ടുണ്ട്. മാധ്യമപ്രവര്ത്തകനായ എന്റെ അടുത്ത സുഹൃത്തിനോട് ഐക്യദാര്ഢ്യം പ്രകടിപ്പിക്കാനാണ് ഇതെഴുതുന്നത്, മെഗാസ്റ്റാര് എന്ന് ‘വിളിക്കപ്പെടുന്ന’ മമ്മൂട്ടിയോട് മൂര്ച്ഛയുള്ള ഒരു ചോദ്യം ചോദിക്കാനുള്ള ആര്ജ്ജവം കാട്ടിയതിന്. മാധ്യമപ്രവര്ത്തകര് ഉള്പ്പെടെയുള്ള പൊതുജനത്തോട് ഹിമാലയന് ഈഗോയോടെ മസില്പിടിച്ച് നടത്തുന്ന പെരുമാറ്റത്തെക്കുറിച്ച് ചോദിച്ചതിന്. മമ്മൂട്ടിയുടെ വ്യക്തിത്വത്തിന്റെ സവിശേഷത എന്ന നിലയില് ഈ സംഭവത്തെ വേറിട്ട രീതിയില് അവതരിപ്പിക്കാന് ശ്രമിക്കുകയാണ് മാധ്യമങ്ങളില് ഒരു വിഭാഗം ഇപ്പോള്. നല്ലതുതന്നെ. പക്ഷേ ആ ചോദ്യം ചോദിച്ച എം.സി.എ.നാസറിനാണ് കൂടുതല് കൈയടി നല്കേണ്ടത് എന്ന പക്ഷക്കാരനാണ് ഞാന്. താരപ്രഭയില് നില്ക്കുന്നവര്ക്കെല്ലാം പഞ്ചാരവാക്കുകളേ ഇഷ്ടമാകൂ. എഫ്എം റേഡിയോയിലെ അവതാരകര് ചോദിക്കുംപോലെയുള്ള ചോദ്യങ്ങള്. താരങ്ങളെ സന്തോഷിപ്പിച്ചിരുത്തേണ്ടത് അവരുടെ ആവശ്യമായിരിക്കാം. പക്ഷേ അത്തരത്തില് നിക്ഷിപ്തതാല്പര്യങ്ങള് എന്തെങ്കിലുമുള്ള ആളല്ല എം.സി.എ.നാസര്. അദ്ദേഹം ചോദിച്ച ചോദ്യം കണിശവും കാര്യമാത്ര പ്രസക്തവുമായിരുന്നു. മാറ്റം എന്നത് ഒഴിവാക്കാനാവാത്തതാണ്, അത് നിങ്ങള് നിങ്ങളുടെ അറുപതുകളിലാണെങ്കിലും.”-എന്നിങ്ങനെയാണ് സതീഷിന്റെ പോസ്റ്റ്.
[fb_pe url=”https://www.facebook.com/vmsatheesh/posts/1534679513225685″ bottom=”30″]
Discussion about this post